«Składana tolki sa słovami, jakija padobnyja da ruskich, i sačyć za Č i H». Što za rasijanie pracujuć ciapier u Kupałaŭskim?

U krasaviku 2023 hoda ŭ teatry adbudziecca premjera śpiektakla «Ramea i Džuljeta». Pastavić jaho Daniła Filipovič, adzin ź niekalkich biełaruskich režysioraŭ, jakija pahadzilisia supracoŭničać z teatram paśla zvalnieńnia praktyčna ŭsioj trupy.

Na rolu Džuljety zajaŭlenyja dźvie aktrysy. Adna ź ich — Hanna Mieščarakova. Dziaŭčynie 22 hady, u 2022-m jana skončyła maskoŭski Instytut sučasnaha mastactva. Siarod moŭ, jakija jana viedaje, — ruskaja, anhlijskaja i francuzskaja (apošniaja sa słoŭnikam).

Pavialičyć

Na rolu Ramea taksama zajaŭlenyja dva akciory. Partnioram Mieščarakovaj, napeŭna, budzie jaje adnakurśnik pa maskoŭskim Instytucie sučasnaha mastactva Barys Ciacierkin. Jamu 24 hady, jon vałodaje ruskaj i anhlijskaj movami, pazicyjanuje siabie ŭ instahramie jak «zajezdžy artyst sa staličnym hlancam».

Pavialičyć

Inšyja vykanaŭcy hałoŭnych rolaŭ u śpiektakli — biełaruskija studenty, jakich uziali ŭ trupu jašče raniej, u 2021-m.

Na rolu Manteki zaprasili rasijanina Mikałaja Juškieviča. Jamu 58 hadoŭ. Zamiežnymi movami jon praktyčna nie vałodaje (adznačana tolki viedańnie niamieckaj na školnym uzroŭni). Siarod śviežych rabot u kino pieravažajuć sieryjały, apošnim časam u teatry jon nie ihraŭ (viadoma tolki pra jahonuju pracu ŭ adnym z maskoŭskich teatraŭ u siaredzinie 1990-ch).

Pavialičyć

Na rolu žonki Manteki zajaŭlenyja dźvie aktrysy. Adna ź ich — rasijanka Śviatłana Husarava. U 1987-m jana skončyła Jarasłaŭskaje teatralnaje vučylišča. Doŭhija hady była aktrysaj minskaha Maładziožnaha teatra (2000—2017), zatym pracavała ŭ staličnym Novym dramatyčnym. U ich repiertuary ŭ hety pieryjad praktyčna nie było śpiektaklaŭ na biełaruskaj movie.

Rolu Mierkucya ihraje Ilja Hałuškin. Jamu 23 hady. Jon taksama z Maskvy, u 2022-m skončyŭ HITIS, da hetaha ŭ Biełarusi nie pracavaŭ.

Pavialičyć

Na rolu mamki zaprasili rasijanku Inesu Iskakavu. Joj 27 hadoŭ, jana skončyła Jarasłaŭski teatralny instytut. Vałodaje ruskaj i anhlijskaj movami.

Pavialičyć

Taksama ŭ trupie ciapier pracuje i vypusknica maskoŭskaha HITISa Natalla Ščarbakova (u hetym śpiektakli jana nie zaniataja).

Akramia taho, u trupu ŭziali i niekalkich novych biełarusaŭ. Heta Alaksandr Husieŭ, jaki doŭhi čas pracavaŭ u Novym dramatyčnym teatry, i Alena Mazhova — pra jaje viadoma, što ŭ 1998-m syhrała hałoŭnuju rolu Sałamiei Brynickaj u sieryjale «Praklaty ŭtulny dom», a ŭ 2013-m była zaniataja ŭ śpiektaklach niezaležnaha biełaruskaha «Teatra Č».

U epizadyčnaj roli ŭ śpiektakli «Ramea i Džuljeta» zaniataja biełaruska Maryja Kaleśnikovič. Joj 23 hady. Jana skončyła minskuju Akademiju mastactvaŭ jak aktrysa muzyčnaha teatra (a nie dramatyčnaha). U svajoj ankiecie jana pryznavałasia, što ruskaja mova dla jaje rodnaja, a voś biełaruskaj i anhlijskaj dziaŭčyna vałodaje sa słoŭnikam.

Pavialičyć

Miž tym, Kupałaŭski teatr usie hady svajho isnavańnia pracavaŭ na biełaruskaj movie. Kalektyŭ śpiecyjalna zaprašaŭ piedahohaŭ (naprykład, lehiendarnaha dyktara Ilju Kurhana), jakija stavili akcioram vymaŭleńnie i raźbirali moŭnyja niuansy.

Užo paśla publikacyi tekstu z redakcyjaj «Zierkała» źviazaŭsia adzin z rasijskich akcioraŭ, jakija pryjšli na pracu ŭ teatr. Jon zajaviŭ, što jon i jahonyja kalehi nibyta viedajuć biełaruskuju movu:

«Paralelna, pakul repieciravali, vučyli movu i nam dapamahali akciory teatra. Adna z aktrys, piedahoh pa maŭleńni ŭ Akademii i kaledžy mastactvaŭ, dobra viedaje ŭsie praviły i dapamahała nam z vymaŭleńniem. Składana tolki sa słovami, jakija padobnyja da ruskich, i sačyć za Č i H». 

Čytajcie taksama:

Łatuška pra štrejkbrechieraŭ z Maskvy ŭ Kupałaŭskim: Ihrać pa-biełarusku — heta nie tolki mova, heta niabačnaja suviaź z narodam

U Nacyjanalny akademičny teatr imia Janki Kupały nabrali akcioraŭ z Rasii

Minkult akreśliŭ, što treba zrabić artystam z čornych śpisaŭ dla viartańnia na scenu

• 3
• 0
• 5
• 58
• 0
• 3
• 29
• 0