«Sapraŭdny cud losu»: nievierahodnaja historyja pieršaj sustrečy Lijaniela Miesi i Łamina Jamala
Najlepšy futbalist usich časoŭ i spadkajemca jahonaj roli na pravym fłanhu «Barsiełony» ŭpieršyniu sustrenucca adzin suprać adnaho, kali Arhiencina i Ispanija zhulajuć u niadzielu ŭ finale čempijanatu śvietu. Ale ŭ žyćci jany pieršy raz sustrelisia 19 hadoŭ tamu
Uličvajučy, što Lijanelu Miesi ciapier 39 hadoŭ, a Łaminu Jamalu tolki 19, sam fakt taho, što matč z udziełam abodvuch moža adbycca — nie kažučy ŭžo pra hałoŭny pajadynak suśvietnaha futboła, — śviedčyć pra nievierahodnuju nastojlivaść pieršaha i vyklučny talent druhoha. Adnak heta daloka nie pieršy raz, kali ich šlachi pierasieklisia, piša Bi-bi-si.
Heta adbyłosia jašče ŭ 2007 hodzie, kali 20‑hadovy Miesi tolki zamacavaŭsia ŭ asnoŭnym składzie «Barsiełony», a Łaminu Jamalu było ŭsiaho piać miesiacaŭ.
Hetuju sustreču zachavała sieryja fotazdymkaŭ, zroblenych Žaanam Manfortam.
Fotazdymki znoŭ stali viadomymi dva hady tamu, kali Łamin Jamal dapamoh zbornaj Ispanii vyjhrać Jeŭra-2024.
Tady jaho baćka apublikavaŭ adzin ź ich u sacyjalnych sietkach z podpisam: «Pačatak dźviuch lehiend».
Na zdymkach uśmiešlivy Miesi trymaje na rukach i kupaje maleńkaha chłopčyka, jaki praz hady nievierahodnym čynam pojdzie amal tym samym futbolnym šlacham.
«Heta sapraŭdny cud losu, — raskazaŭ Manfort BBC Sport. — Heta ščaślivy vypadak, kali znachodziš niešta značna bolš asablivaje, čym moh sabie ŭjavić.
Kali b takoje pakazali ŭ filmie, heta vyhladała b nievierahodna».
«Miesi nie mieŭ paniaćcia, što rabić ź niemaŭlom»
Fotasiesija prachodziła ŭ haściavoj raspranalni stadyjona «Kamp Noŭ». Siamja Łamina Jamala trapiła tudy dziakujučy vyjhryšu ŭ konkursie.
Jaho baćki — uradženiec Maroka Munir Nasraŭi i ŭradženka Ekvataryjalnaj Hviniei Šejła Ebana — paznajomilisia ŭžo ŭ Katałonii, kudy abiedźvie ich siemji pierajechali jašče ŭ dziacinstvie.
Łamin Jamal staŭ ich pieršym dziciem. Nieŭzabavie paśla jaho naradžeńnia baćki pryniali ŭdzieł u rozyhryšy, arhanizavanym katałonskaj hazietaj Sport sumiesna sa sponsaram futbołak «Barsiełony» i mižnarodnaj dziciačaj arhanizacyjaj UNICEF.
Pieramožcy atrymlivali mahčymaść zrabić prafiesijnuju fotasiesiju svajho niemaŭla razam z futbalistam asnoŭnaha składu «Barsiełony».
Łamin Jamal akazaŭsia siarod pieramožcaŭ, a ŭ dzień fotasiesii vypadkova byŭ źviedzieny mienavita ź Miesi.
«Da 2024 hoda ja navat nie viedaŭ, što na tych fotazdymkach byŭ Łamin, pakul adzin z maich siabroŭ nie patelefanavaŭ i nie skazaŭ, što jaho baćka apublikavaŭ ich u Instagram», — uspaminaje Manfort.
«Miesi — vielmi zamkniony, ścipły i saramlivy čałaviek. Jon zajšoŭ u raspranalniu, i raptam treba było fatahrafavacca z maleńkim niemaŭlom. Pa jaho tvary było vidać, što jon prosta nie viedaje, što rabić.
Dla maładoha chłopca heta było niaprosta. Ale Łamin byŭ vielmi viasiołym i ŭśmiešlivym dziciem. Jaho maci Šejła dapamahała nam. Jana sama była jašče vielmi maładoj, siamja žyła vielmi ścipła, ale ź imi było vielmi pryjemna pracavać.
Miesi zaŭsiody pavodziŭ siabie prafiesijna ŭ takich situacyjach i vielmi chutka adaptavaŭsia».
«Ja nikoli nie zmahu adpłacić svaim baćkam»
Da svajho 19‑hodździa Miesi zabiŭ 11 hałoŭ na prafiesijnym uzroŭni i pa adnym razie vyjhraŭ čempijanat Ispanii i Lihu čempijonaŭ UEFA.
Łamin Jamal, jakomu ŭ paniadziełak spoŭniłasia 19 hadoŭ, užo zabiŭ 56 hałoŭ, trojčy staŭ čempijonam Ispanii, vyjhraŭ Kubak Ispanii, a taksama staŭ čempijonam Jeŭropy ŭ składzie nacyjanalnaj zbornaj.
Jamal — heta nie proźvišča futbalista, a druhaja častka jaho imia.
Jaho poŭnaje imia — Łamin Jamal Nasraŭi Ebana. Mienavita «Łamin Jamal» napisana na jaho futbołkach u «Barsiełonie» i zbornaj Ispanii — u znak udziačnaści dvum ludziam, jakija dapamahli jaho siamji ŭ ciažki pieryjad paśla jaho naradžeńnia.
Ispanskija ŚMI paviedamlali, što baćka paabiacaŭ nazvać syna ŭ honar dvuch siabroŭ, jakija finansava padtrymali siamju, kali joj było ciažka apłačvać rachunki.
Imia Łamin šyroka raspaŭsiudžana ŭ arabskaj movie i moža aznačać «sumlenny» abo «nadziejny». Jamal — adzin z varyjantaŭ imia Džamal, što pierakładajecca jak «pryhažość» abo «elehantnaść».
Budučy futbalist vyras u rabočym rajonie Rakafonda ŭ horadzie Mataro, za 30 kiłamietraŭ na poŭnač ad Barsiełony.
Hety rajon byŭ pabudavany ŭ 1960‑ch hadach dla pierasialencaŭ ź inšych rehijonaŭ Ispanii. Kali jany pačali pierajazdžać u bolš zamožnyja kvartały, u 1990‑ia hady siudy masava stali pryjazdžać mihranty ź inšych krain.
Paśla niekatorych svaich hałoŭ Łamin Jamal pakazvaŭ palcami žest «3-0-4» — heta paštovy indeks Rakafondy.
«Toje, što zrabili maja mama i moj tata, ja nie zmoh by zrabić ni dla kaho, akramia ŭłasnaha dziciaci, — skazaŭ Jamal u intervju El País padčas turniru. — Kali ŭ ciabie niama hrošaj, vielmi ciažka dapamahčy dziciaci zajmacca futbołam. Ale maje baćki zmahli zrabić tak, kab usio atrymałasia. I ja nikoli nie zmahu im za heta adpłacić».
«Majo serca razryvajecca na dźvie častki»
Dla Žaana Manforta, katałonca i zaŭziatara «Barsiełony», sustreča Miesi i Łamina Jamala na futbolnym poli — idealnaje zaviaršeńnie historyi, jakaja pačałasia amal dva dziesiacihodździ tamu.
«Dumaju, my zaviaršajem cykł ich historyi, — kaža 58‑hadovy Manfort. — Heta ščaślivy finał.
Ja zaŭziatar «Barsiełony», i, na moj pohlad, dla Miesi było b idealna zaviaršyć karjeru, druhi raz vyjhraŭšy čempijanat śvietu. Liču, što jon hetaha zasłuhoŭvaje.
A ŭ Łamina jašče budzie šmat času, kab vyjhrać takija trafiei, jak čempijanat śvietu. Ale ciapier i zbornaja Ispanii, i sam Łamin znachodziacca na ŭzdymie, tamu kali jon pieramoža ŭžo ciapier, hety tytuł budzie kaštavać navat bolš, čym usie jaho papiarednija dasiahnieńni. Mnie vielmi ciažka. Majo serca razryvajecca na dźvie častki», — skazaŭ jon.
Ciapier čytajuć
Były ministr kultury Rusłan Čarniecki znajšoŭ sabie padpracoŭku9
Kamientary