Sud razhledzić spravu «ab źmienie prymusovaha lačeńnia» ŭ dačynieńni da Maryi Uśpienskaj, udavy Andreja Zielcera
U Minharsudzie 16 červienia ŭ zakrytym režymie razhledziać spravu «ab źmienie prymusovych mier biaśpieki i lačeńnia» ŭ dačynieńni da ŭdavy zahinułaha ŭ pierastrełcy z supracoŭnikam KDB ajcišnika Andreja Zielcera Maryi Uśpienskaj, paviedamlajuć pravaabaroncy.
Pavodle art. 103 Kryminalnaha kodeksa, rašeńnie prymajecca sudom na padstavie zaklučeńnia psichijatryčnaj miedyčna-kansultacyjnaj kamisii, jakuju asudžanyja musiać prachodzić nie mienš za adzin raz na paŭhoda.
Rašeńnie pa spravie budzie prymać sudździa Valancina Ziańkievič.
Roŭna hod tamu sudździa Ziańkievič pryznačyła Maryi prymusovaje lačeńnie ŭ psichijatryčnym stacyjanary. Lačycca jana budzie da vyzdaraŭleńnia — termin nie ŭstanaŭlivajecca sudom.
Uśpienskuju abvinavacili ŭ saŭdziele ŭ zabojstvie supracoŭnika KDB Dźmitryja Fiedasiuka, ale vyzvalili ad kryminalnaj adkaznaści, bo jana znachodziłasia ŭ «stanie biesśviadomaści».
Andrej Zielcer 28 vieraśnia 2021 hoda va ŭłasnaj kvatery zastreliŭ supracoŭnika KDB Dźmitryja Fiedasiuka i byŭ zastreleny ŭ adkaz, zhodna z aficyjnaj viersijaj. Bolš za sotniu čałaviek tak ci inakš paciarpieli ŭ suviazi z hetaj spravaj, bolšaść — za kamientary ŭ padtrymku Andreja Zielcera.
Kamientary