Asabistyja rečy Bryžyt Bardo pradali na aŭkcyjonie ŭ Paryžy amal za miljon jeŭra
Aŭkcyjon asabistych rečaŭ francuzskaj aktrysy Bryžyt Bardo, jaki prajšoŭ u Paryžy, prynios amal 1 miljon jeŭra. Heta amal u 20 razoŭ bolš za papiaredniuju acenačnuju vartaść usich łotaŭ, jakaja składała kala 50 tysiač jeŭra, piša The Guardian.
Na prodaž vystavili 285 pradmietaŭ z damoŭ aktrysy ŭ Sien-Trape i Paryžy. Siarod ich byli adzieńnie, aksesuary, mebla, aŭtapartrety i muzyčnyja instrumienty.
Najbolš darahimi łotami stali dva sabačyja ašyjniki, jakija kupiec-rasijanin nabyŭ za 9400 jeŭra, aŭtapartret za 40 tysiač jeŭra, pišučaja mašynka za 4600 jeŭra, a taksama dźvie hitary, pradadzienyja adpaviedna za 8600 i 1900 jeŭra.
Atrymanyja srodki pieradaduć zasnavanamu Bardo fondu abarony žyvioł, a taksama jaje synu Nikala-Žaku Šarje. Kiraŭnica fondu Žysłen Kalmiels zajaviła, što hety aŭkcyjon staŭ praciaham rasprodažu, jaki sama aktrysa arhanizavała jašče ŭ 1987 hodzie. Tady Bardo pradała svaje najbolš kaštoŭnyja rečy, kab zasnavać fond. Pavodle jaje słoŭ, ciapier baraćba aktrysy za abaronu žyvioł praciahvajecca dziakujučy novamu aŭkcyjonu.
Adnak muž Bryžyt Bardo Biernar d'Armal raskrytykavaŭ rasprodaž. Jon nazvaŭ jaho niepavahaj da pamiaci aktrysy i zajaviŭ u intervju ahienctvu AFP, što asabistyja rečy Bardo treba było zachavać jak častku jaje spadčyny. Pavodle jaho słoŭ, sama aktrysa nie pahadziłasia b na taki prodaž.
Ciapier čytajuć
Aryštavany sienatar Karpicki, hałoŭny doktar Bresckaj abłasnoj balnicy4
Kamientary