U «Minsk-Śviecie» zdajecca ŭ arendu kvatera z vannaj pasiarod pakoja
Kožny sam vyrašaje, jak uładkavać ułasnuju kvateru.
Uładalnik hetaj adnapakajovaj kvatery ŭ «Minsk-Śviecie» vyrašyŭ pastavić vannu prosta kala akna ŭ spalni. Abjekt z takoj admietnaściu dakładna zdolny pryciahnuć uvahu kvatarantaŭ, piša Onliner.by.
Kvatera znachodzicca ŭ domie na vulicy Nikoły Tesły, 26. Pavierch apošni, 25-y, tamu vidy z voknaŭ, pa idei, pavinny być malaŭničymi.
Vierahodna, mienavita tamu kala akna ŭ spalni vyrašyli pastavić vannu, jakaja tut vykonvaje adrazu niekalki funkcyj. Tak, u joj možna pamycca. Ale taksama jaje možna vykarystoŭvać jak utulny kutok dla ahladu navakolla:
— Heta miesca stanie vašym asabistym aazisam rełaksacyi, idealna prydatnym dla viačerniaha adpačynku paśla nasyčanaha dnia. Ujavicie, jak pryjemna atrymlivać asałodu ad haračaj vanny, lubujučysia haradskimi ahniami abo promniami ŭzychodziačaha sonca, — piša ŭładalnik.
U astatnim interjer kvatery vykanany ŭ styli łoft z akcentam na dyzajnierskich elemientach. U azdableńni vykarystany parkiet z naturalnaha duba, art-bieton na ścienach, pieraharodki z zahartavanaha škła, stalnica z kamieniu, mebla ź mietału.
U kalidory možna zaŭvažyć lustranuju ścianu vyšynioj 3 mietry — śpiecyjalna dla sełfi.
— Dla stvareńnia atmaśfiery sapraŭdnaj utulnaści ŭ kvatery praduhledžany bijakamin, — paviedamlaje ŭłaśnik. — Jon nie tolki doryć ciapło, ale i stvaraje ramantyčnuju atmaśfieru. U hetym miescy asabliva pryjemna pravodzić viečary za kuflem vina abo kubkam duchmianaj kavy.
Kolki ž budzie kaštavać pažyć u takoj niezvyčajnaj adnapakajovaj kvatery? Miesiac arendy abydziecca 2392 rubli, abo $790 pa kursie.
Kamientary