Z 1 studzienia 2027 hoda ŭ Jehipcie pavialičycca košt adnarazovych ujaznych vizaŭ dla hramadzian usich zamiežnych krain, u tym liku Biełarusi. Takoje rašeńnie pryniali jehipieckija ŭłady.
Pavodle aficyjnaha cyrkulara Pałaty turystyčnych kampanij i turahienctvaŭ Jehipta, bazavy košt standartnaj turystyčnaj vizy vyraście z 30 da 33 dalaraŭ ZŠA.
Pry hetym kančatkovaja suma moža być bolšaj u zaležnaści ad sposabu afarmleńnia dakumientaŭ i aeraporta prybyćcia. Da bazavaha taryfu moža dadavacca servisny zbor u pamiery 6 dołaraŭ za absłuhoŭvańnie, techničnaje afarmleńnie i bankaŭskija kamisii.
Ciapier taki dadatkovy zbor spahaniajecca tolki ŭ mižnarodnym aeraporcie Kaira pry afarmleńni ličbavaj vizy z QR-kodam. U hetym vypadku ahulny košt składaje 36 dalaraŭ, a z 1 studzienia 2027 hoda pavialičycca da 39 dalaraŭ.
Pakul nieviadoma, ci buduć aŭtamatyčna spahaniać hety zbor pry afarmleńni papiarovych vizavych marak u kurortnych aeraportach Churhady, El-Ałamiejna i Aleksandryi. Pradstaŭniki turystyčnaj śfiery čakajuć dadatkovych tłumačeńniaŭ ad Ministerstva turyzmu i staražytnaściaŭ Jehipta.
Heta stanie ŭžo druhim pavyšeńniem koštu jehipieckaj vizy za apošni čas. Z 1 sakavika 2026 hoda zbor pry ŭjeździe pavialičyli z 25 da 30 dalaraŭ. Takim čynam, za karotki pieryjad košt ujezdu dla zamiežnych hramadzian vyras amal na tracinu.
Dla biełaruskich turystaŭ, jakija nabyvajuć pakietnyja tury, paradak prachodžańnia kantrolu nie źmienicca. Arhanizacyjnyja pytańni i apłatu vizaŭ zvyčajna kaardynujuć pradstaŭniki boku, jaki prymaje. Samastojnym padarožnikam rekamiendujuć zahadzia ŭličyć novyja zbory ŭ biudžecie pajezdki.
Razam z tym dla niekatorych turystaŭ zachoŭvajecca mahčymaść biaspłatnaha ŭjezdu ŭ miežach praviła «sinajskaha štampa» (Sinai Only). Hramadzianam Biełarusi nie treba nabyvać standartnuju vizu za 33 dalary, kali jany prylatajuć pramym rejsam u mižnarodny aeraport Šarm-eš-Šejcha, płanujuć znachodzicca ŭ Jehipcie nie bolš za 15 dzion i nie źbirajucca pakidać administracyjnyja miežy kurortnaj zony Paŭdniovaha Sinaja. U takim vypadku ŭ pašparcie biaspłatna staviać śpiecyjalny štamp.
Adnak hety štamp nie dazvalaje vyjazdžać za miežy rehijona. Kali turyst płanuje naviedać Kair i jaho piramidy, Łuksor abo Churhadu, jamu nieabchodna nabyć paŭnavartasnuju jehipieckuju vizu pavodle abnoŭlenaha taryfu niepasredna ŭ zonie prybyćcia.
Kamientary