2 291 čałavieka pravaabaroncy pryznali palityčnym źniavolenym. «Viasna» pryvodzić ličby troch hadoŭ palityčnych represij
Užo try hady situacyja z pravami čałavieka ŭ Biełarusi zastajecca žachlivaj. Tysiačy čałaviek prajšli praź źniavoleńnie, dziasiatki tysiač biełarusaŭ byli vymušanyja pakinuć krainu praz represii. Pa infarmacyi pravaabaroncaŭ, ahułam amal za try hady z kryminalnym pieraśledam sutyknulisia nie mieniej za 4 300 čałaviek. Prama ciapier u źniavoleńni ŭ žudasnych umovach utrymlivajucca nie mienš za 1 525 palitźniavolenych. «Viasna» da Dnia palitviaźniaŭ Biełarusi pryvodzić ličby pa situacyi z palityčnymi źniavolenymi za try hady bieśpierapynnych represij.
31 traŭnia 2020 hoda pravaabarončaja supolnaść pryznała błohiera Siarhieja Cichanoŭskaha palityčnym źniavolenym. Jon staŭ pieršym palitviaźniem za padziei 2020 hoda.
Z taho času za amal try hady pravaabaroncami było pryznana palitźniavolenymi jašče 2 290 čałaviek. Ahułam byli pryniatyja 302 zajavy ab pryznańni ludziej palityčnymi źniavolenymi.
Na 21 traŭnia 2023 hoda ŭ Biełarusi naličvajecca 1 525 palitźniavolenych, kožnaja 10-ja ź jakich — žančyna.
Usie jany ŭtrymlivajucca ŭ niečałaviečych umovach. Palitviaźniaŭ faktyčna ŭtrymlivajuć u režymie «inkamunikada», nie akazvajuć miedycynskuju dapamohu, pazbaŭlajuć prava na abaronu, zakidvajuć u karcary i štrafnyja izalatary, dzie stvoranyja śpiecyjalnyja ŭmovy, jakija sami palitviaźni nazyvajuć katavalnymi.
Svajaki i blizkija ludzi niekatorych viaźniaŭ miesiacami nie atrymlivajuć źviestak pra stan ich rodnych. Dziasiatki čałaviek znachodziacca ŭ źniavoleńni z surjoznymi zachvorvańniami, tamu pryznačanyja terminy mohuć stać dla ich pažyćciovymi, jak heta zdaryłasia z chvorym na serca Mikałajem Klimovičam, jaki 5 traŭnia pamior u viciebskaj kałonii №3.
Na siońniašni dzień u miescach niesvabody ŭtrymlivajucca dzieviać padletkaŭ, jakim na momant zatrymańnia nie było 18 hadoŭ: Mikita Załataroŭ, Siarhiej Hackievič, Eduard Kudyniuk, Maksim Imchavik, Ivan Paciajčuk, Dzianis Chaziej, Alaksandr Viniarski, Pavieł Piskun, a taksama Arciom Vajciachovič, jakomu jašče niama navat 16 hadoŭ.
Dva hady tamu, 21 traŭnia 2021 hoda, u śpisie palitviaźniaŭ było 404 čałavieki — heta ŭ čatyry razy mienš, čym siońnia.
Heta śviedčyć ab tym, što represii praciahvajucca štodzionna ciaham užo 1 096 dzion.
Kožny miesiac niekalki dziasiatkaŭ palitviaźniaŭ vychodziać ź miescaŭ źniavoleńnia pa zakančeńni terminu. Pa dadzienych pravaabaroncaŭ «Viasny», na volu vyjšli nie mienš za 364 palitviaźni.
Z 2020 hoda z kryminalnym pieraśledam pa palityčnych matyvach sutyknulisia nie mieniej za 4 300 čałaviek.
Pravaabaroncam viadoma pra minimum 854 čałavieki, jakija byli asudžanyja biełaruskimi sudździami da «chatniaj chimii».
Naŭprost ciapier u papraŭčych ustanovach adkrytaha typu («chimija») znachodziacca 254 palityčnyja viaźni. Viadoma, što tam na ich akazvajecca cisk: da ich pryjazdžajuć siłaviki, praviarajuć telefony, źbivajuć, adpraŭlajuć na «sutki», a suprać niekatorych paśla hetaha ŭzbudžajuć novyja kryminalnyja spravy.
Pravaabaroncy zaklikajuć praciahvać padtrymlivać kožnaha i kožnuju, chto sutyknuŭsia z palityčnym pieraśledam. Nie pakidajcie ludziej sam-nasam z represijami, bo siła biełarusaŭ — u salidarnaści!
Ciapier čytajuć
Uvodziać adkaznaść za prapahandu homaseksualnaści, biaździetnaści, a taksama za niezakonnaje pradstaŭleńnie Biełarusi na mižnarodnaj arenie13
Kamientary