Čarhovaja žančyna zaŭvažyła mabilnik, pakinuty na palicy i raźviernuty da jaje kamieraj. A ŭ im — halereju z zapisami taho, jak raździavajucca papiarednija klijentki. «Takoha bolš nie paŭtarycca», — zapeŭniŭ masažyst. Ale sacsietki ŭžo nie spynić
Minskaja doktarka Natalla Čajkoŭskaja vyrašyła schadzić na masaž. Znajšła kabiniet u zručnym dla siabie miescy — kala stancyi mietro «Instytut kultury», na trecim paviersie Doma bytu. Vybrała volnaje akienca ŭ masažysta Andreja i pryjšła na sieans.
A kali pačała raździavacca ŭ pustym kabiniecie, raptam zaŭvažyła schavany mabilny telefon. Jon lažaŭ tak, kab žančyna traplała ŭ abjektyŭ kamiery.
Doktarka sfatahrafavała schavany hadžet, a potym pačała hladzieć jaho halereju: «U kadry była ja. Hołaja. Šok! Ja vydaliła videa sa mnoj».
U halerei mabilnika žančyna, ź jaje słoŭ, znajšła šmat videa z papiarednimi klijentkami — taksama hołymi i jakija taksama naŭrad ci viedali, što ich zdymajuć.
Aburanaja doktarka vydaliła svajo videa i paklikała masažysta — razmovu ź im jana zapisała, ale samoha Andreja nie vidać, čuvać tolki hołas.
Mužčyna na zapisie chvalujecca i nie moža ŭciamna patłumačyć, navošta schavaŭ telefon z uklučanaj kamieraj. Potym vydaje: «Dy nie, heta niejkaja pamyłka». U hołasie ŭžo čuvać niekatoruju niervovaść.
Natalla zapatrabavała vydalić svajo videa taksama z papki «Niadaŭna vydalenaje». Andrej nie staŭ spračacca i zrabiŭ heta.
Žančyna ŭ hety momant aburajecca: «Voś tut ja, hołaja. Pryjšła na masaž, pieraadziavajusia. Vy vyčvareniec?!». Andrej adkazvaje: «Nie. Takoha bolš nie paŭtorycca».
Ale ž Natalla nie pavieryła: «Paŭtorycca! Surjoznyja prablemy ŭ vas buduć. Daremna vy heta zrabili».
Doktarka napisała zajavu ŭ milicyju i spadziajecca, što atrymajecca pakarać masažysta. Historyju jana apisała ŭ tredsach.
Juryst, ź jakim parazmaŭlała «Naša Niva», adznačaje, što Natalla zrabiła pamyłku, kali prymusiła masažysta vydalić videa z saboj. Pryčym nie tolki vydalić, a całkam začyścić jaho na telefonie. Dakazać, što videa nasamreč było, budzie ciažka — asabliva kali masažyst budzie nastojvać, što adbyłasia niejkaja pamyłka, i nasamreč jon ničoha nie zdymaŭ. Taksama ŭ jaho zastaŭsia čas, kab vydalić usie papiarednija videa.
Na dumku jurysta, kali masažyst budzie adpiracca da apošniaha, to całkam mahčyma, što dakazać jaho vinu nie ŭdasca.
Što da jurydyčnaj traktoŭki, to ŭ apisanaj situacyi havorka moža iści jak pra administratyŭny pratakoł za niezakonny zbor piersanalnych danych (z raspaŭsiudam ci biez, maksimalny štraf — 9000 rubloŭ), tak i pra kryminalnuju spravu pa art. 203‑1 («Niezakonnyja dziejańni ŭ dačynieńni da infarmacyi pra pryvatnaje žyćcio i piersanalnych danych»). Tut pakarańnie (u vypadku kali budzie dakazany raspaŭsiud) moža dasiahać troch hadoŭ kałonii.
Natalla tym časam raić žančynam być uvažlivymi. «Kali vy chodzicie na masaž, dyk praviarajcie kabiniet. Hladzicie na palicy. Na telefon. Na lubuju techniku, jakaja padajecca vam dziŭnaj. Vaša cieła — heta nie kantent dla čužoha archiva», — napisała jana ŭ sacsietkach.
Masažyst Andrej, darečy, taksama apieratyŭna adreahavaŭ na hety kanflikt. Spačatku jon pačaŭ šukać miesca dla pierajezdu i navat zapuściŭ apytańnie ŭ svaim instahramie — ci zručna budzie klijentam pryjazdžać pa novym adrasie.
Paśla taho, jak Natalla apubličyła situacyju ŭ sacsietkach, mužčyna ŭvohule vydaliŭ svoj pracoŭny instahram.
A voś što Andrej raniej raskazvaŭ pra siabie ŭ dopisie-znajomstvie: «Naradziŭsia i žyvu ŭ Minsku. Mnie krychu bolš za 30 hadoŭ. Žanaty z cudoŭnaj Alonaj».
U kamientaryi da Natalli pryjšła psichołah Dzijana Kuryłovič. Jana raspaviała, što Andrej niedzie hod tamu prapanoŭvaŭ joj barter: jana da jaho chodzić na masaž, a jon da jaje na psichaterapiju. Dzijana admoviłasia.
Źjavilisia i inšyja ludzi, jakich raniej ździŭlali pavodziny masažysta: «Ja hod tamu zapisała chłopca da jaho i chacieła pajści sama, ale jon padaŭsia mnie zanadta dziŭnym i nazojlivym. Ja vyrašyła nie iści, ale chłopca adpraviła. Paśla hetaha jon byŭ vielmi nazojlivym i pisaŭ kožny dzień ź niejkim novym pytańniem».
Niadaŭna Andrej šukaŭ madelaŭ na biaspłatny masaž. Siarod admietnych patrabavańniaŭ była vaha da 65 kiłahramaŭ i ŭzrost ad 18 da 40 hadoŭ.
Ciapier čytajuć
28‑hadovaha avijatara asudzili na 13 hadoŭ kałonii: «zdrada dziaržavie» za pierapisku z adnakurśnikami z USU11
28‑hadovaha avijatara asudzili na 13 hadoŭ kałonii: «zdrada dziaržavie» za pierapisku z adnakurśnikami z USU
Niebaraka ź Lachavičaŭ źnik «na SVA» ŭžo na treci dzień, a ŭ baraćbie za hrabavyja sčapilisia siastra, sužycielka i žonka — z čatyrma dziećmi, ale čužymi88
Kamientary
Moža jon pamylacca? Byvaje. U kožnaha toje byvaje. Napišycie jamu, papraŭcie, udakładnicie, patłumačcie, kali niešta nie tak zrabiŭ — vypravicca, ŭdakładnić vam usio, daść źnižku. Usim žyć u hetaj krainie razam!