«Try muškieciory: D’Artańjan»: badzioraja ekranizacyja z pryhodnickim ducham i zornym akciorskim składam
Ekranizacyj ramana Dziuma naźbirałasia bolš za sotniu. Ale viersiju Martena Burbułona, jakaja vyjšła ŭ krasaviku, nazyvajuć adnoj z samych udałych — dziakujučy napoŭnicu vykarystanym sučasnym mahčymaściam zdymki, dynamičnamu tempu, zachaplalnym scenam bajoŭ i ŭdała padabranym akcioram — navat na druhasnyja roli.
Kali vy zabylisia ci nie viedajecie, što dziejecca ŭ tvory Dziuma, to kanva prykładna takaja: na dvare 1627 hod, i karol Ludovik XIII (Łui Harel) spadziajecca praduchilić hramadzianskuju vajnu z pratestantami, jakija płanujuć zrynuć katalickuju manarchiju. Jon nie moža daviarać svajmu ŭpłyvovamu daradcu kardynału Ryšeljo (Eryk Ruf), a taksama nie maje peŭnaści, što moža daviarać svajoj karalevie Hańnie Aŭstryjskaj (Viki Kryps), jakaja, pa čutkach, maje suviaź z sumnieŭnym anhielskim arystakratam — hiercaham Bekinhiemskim.
Treba skazać, što karol maje racyju. Niejmavierna pryhožaje dyjamientavaje kalje Hanny — jaho padarunak karalevie — zdajecca, kudyści źnikła. Siarod prydvornych chodziać čutki, što Hanna padaryła jaho anhielskamu arystakratu na pamiać — i prydvornyja nie pamylajucca.
Muškieciory buduć pavinny dabracca da Anhlii, kab zabrać kalje i karaleva zmahła nadzieć jaho na viasielle brata karala. Heta adna sa šmatlikich siužetnych linij knihi, jakija paŭstanuć u filmie.
Słavalubnaha D'Artańjana hraje Fransua Sivil, Atosa — Viensan Kasiel, Partosa — Pio Marmaj, Aramisa — Ramen Dziurys. Dadajcie da hetaha Jevu Hryn u roli tajamničaj i vynachodlivaj lichadziejki Miledzi, jakaja pa-zalichvacku kuryć trubku z doŭhim muštukom, — i stanovicca zrazumieła, što na ekranie zaŭsiody jość chtości talenavity, čyja hulnia prasoŭvaje historyju napierad. Film Martena Burbołona całkam nabity talentami — navat druharadnyja piersanažy syhrany bliskuča.
Da taho ž, nivodnaja papiaredniaja ekranizacyja «Troch muškiecioraŭ» nie mieła ŭ svaim rasparadžeńni stolki techničnych dasiahnieńniaŭ. Jość doŭhija imiersiŭnyja kadry, padčas jakich hladač pačuvajecca tak, jak byccam jon unutry dziejańnia. Bajavyja sceny, što trymajuć u napružańni i ŭražvajuć vynachodlivaściu pastanoŭščykaŭ, časta źniatyja adnym dublem — heta taksama daje adčuvańnie, što hladač — sam siarod taho, što dziejecca na ekranie.
Usie dekaracyi ŭ filmie vyhladajuć davoli naturalna — pałacy takija, byccam u ich sapraŭdy doŭhija hady žyli ludzi. Heta ž datyčyć i kaściumaŭ — naprykład, forma muškiecioraŭ miescami pakamiačanaja, ćmianaja i panošanaja.
Adnak hałoŭnaja pieravaha filma — heta pradumanaść i stylovaja vytrymanaść jaho adaptacyi. Štości zachavana jak u ramanie, ale režysior rasparadžajecca z aryhinałam jak choča — a mienavita prybiraje składanyja palityčna-relihijnyja razvažańni i ŭzmacniaje dynamiku, hareźlivaść i chulihanstva. Takim čynam, novaja viersija «Muškiecioraŭ» pieratvarajecca ŭ sucelnuju šalona-zachaplalnuju avanturu.
Razbłytvańnie mnohich siužetnych linij i dramatyčnyja padziei adkładzienyja da druhoj častki filma («Try muškieciory: Miledzi»), jakaja vyjdzie sioleta ŭ śniežni.
Čytajcie jašče:
Vyjšaŭ trejler filma pra muškiecioraŭ ź Viensanam Kasielem i Jevaj Hryn
Pra što sieryjał BEEF («Hryźnia»), jaki ŭsie nazyvajuć krutym?
HBO zapuskaje sieryjał pra vydumanuju aŭtarytarnuju dziaržavu va Uschodniaj Jeŭropie
Ciapier čytajuć
Ad BNF da HRU. Chto takaja Natalla Sudlankova, jakoj čechi zahadali pakinuć krainu25
Kamientary