«Jany nazvalisia CRU horada Minska». SK śćviardžaje, što «ašukancy z Ukrainy» prymušajuć nie tolki brać kredyty, ale i čynić terakty
SK zajaŭlaje, što «ŭkrainskija telefonnyja machlary» spačatku vymahajuć hrošy ŭ biełarusaŭ, a potym šturchajuć na ździajśnieńnie ciažkich złačynstvaŭ, u tym liku terarystyčnych aktaŭ.
Pavodle SK, žančyna, jakaja padpaliła siarod dnia milicejski aŭtamabil u Hrodnie, dziejničała pa ŭkazańni telefonnych ašukancaŭ.
Abvinavačanaja, jak śćviardžaje SK, raskazała, što łžesupracoŭnik banka źviazaŭsia ź joj pa telefonie za paŭhoda da padpału i pierakanaŭ pryniać udzieł u «śpiecapieracyi» pa vykryćci niadobrasumlennych supracoŭnikaŭ finansavaj ustanovy. Jaje pierakanali pieravieści na rachunak ašukancaŭ bolš za 200 tysiač rubloŭ.
Dla hetaha jana pradała kvateru.
Potym joj pačali telefanavać «supracoŭniki pravaachoŭnych orhanaŭ». Jany rastłumačyli žančynie, što jana stała achviaraj padmanu, ale jość mahčymaść viarnuć kvateru.
«Łžepravaachoŭnik pierakanaŭ zasmučanuju žančynu, što znachodzicca ŭ Minsku i dla taho, kab jon pryjechaŭ u Hrodna razabracca ŭ jaje biadzie, nieabchodna ździejśnić radykalnyja dziejańni — padpalić słužbovy aŭtamabil supracoŭnikaŭ milicyi. Abaviazkovaja ŭmova — fota– i videaspravazdača zroblenaj dyviersii», — raskazali ŭ SK historyju z sumnieŭnaj łohikaj.
Žycharka Hrodna vykanała ŭsio, pra što jaje prasili, ale paškodžańni aŭtamabila byli nibyta niedastatkovymi. Ad jaje zapatrabavali davieści spravu da kanca. U vyniku žančynu, pavodle SK, niejkim čynam zatrymali, kali jana skiravałasia na zapraŭku pa bienzin.
Jašče adzin padobny vypadak zdaryŭsia ŭ Vilejcy. 42-hadovy žychar horada pa prośbie ašukancaŭ uziaŭ kredyty na 19 tysiač rubloŭ i pieravioŭ im hrošy.
Potym jaho pierakanali padpalić adździaleńnie banka ŭ Maładziečnie, bo jakraz tam znachodziacca machlary, jakija vykrali jaho hrošy.
«Jany nazvalisia CRU horada Minska», — kaža na videa SK paciarpieły-padazravany z zabluranym tvaram i sa źmienienym hołasam.
Pavodle jaho apoviedu, jon nie chacieŭ padpalvać bank, ale jamu skazali, što ŭ Maładziečnie ŭ ich «svoj čałaviek», i pahražali zastrelić. «Ja bajaŭsia», — kaža, pavodle SK, žychar Vilejki.
«Dla ździajśnieńnia ciažkaha złačynstva fihurant adpraviŭsia ŭ susiedni rajonny centr, adnak schiema ašukancaŭ pajšła nie pa płanie: mužčyna admoviŭsia vykonvać ich ukazańni. Afierystam pryjšłosia impravizavać, pad roznymi pahrozami jany prymusili mužčynu padpalić aŭtamabil, jaki stajaŭ pobač z bankam, a taksama kamieniem raźbić jašče adzin transpartny srodak, paśla čaho pierastali vychodzić na suviaź. Žychara Vilejki zatrymali praź niekalki dzion, i ciapier jon fihurant kryminalnaj spravy», — dadali ŭ SK.
U Baranavičach ašukancy pierakonvali 43-hadovuju žančynu padpalić budynak vajenkamata. Pierad hetym jana pieraviała machlaram bolš za 33 000 biełaruskich rubloŭ. Adnak padpalvać vajenkamat jana admoviłasia.
Jak zapeŭnivaje SK, va ŭsich vypadkach biełarusam telefanavali z Ukrainy «pad kuratarstvam Zachadu».
«Chaciełasia b adznačyć, što ŭ dziejańniach dyviersantaŭ ukrainskich call-centraŭ, jakija kuryrujuć na Zachadzie, vidać prykmiety asabliva ciažkaha złačynstva, za jakoje hałoŭnym Zakonam Respubliki Biełaruś praduhledžvajecca vyšejšaja miera pakarańnia», — piša SK.
U jakaści dokazu, što biełarusy stali achviarami ŭkraincaŭ, u videa SK havorycca, što surazmoŭcy razmaŭlali z ukrainskim akcentam i ŭklučali himn Ukrainy.
Kamientary