Cichanoŭskaja raskazała, čaho čakaje ad samitu NATA dla Biełarusi
Padčas sajd-iventu pa Biełarusi, jaki prajšoŭ na palach samitu NATA ŭ Vilni, Śviatłana Cichanoŭskaja zakranuła pytańni rasijskaha ŭpłyvu ŭ rehijonie, padtrymki dla biełarusaŭ, supracy z NATA i budučych vybaraŭ.
Cichanoŭskaja zaklikała mižnarodnuju supolnaść trymać Biełaruś u fokusie.
«My nie pavinny bajacca supraćstajać rasijskim intaresam u našym rehijonie. Mienavita Rasija vybrała šlach kanfrantacyi. My nie pavinny dazvolić pucinskaj Rasii pazbavić biełaruski narod mahčymaści vybrać jeŭrapiejski šlach raźvićcia», — skazała Cichanoŭskaja.
Jana dadała, što ŭžo ciapier možna pačać supracoŭnictva pamiž NATA i demakratyčnaj Biełaruśsiu ŭ ramkach prahramy «Partniorstva ŭ imia miru».
«My taksama možam stvaryć kansultatyŭnuju hrupu pamiž NATA i demakratyčnymi siłami, jak heta było zroblena ź ES. Heta mahło b stać płatformaj dla abmienu idejami i vypracoŭki ahulnych stratehij», — dadała Cichanoŭskaja.
Palityk taksama adznačyła, što, abmiarkoŭvajučy trybunał dla Pucina, śviet nie pavinien zabyvać pra Łukašenku. «Jon złačyniec, a nie prezident. Vydača ordara na jaho aryšt stała b mocnym pasłańniem biełaruskamu narodu i spryjała b raskołu elity».
Jana vykazała čakańnie, što abnadziejvańnie biełarusaŭ mahło b stać adnym sa stanoŭčych vynikaŭ samitu NATA.
Ministarka zamiežnych spraŭ Isłandyi Tordzis Hilfadocir adznačyła, što mižnarodnaja supolnaść musić dapamahać hramadzianskaj supolnaści Biełarusi, niezaležnym miedyja. «Heta naš abaviazak zrabić ich baraćbu našaj baraćboj», — adznačyła jana.
«Heta nacyja, jakaja zasłuhoŭvaje być volnaj, demakratyčnaj i być u jeŭrapiejskaj siamji», — vykazaŭsia namieśnik ministra zamiežnych spraŭ Litvy Mantas Adomienas, jaki dla siońniašniaj dyskusii abraŭ sinia-žoŭty halštuk.
Prahučała pytańnie pra status Biełarusi — ci ŭ budučym jaho bačać niejtralnym, ci kraina budzie ŭ NATA.
Cichanoŭskaja adkazała, što lubyja razmovy pra ŭdzieł Biełarusi ŭ NATA ci inšych abjadnańniach zaŭčasnyja. Spačatku pavinny adbycca demakratyčnyja źmieny, a paśla svoj vybar musić zrabić narod Biełarusi.
Kažučy pra niadaŭni miaciež Pryhožyna, Cichanoŭskaja adznačyła, što padčas jaho demakratyčnyja siły atrymlivali šmat paviedamleńniaŭ znutry Biełarusi, što ludzi hatovyja da dziejańniaŭ, čakajuć ukazańniaŭ.
Cichanoŭskaj zadali pytańnie pra jaje bačańnie vybaraŭ, jakija ŭ 2024—2025 hadach pavinny adbycca ŭ Biełarusi.
«My budziem vykarystoŭvać tak zvanyja parłamienckija vybary, kab mabilizavać ludziej», — skazała Cichanoŭskaja.
Ale zaŭvažyła, što, kali situacyja zachavajecca takoj ža, jak ciapier, kali palitviaźni zastajucca ŭ turmach, prezidenckich vybaraŭ nie pavinna być naohuł.
U razmovie z žurnalistami Cichanoŭskaja adznačyła, što padčas mižnarodnych sustreč jany nie pačuli pa jadziernaj zbroi, jakuju płanujuć raźmiaścić u Biełarusi, mocnaj reakcyi z boku sajuźnikaŭ. «Bo dla ich niama roźnicy, ź jakoha boku jana prylacić», — udakładniła jana.
Pa pytańni palitviaźniaŭ Śviatłana Cichanoŭskaja nahadała, što ich stratehija — cisk na režym i dapamoha ludziam.
«Kuplać — spracuje na adnaho-dvuch čałaviek, ale ž tam tysiačy siadziać», — vykazała jana svaju dumku nakont prapanoŭ «vytarhavać» palitviaźniaŭ.
Ciapier čytajuć
«Ja byŭ u takoj dupie, ale pahladzicie na mianie». Staŭki daviali biełarusa da dna — jon raskazvaje, jak vybraŭsia nazad3
Kamientary