«Cudoŭnaje śviata naroda, jaki pakutuje ŭ cišyni». Arcybiskup Hudžeroci raskazaŭ pra svoj niadaŭni vizit u Biełaruś
Novapryznačany kardynał Kłaŭdya Hudžeroci ŭ intervju vydańniu Vatican News padzialiŭsia svaimi ŭražańniami ad uračystaści z nahody 25-hodździa karanacyi abraza Maci Božaj Budsłaŭskaj, a taksama vykazaŭsia pra prablemy ŭsiaho našaha rehijona.
Zhadvajučy svoj dośvied, nabyty na dypłamatyčnaj słužbie ŭ Biełarusi, Ukrainie i Hruzii, dzie jon byŭ nuncyjem, Kłaŭdya Hudžeroci źviarnuŭ uvahu na składanyja histaryčnyja pryčyny, jakija stajać za padziejami ŭ hetych rehijonach. Na jaho dumku, ludzi na zachadzie ŭ svaich «sproščanych» kamientarach hetych padziej časta abmiažoŭvajucca siońniašnim dniom.
«Na ŭschodzie ž, kali vy chočacie zrazumieć siońnia, vy pavinny zrazumieć učora», — ličyć ijerarch. Na jaho dumku, na Zachadzie nie adbyłosia ŭśviedamleńnia, hłybokaha asensavańnia padzieńnia Savieckaha Sajuza, novych šlachoŭ, jakija adkrylisia paśla jaho raspadu, i trahiedyj, jakoje pieražyvała miascovaje nasielnictva.
Padzieńnie Bierlinskaj ściany vyklikała vialiki entuzijazm u suviazi sa zdabytaj svabodaj, ale pry hetym nie ŭličvałasia, što ludzi stracili ŭsie hrošy i byli vymušanyja hadzinami stajać u čarzie, kab atrymać kavałak chleba. Hetaja vielmi składanaja situacyja, na dumku kardynała, ahaliła niervy byłych savieckich ludziej i pryviała da adradžeńnia nacyjanalizmu, kanfrantacyi, ekanamičnych ciažkaściaŭ, fienomienu aliharchaŭ.
Svoj niadaŭni vizit u Biełaruś u jakaści śpiecyjalnaha pasłańnika Franciška na śviatkavańnie 25-j hadaviny karanacyi cudatvornaha abraza Maci Božaj Budsłaŭskaj ijerarch prakamientavaŭ tak:
«Cudoŭnaje śviata naroda, jaki pakutuje ŭ cišyni i jaki znajšoŭ u viery takuju vidavočnuju, na moj pohlad, moc śviedčańnia».
Pa jaho słovach, hetaja ścipłaja vyjava Maci Božaj stała dla biełarusaŭ «znakam identyčnaści i nadziei».
Jon byŭ asabliva ŭražany tym, što ŭ rehijonie, dzie susiednija narody zmahajucca adzin z adnym, niekalki tysiač čałaviek išli pieššu pa lasach, siarod azior, pa składanych darohach, malilisia na kaleniach i prajaŭlali salidarnaść adno z adnym. Blizkaść Papy dazvalaje im adčuć, što pra ich nie zabylisia, jak adznačyŭ arcybiskup Hudžeroci.
Čytajcie taksama:
Pieramoŭnik pa Biełarusi arcybiskup Hudžeroci staŭ kardynałam
Arcybiskup Hudžeroci pryznaŭsia ŭ Budsłavie, što za miažoj vielmi sumavaŭ pa biełaruskich dranikach
RPC zapatrabavała ad papskaha pasłańnika abmiežavać dziejnaść unijataŭ u Biełarusi
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»5
Kamientary