Ambasada nie adkazvała, tamu siamja Śviatłany Kurs sama šukała sposab pieravieźci jaje prach
Źjavilisia padrabiaznaści taho, jak udałosia pieravieźci prach biełaruskaj piśmieńnicy i žurnalistki Śviatłany Kurs z Polščy na radzimu, u Biełaruś. Siamja raźviazvała hetaje pytańnie biez udziełu dypłamataŭ, piša «Biełsat».
Jak stałasia viadoma «Biełsatu», rodnyja piśmieńnicy źviarnulisia ŭ Biuro apieki nad mahiłami zamiežnikaŭ (Bongo), jakoje ŭziało na siabie afarmleńnie ŭsich dakumientaŭ. Paralelna siamja biespaśpiachova sprabavała źviazacca ź biełaruskaj ambasadaj — u vyniku ŭsio daviałosia rabić bieź jaje ŭdziełu.
Urna z pracham jechała ŭ adnym transparcie razam ź ciełami inšych niabožčykaŭ: akramia jaje, u mašynie było i niekalki trunaŭ. U Bongo tłumačać, što truny zvyčajna pryciahvajuć značna bolš uvahi i patrabujuć bolš strohich pravierak i farmalnaściaŭ. Mienavita pracaŭniki firmy pieravieźli urnu praź miažu i dastavili jaje ŭ rodnuju viosku Śviatłany na Lubanščynie.
Pachavańnie adbyłosia 22 žniŭnia. Na im prysutničała niašmat ludziej — najbližejšyja svajaki. Ułady byli kateharyčna suprać luboj publičnaj padziei.
Piśmieńnicu i žurnalistku pachavali ŭ Lubanskim rajonie, jaje mahiła — u vioscy Bajaničy, dzie jana naradziłasia. Pavodle voli Śviatłany Kurs cieła kremiravali, na ahulnym raźvitańni ŭ Varšavie prysutničała urna z pracham.
Śviatłana Kurs pajšła z žyćcia 19 lipienia 2026 hoda ŭ Varšavie paśla hadavoj baraćby z ankałahičnaj chvarobaj. Uviesnu 2025‑ha jana paviedamiła, što ŭ jaje dyjahnastavali rak jaječnikaŭ na poźniaj stadyi.
Ciapier čytajuć
U rasijskaj armii biełaruskaha najomnika paviesili na drevie ŭniz hałavoj i bili pałkaj pa hienitalijach22
Kamientary