Premjerka Litvy: Jość niamała padstaŭ dla ŭnifikacyi abmiežavańniaŭ dla biełarusaŭ i rasijan
Pavodle jaje, vielmi važna źviarnuć uvahu na toje, što dla biełarusaŭ, jakija biahuć ad pieraśledu režymu Alaksandra Łukašenki, humanitarny kalidor zastaniecca ŭ lubym vypadku.
Premjer-ministarka Litvy Inhryda Šymanicie ličyć, što jość niamała padstavaŭ dla ŭnifikacyi abmiežavańniaŭ u dačynieńni da rasijanaŭ i biełarusaŭ. Pavodle jaje, vielmi važna źviarnuć uvahu na toje, što dla biełarusaŭ, jakija biahuć ad pieraśledu režymu Alaksandra Łukašenki, humanitarny kalidor zastaniecca ŭ lubym vypadku, piša Delfi.
«Ja dumaju, što ciapier jość niamała padstaŭ, a humanitarnyja vyklučeńni, u asnovie jakich lažyć abjektyŭnaja nieabchodnaść i pahroza ludziam, praciŭnikam režymu, (…) hetyja vyklučeńni jość i zastajucca», — skazała jana.
«I tady hetaja acenka zastaniecca ŭ vypadku z kožnym asobnym čałaviekam. Heta nie buduć całkam začynienyja dźviery. Ale dla šyrokich vyklučeńniaŭ, ja maju na ŭvazie, što robić ciapier režym Łukašenki, dla ich padstaŭ stała našmat mienš, — zaŭvažyła Šymanicie.
Premjerka padkreśliła, što z taho času, jak prymaŭsia zakon viasnoj, kali abmiarkoŭvalisia abmiežavańni dla rasijanaŭ i biełarusaŭ, situacyja značna źmianiłasia. Pavodle jaje słoŭ, na jaje źmienie adbiłasia i raźmiaščeńnie najmitaŭ «Vahniera» ŭ Biełarusi.
«Situacyja za hety čas źmianiłasia, asabliva paśla buntu «vahnieraŭcaŭ» i paśla taho, jak Łukašenka vyrašyŭ dać prytułak terarystyčnaj arhanizacyi na svajoj terytoryi. Viadoma, heta mianiaje i ahulnuju karcinu situacyi, i razumieńnie ryzyk», — akcentavała Šymanicie.
Jana ličyć, što peŭnyja prapanovy buduć sfarmavany jašče da pačatku vosieńskaj parłamienckaj siesii.
«Ja dumaju, što da pačatku vosieńskaj siesii źjaviacca niejkija prapanovy ab źmienie zakona. Ja nie mahu skazać, ci treba zraŭnavać usio na 100%, ci mahčymyja niejkija pramiežkavyja rašeńni, ale, ja dumaju, hetaja dyskusija ŭ parłamiencie adnovicca», — zaŭvažyła Šymanicie.
Raniej pra nieabchodnaść zraŭnavać biełarusaŭ i rasijanaŭ nieadnarazova havaryŭ prezident Litvy Hitanas Naŭsieda.
Ciapier čytajuć
Śpievaka z «Marafonu adzinstva» asudzili za palityku — pryhadali kamientary 2020-ha. Baranić u sud jaho chadzili siostry Hruździevy7
Kamientary