U Babrujsku KDB zatrymaŭ 18-hadovaha chłopca. Jaho raździeli i prymusili aholenym raskazvać pra siabie na videa
Vina chłopca zaklučajecca ŭ tym, što jon simpatyzavaŭ Ukrainie.
Supracoŭniki Kamiteta dziaržaŭnaj biaśpieki prosta na vulicy zatrymali 18-hadovaha Arcioma Biarozkina, paviedamlajuć pravaabaroncy-viasnoŭcy.
Zdaryłasia heta ŭ ramkach «začystki», jakuju zahadaŭ pravieści Alaksandr Łukašenka.
Junaka pakłali na asfalt i pryvieźli damoŭ, dzie jaho raździeli i prymusili aholenym, u adnych trusach, zastrašanym, raskazvać na videa, što jon stvaryŭ try kanały ŭ telehramie, dzie raźmiaščaŭ «ekstremisckija», nibyta, materyjały — da prykładu, fatahrafii ŭkrainskich vajskoŭcaŭ.
Taksama jamu ŭ vinu staviać stvorany ŭ tyktoku akaunt, pryśviečany baraćbie Ukrainy suprać rasijskaj ahresii. Junaka vinavaciać i ŭ stvareńni čyrvona-čornaha patča.
Videa z chłopcam apublikavali łukašenkaŭskija ŚMI.
Ab praciahu «kompleksnaj adpracoŭki asob, jakija padtrymlivajuć «antydziaržaŭnyja pohlady», paviedamiła 17 sakavika pres-słužba MUS. Tolki HUBAZiK štodzień pravodzić kala 20 pieratrusaŭ. Zahad pra začystku addaŭ Alaksandr Łukašenka, paśla taho, jak padpolščyki z vykarystańniem dronaŭ vyvieli z ładu kaštoŭny rasijski samalot, jaki bazavaŭsia na aeradromie ŭ Mačuliščach pad Minskam i z dapamohaj jakoha rakiety i drony navodzilisia na celi va Ukrainie. Adkaznaść za hetuju dyviersiju ŭziała na siabie inicyjatyva siłavikoŭ suprać dyktatury «Bajpoł».
Masavyja palityčnyja represii ŭ Biełarusi praciahvajucca z 2020 hoda, kali Alaksandr Łukašenka, miarkujučy pa źviestkach z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhraŭ Śviatłanie Cichanoŭskaj, ale nie addaŭ uładu. Z 2022 hoda, paśla napadu Rasii na Ukrainu, biełarusaŭ pačali praśledavać taksama za antyvajennyja vykazvańni abo za simpatyi da Ukrainy, jakaja zmahajecca za niezaležnaść i terytaryjalnuju cełasnaść. Za hety čas u krainie adbyłosia kala 50 tysiač palityčna matyvavanych zatrymańniaŭ, zaviedziena kala 12 tysiač palityčna-kryminalnych spraŭ i adkinutyja bazavyja normy zakonnaści i marali.
Ciapier čytajuć
31‑hadovy rasijanin akruciŭ 17‑hadovuju biełarusku. Finał historyi strašny: turma za narkotyki, śmierć dziciaci, «SVA» i skradzienyja hrabavyja12
Kamientary