Narcysy, ruža, barvienak — jakija kvietki pasadzić na mohiłkach zamiest płastykavych bukietaŭ
Hetyja kvietki nie tolki bolš ekałahičnyja za płastyk, ale i dapamohuć zmahacca z pustaziellem. Ekałahičnaja arhanizacyja «Ekadom» dzielicca paradami.
Ekołahi suprać. I navat carkva suprać
Płastykavaja kvietka — heta «bukiet» z roznych vidaŭ płastyku. Tam i pienapłast, i łateks, i paliestar, i arhanza… Praz składanaści sartavańnia takuju kvietku niemahčyma ekałahična ŭtylizavać, a značyć, škodnyja rečyvy traplajuć u hlebu, vadu i pavietra.
Štohod na palihony ćviordych bytavych adchodaŭ adpraŭlajecca kala miljona płastykavych kvietak. Termin ich raskładańnia — ad sta da piacisot hadoŭ, druhasnaj pierapracoŭcy jany nie padlahajuć. Bolš za toje, pry spalvańni hetaha śmiećcia ŭ pavietra vykidvajucca ciažkija mietały i dyjaksiny, škodnyja dla zdaroŭja ludziej, asabliva dziaciej.
Pradstaŭniki carkvy taksama pieryjadyčna vykazvajuć niehatyŭnaje staŭleńnie da płastyku na mohiłkach. Pra heta piša i pravasłaŭny partał Sobor.by. Ahulny pasył zvodzicca da taho, što strakatyja, kisłotnyja tony afarmleńnia štučnych bukietaŭ nie supastaŭnyja z atmaśfieraj mohiłak — sakralnaha miesca.
Jakija kvietki pasadzić na mohiłkach?
Žyvyja kvietki na mahile taksama mohuć być praktyčnymi. Słušnaje rašeńnie — vysadzić šmathadovyja raśliny, i mienavita takija, jakija nie patrabujuć asablivych umoŭ dla vyroščvańnia abo dohladu — ustojlivyja da zasuch i marazoŭ. Voś niekalki darečnych varyjantaŭ afarmleńnia ŭčastka na mohiłkach.
Dyvanovyja raśliny
Heta nizkarosłyja kultury, jakija ścielucca pa ziamli. Jany nie tolki pryhožyja, ale taksama dušać pustazielle, a značyć, pracy na mohiłkach stanie mienš. Śmieła možna vysadzić:
- barvienak — moža być z błakitnymi, čyrvonymi, malinavymi kvietkami, jon dobra pieranosić cień i niepatrabavalny da składu hrunta;
- hvaździk travianka — nie raście vyšej za 6 santymietraŭ, kvitnieje malinavymi, čyrvonymi, biełymi abo čyrvona-biełymi kvietačkami amal uvieś siezon. Hałoŭnaje — nie sadzić jaho ŭ hłuchim cieni;
- harlanka paŭzučaja — adna z samych niepatrabavalnych raślin našaj padborki, stvaraje miakki fon, jakim možna dapaŭniać inšyja kvietki;
- ibierys — kvitnieje biełymi kvietkami, zdolny mirycca z častkovym zacianieńniem.
Chmyźniaki
Na mohiłkach možna pasadzić adzinočnyja saliciory. Hety vid raślin čaściej vybirajuć dla ŭpryhožvańnia pierymietra mahiły. Jany pavinny być kampaktnyja i nie mieć hłybokich karanioŭ. Čaściej za ŭsio ludzi abirajuć:
- pładanosnyja — barbarys, šypšyńnik;
- hartenzijevyja — hartenzija, jaźmin;
- chmyźniakovyja ružy — Alexandre Girault, Blushing Bride, Maria Liesa.
Dla ruž nieabchodnaja bolš pažyŭnaja hleba, tamu nie fakt, što jany pryžyvucca na mohiłkach, ale pasprabavać možna: heta spakojnyja, vysakarodnyja kusty.
Siezonnyja kvietki
Pieryjad ćvicieńnia takich raślin prypadaje na peŭny siezon. Tut varyjantaŭ taksama šmat, ale abrać lepš mnahaletniki. Pa tradycyjach, na biełaruskich ziemlach na mohiłkach vysadžvali bratki, adnak heta raślina adnahadovaja, jakaja ŭ nastupnym hodzie nie ŭzydzie.
Kasačy, niezabudki, narcysy, stakrotki — pryhožy, darečny i praktyčny vybar, a apošnija, da taho ž, dobra pryžyvajucca ŭ cieni. Vybirajcie biahonii, prymuły, fijałki, ciulpany — dla viasny; suchaćviet, afanalis i łavandu — dla leta; a ŭvosień kvitniejuć aksamitki i vieras.
«Kali adyści ad kvietak, to dla afarmleńnia mahiły taksama vykarystoŭvajuć dekaratyŭny moch, plušč, nizkarosłyja drevy», — dzielicca «Ekadom».
Kamientary