Vice-ministr Litvy: Vosieńniu ŭ Siejmie moža być razhledžana pytańnie ab vydačy licenzij na aŭtobusnyja rejsy ŭ Biełaruś
Kolkaść pajezdak hramadzian Litvy ŭ hetuju krainu zastajecca vysokaj.
Namieśnik ministra zamiežnych spraŭ Mantas Adamienas skazaŭ, što na vosieńskaj siesii parłamienta moža być razhledžana pytańnie ab licenzavańni aŭtobusnych pajezdak u Biełaruś, bo kolkaść pajezdak hramadzian Litvy ŭ hetuju krainu zastajecca vysokaj.
«Paśla taho jak viasnoj minułaha hoda źjaviŭsia biaźvizavy režym (ujezdu ŭ Biełaruś) dla žycharoŭ Litvy, Polščy i Łatvii, kolkaść naviedvańniaŭ pavialičyłasia, i my rasceńvajem heta jak pahrozu dla hramadzian Litvy, bo kožny ź ich moža stać mišeńniu siłavych struktur Biełarusi i režymu Łukašenki ahułam», — skazaŭ Adamienas, piša Delfi.
Pavodle słoŭ vice-ministra, infarmacyjnaja kampanija, jakaja pravodzicca na miažy ź Biełaruśsiu, nie moža spynić usich hramadzian, jakija nakiroŭvajucca ŭ krainu, tamu nieabchodnyja inšyja miery.
«Vydača licenzij na rejsy była b nastupnym krokam. Mahčymaści razhladajucca. Prosta heta niemahčyma bieź źmienaŭ u zakonie, jakija adbuducca tolki paśla taho, jak Siejm źbiarecca na vosieńskuju siesiju», — skazaŭ jon.
Pavodle słoŭ Adamienasa, choć u Litvie i jość rekamiendacyja nie jeździć u Biełaruś, ab poŭnym zakryćci miažy pakul havorki nie idzie. «My pravavaja demakratyčnaja dziaržava, i svaboda pieramiaščeńnia hramadzian Litvy harantujecca našymi zakonami. Kab kazać pra zakryćcio miažy, nam patrebny byŭ by zusim inšy pravavy režym», — adznačyŭ Adamienas.
U sieradu Ministerstva zamiežnych spraŭ dało strohija rekamiendacyi hramadzianam Litvy ŭstrymacca ad pajezdak u Biełaruś.
Kamientary