Pad Bierlinam amal dva dni šukali lvicu, a jana akazałasia dzikom
Pad Bierlinam ad čaćviarha viałasia apieracyja pa pošuku lvicy. Pra toje, što jaje nibyta bačyli, pastupili dziasiatki zvankoŭ. Na piku apieracyi ŭ joj brali ŭdzieł da 120 palicejskich. Ale ciapier jaje zhortvajuć, bo akazałasia, što za ekzatyčnaha drapiežnaha źviera pryniali samuju zvyčajnuju ŭ hetych krajach žyviolinu.
Palicyja, vieterynary i palaŭničyja bolš za sutki viali apieracyju z užyvańniem viertalotaŭ i bieśpiłotnikaŭ, ale ŭ chodzie pošukaŭ nie vyjavili ni śladoŭ vialikaj kotki, ani ŭzoraŭ DNK, ani inšych prykmiet prysutnaści lvicy. Ekśpierty ž paśla starannaha vyvučeńnia videa pryjšli da vysnovy, što heta nasamreč byŭ dzik, jakich šmat u lasach kala niamieckaj stalicy, piša Bi-bi-si.
Palicyja z samaha pačatku pastaviłasia da situacyi vielmi surjozna, asabliva paśla taho, jak dvoje palicejskich u čaćvier viečaram paviedamili, što asabista bačyli kahości vielmi padobnaha da lvicy. Na piku pošukaŭ u piatnicu ranicaj u ich brali ŭdzieł kala 120 palicejskich.
Heta tłumačycca tym, što ŭnačy ŭ palicyju pastupili jašče dziasiatki zvankoŭ ad vidavočcaŭ, u tym liku ŭ prestyžnym pryharadzie Zielendorf, jakija śćviardžali, što jany nibyta bačyli źviera.
«Vidavočnaj niebiaśpieki niama», — zajaviŭ u piatnicu na pres-kanfierencyi mer kamuny Kłajnmachnaŭ Mikael Hrubiert, jaki sam napiaredadni zaklikaŭ miascovaje nasielnictva nie hrebavać paradami palicyi i siadzieć pa damach. Dyj ciapier jon dadaŭ, što varta ŭsio ž taki zachoŭvać aściarožnaść u vypadku, kali situacyja źmienicca.
Kamientary