Jamu vybili čatyry zuby, a paśla vykinuli z krainy. Ciapier byłoha palitviaźnia aryštavali ŭ Łatvii z šaściu mihrantami ŭ mašynie
Praź niapoŭnyja vosiem miesiacaŭ paśla vyzvaleńnia ź biełaruskaj kałonii Jaŭhiena Siamionava znoŭ aryštavali — ciapier užo ŭ Łatvii. U jaho aŭtamabili znachodzilisia šaściora mihrantaŭ biez dakumientaŭ.
8 maja 2026 hoda ŭ Łatvii spynili aŭtamabil, u jakim jechali šaściora ludziej biez dakumientaŭ. Za rulom byŭ hramadzianin Biełarusi. Jaho imia łatvijskija siłaviki nie nazyvali. Jak stała viadoma «Našaj Nivie», zatrymany — 40‑hadovy minčuk Jaŭhien Siamionaŭ, były palitviazień, jakoha ŭ vieraśni 2025 hoda vyzvalili ź biełaruskaj kałonii i prymusova vyvieźli ŭ Litvu.
Na svabodzie jon pravioŭ mienš za vosiem miesiacaŭ.
Mašyna rabiła dziŭnyja manieŭry
Ranicaj 8 maja vajskoŭcy łatvijskaj terytaryjalnaj abarony Zemessardze zaŭvažyli ŭ Prejlskim krai padazrony aŭtamabil. Mašyna rabiła dziŭnyja manieŭry na darozie. Vajskoŭcy prasačyli za joj, pakul aŭtamabil nie spynili supracoŭniki Dziaržaŭnaj palicyi.
Za rulom znachodziŭsia hramadzianin Biełarusi. U sałonie — šaściora ludziej «azijackaha pachodžańnia», jak sfarmulavała Dziaržaŭnaja pamiežnaja achova Łatvii. U ich nie było prajaznych dakumientaŭ, viz i dazvołaŭ na žycharstva.
Suprać biełarusa raspačali kryminalny praces pavodle častki 3¹ artykuła 285 Kryminalnaha zakona Łatvii — niezakonnaje pieramiaščeńnie ludziej praź dziaržaŭnuju miažu ŭ čas uzmocnienaha režymu jaje achovy. Takija dziejańni mohuć karacca pazbaŭleńniem voli na termin ad dvuch da dziesiaci hadoŭ, z mahčymaj kanfiskacyjaj majomaści.
Publična łatvijskija ŭłady nie paviedamlali ni imia zatrymanaha biełarusa, ni jaho dalejšy pracesualny status.
Piać hadoŭ za kamientary, kradziež i ŭcioki z «chatniaj chimii»
Jaŭhien Siamionaŭ naradziŭsia ŭ 1986 hodzie, žyŭ u Minsku. Da źniavoleńnia pracavaŭ sacyjalnym rabotnikam — u dziaržaŭnaj słužbie pa dapamozie pažyłym ludziam i ludziam ź invalidnaściu.
Jaho aryštavali 26 lutaha 2021 hoda. Padstavaj stali dva kamientary, jakija jon pakinuŭ u telehramie jašče ŭ śniežni 2020-ha. Pavodle materyjałaŭ spravy, Siamionaŭ apublikavaŭ piersanalnyja źviestki supracoŭnikaŭ HUBAZiKa Ivana Tarasika i Alaksandra Aloksy, dadaŭšy abraźlivy kamientar i słovy, jakija śledstva paličyła pahrozaj. Abodvuch siłavikoŭ Mikoła Dziadok paźniej nazyvaŭ datyčnymi da katavańniaŭ paśla svajho zatrymańnia.
Akramia hetaha, Siamionava sudzili jašče pa 11 epizodach kradziažu ŭ svajoj znajomaj (č.1 i č. 2 art. 205 KK) i za ŭchileńnie ad adbyćcia chatniaj chimii, jakuju jon raniej atrymaŭ pavodle narkatyčnaha artykuła 328.
7 lipienia 2021 hoda sud Savieckaha rajona Minska asudziŭ jaho na piać hadoŭ kałonii. Akramia taho, mužčyna musiŭ vypłacić 8150 rubloŭ kampiensacyi. Pravaabaroncy pryznali Jaŭhiena Siamionava palitviaźniem.
Paśla zatrymańnia zastaŭsia biez čatyroch piarednich zuboŭ
Siamionava jak recydyvista adpravili ŭ vaŭkavyskuju kałoniju №11. Tam jon paznajomiŭsia ź jašče adnym palitviaźniem — Paŭłam Vinahradavym.
«Heta byŭ ci nie pieršy palityčny, z kim ja parazmaŭlaŭ na zonie. My žyli ŭ adnym baraku. Ale šmat kamunikavać nie atrymlivałasia: ja pieravažna siadzieŭ u izalatary, a tam asabliva nie pahavoryš», — raspavioŭ «Našaj Nivie» Pavieł Vinahradaŭ.
Abodvuch vazili ŭ aršanskuju turemnuju balnicu z padazreńniem na suchoty. U Siamionava tubierkuloz nie paćvierdziŭsia, tamu jaho viarnuli ŭ Vaŭkavysk.
Kali Pavieł Vinahradaŭ upieršyniu ŭbačyŭ Jaŭhiena, u taho nie było čatyroch piarednich zuboŭ.
«Jon raskazvaŭ, što padčas zatrymańnia ich vybili prykładam aŭtamata. Udar pa skivicy byŭ surjozny, paźniej pačali vypadać i astatnija zuby. Užo paśla vyzvaleńnia jon paśpieŭ usio adramantavać», — kaža Pavieł.
Na zonie Siamionaŭ, pavodle jaho, asabliva nie vyłučaŭsia: jak i mnohija palityčnyja, pieryjadyčna traplaŭ u štrafny izalatar. Pry hetym dobra viedaŭ anhlijskuju, lohka znajomiŭsia ź ludźmi i ŭmieŭ padtrymlivać razmovu.
«U jaho davoli prakačanyja soft-skiły. Pryjemny ŭ kamunikacyi čałaviek. Na 23 lutaha jon padaryŭ mnie pačak aŭsianaha piečyva sa słovami: «Nu ty ž abaronca Ajčyny», — uzhadvaje Pavieł.
«Ja ŭsio adno źbiraŭsia za miažu»
11 vieraśnia 2025 hoda biełaruskija ŭłady vyzvalili 52 palitviaźniaŭ. Ich pasadzili ŭ aŭtobusy i biez dakumientaŭ vyvieźli ŭ Litvu. Siarod departavanych byli Pavieł Vinahradaŭ i Jaŭhien Siamionaŭ. U aŭtobusie jany jechali pobač.
«Ženiu radavaŭ toj fakt, što jaho adrazu vyvoziać za miažu. Da kanca terminu jamu zastavałasia niekalki miesiacaŭ, i jon kazaŭ, što paśla vyzvaleńnia ŭsio adno źbiraŭsia źjazdžać», — raskazvaje Pavieł.
U Litvie Siamionaŭ sprabavaŭ pačać žyćcio nanova. Dvojčy ŭładkoŭvaŭsia na nieaficyjnuju pracu — imavierna, na budoŭlu. I dvojčy, pavodle Vinahradava, nie atrymaŭ zaroblenych hrošaj. Paśla hetaha vyrašyŭ šukać niešta inšaje.
«Jon kazaŭ: «U taksi ŭładkujusia, budu vazić ludziej». Pracu jon, vidać, znajšoŭ», — kaža Pavieł Vinahradaŭ.
«Naša Niva» — bastyjon biełaruščyny
PADTRYMAĆCiapier čytajuć
U biełaruski ŭ Italii zabrali dvuch synoŭ — bo jana nie pryznavała dziaržavu i nie adpuskała dziaciej u škołu i da doktara11
Kamientary