«Što ja viedaju pra muža? Uvohule ničoha». Z Andrejem Pačobutam taksama źnikła suviaź
Aksana Pačobut, žonka asudžanaha žurnalista i hramadskaha dziejača Andreja Pačobuta, raskazała «Narodnaj Voli», što listoŭ ad muža jana nie atrymlivała z 6 lipienia.
«Što na siońnia ja viedaju pra muža? Uvohule ničoha, — paviedamiła Aksana Pačobut. — Akramia taho, što raźvivajucca padziei pa najhoršym scenary, kali čałaviek prosta źnikaje ŭ kałonii bieź jakich-niebudź viestak.
Prybyŭšy miesiac tamu ŭ kałoniju Navapołacka, Andrej paviedamiŭ pra heta ŭ liście. Taksama jon paśpieŭ paviedamić, što adrazu ž u karancinie jaho abviaścili złosnym parušalnikam i pazbavili pieradač i spatkańnia».
Pa słovach Aksany Pačobut, z 6 lipienia listoŭ ad muža niama.
«Da jaho nie puskajuć advakata, — dadała žonka žurnalista. — Taksama stała viadoma, što Andrej u ŠIZA. Vierahodna, druhi ci treci raz zapar. Nieviadoma, jak jon tam trymajecca bieź lekaŭ».
Žurnalist i aktyvist polskaj supolnaści z Hrodna Andrej Pačobut byŭ zatrymany 25 sakavika 2021 hoda. Zhodna z prysudam abłasnoha suda, jon byŭ pryznany vinavatym u publičnych zaklikach da dziejańniaŭ, nibyta nakiravanych na pryčynieńnie škody nacyjanalnaj biaśpiecy Respubliki Biełaruś, raspaŭsiudzie materyjałaŭ, jakija źmiaščajuć takija zakliki, z vykarystańniem miedyja i sietki internet, a taksama ŭ naŭmysnych dziejańniach, nakiravanych na ŭzbudžeńnie nacyjanalnaj, relihijnaj i inšaj sacyjalnaj varožaści i varažniečy pa prykmietach nacyjanalnaj, relihijnaj i inšaj sacyjalnaj prynaležnaści, učynienych hrupaj asob.
U lutym hetaha hoda Andreju Pačobutu byŭ vyniesieny prysud — vosiem hadoŭ źniavoleńnia z adbyvańniem u kałonii ŭzmocnienaha režymu.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ89
Kamientary