Apieratara telesuflora abvinavacili ŭ vyjhryšy kala 100 tysiač dalaraŭ na staŭkach na źmiest pramoŭ Trampa
Habryel Pieres rabiŭ staŭki na toje, što ŭ vystupach prezidenta ZŠA prahučać peŭnyja słovy.
Rehulatar i amierykanskaja płatforma prahnozaŭ Kalshi rasśledujuć dziejańni Habryela Pieresa, jaki, jak śćviardžajecca, zarabiŭ amal 100 tysiač dalaraŭ, karystajučysia insajdarskaj infarmacyjaj, da jakoj mieŭ dostup jak apieratar telesuflora ŭ Biełym domie, piša Bi-bi-si.
Pieres pracavaŭ u Biełym domie z 2016 hoda. Śćviardžajecca, što jon rabiŭ staŭki na toje, što ŭ vystupleńniach prezidenta Donalda Trampa prahučać peŭnyja słovy.
Hetyja staŭki jon rabiŭ na papularnaj u ZŠA płatformie prahnozaŭ Kalshi. Karystalniki servisu mohuć rabić staŭki na toje, što adbuducca peŭnyja padziei. Kampanija paviedamiła pra dziejańni Pieresa rehulataru — Kamisii pa handli tavarnymi fjučersami (CFTC).
Paviedamlajecca, što rachunak Pieresa ŭ Kalshi byŭ zamarožany, i jon nie paśpieŭ atrymać svoj vyjhryš. Na rachunku znachodziłasia 90 tysiač dalaraŭ.
U kampanii paviedamili Bi-bi-si, što ŭ sakaviku jaje analityki zaŭvažyli niezvyčajnyja staŭki na «rynkach zhadak» — kantrakty, pavodle jakich karystalniki prahnazujuć, što pramoŭca vykarystaje peŭnyja słovy, naprykład nazvy krain, ekanamičnyja terminy abo pieradvybarnyja łozunhi.
«Słovy palityčnych lidaraŭ, takich jak prezidenty abo staršyni Fiederalnaj reziervovaj sistemy, vyklikajuć ruchi na rynkach valut, na rynku naftavych fjučersaŭ i na fondavych rynkach na miljardy dołaraŭ», — adznačyli ŭ Kalshi.
Paśla taho jak kampanija zaŭvažyła niezvyčajnyja staŭki, jana pravieryła profil karystalnika i vyjaviła, što jon źjaŭlajecca fiederalnym słužačym, jaki maje dostup da telesufloraŭ.
Pres-sakratarka Biełaha doma Kerałajn Levit paviedamiła, što prezident viedaje pra hetaha supracoŭnika; jaho adpravili ŭ nieapłatny adpačynak, i jon bolš nie budzie pracavać u Biełym domie.
Fiederalnaja prakuratura na Manchetenie admoviłasia raspačynać kryminalnuju spravu suprać Pieresa.
Ciapier čytajuć
Były ministr kultury Rusłan Čarniecki znajšoŭ sabie padpracoŭku9
Kamientary