«Ideja niejtralnaj Ukrainy ŭ isnych umovach užo nie maje sensu». Kisindžer patłumačyŭ, čamu źmianiŭ svaju pazicyju
Uładzimir Zialenski padčas vizitu ŭ ZŠA sustreŭsia z dypłamatam, navukoŭcam i palitykam Hienry Kisindžeram, jaki raniej byŭ kateharyčna suprać členstva Ukrainy ŭ NATA, ale ciapier źmianiŭ svajo mierkavańnie.
Pra heta ŭ svaim telehram-kanale paviedamiŭ kiraŭnik Ofisa prezidenta Ukrainy Andrej Jarmak.
Jon adznačyŭ, što taksama braŭ udzieł u sustrečy. Pavodle jahonych słoŭ, u Kisindžera jość šmat trapnych cytat, jakija charaktaryzujuć sučasny stan spraŭ u vajnie z Rasijaj.
«Da hetaj vajny ja byŭ suprać členstva Ukrainy ŭ NATA, tamu što bajaŭsia, što heta pačnie mienavita toj praces, jaki my nazirajem ciapier. Siońnia, kali praces dasiahnuŭ takoha ŭzroŭniu, ideja niejtralnaj Ukrainy ŭ takich umovach užo nie maje sensu», — cytuje Kisindžera ŭkrainski čynoŭnik.
Kiraŭnik Ofisa dadaŭ, što Kisindžer ciapier adzin z łabistaŭ Ukrainy ŭ NATA.
Hienry Kisindžer u 1970-ja hady zajmaŭ pasadu dziaržaŭnaha sakratara ZŠA i byŭ daradcam pa nacyjanalnaj biaśpiecy. Pry jaho ŭdziele chałodnaja vajna pamiž ZŠA i SSSR pajšła na spad, hety pieryjad u histaryjahrafii viadomy jak «razradka». U 1973 hodzie Kisindžer staŭ łaŭreatam Nobieleŭskaj premii miru ŭ suviazi z dasiahnutym pieramirjem u Vjetnamie.
U 2008 hodzie Kisindžer vystupaŭ suprać ustupleńnia Ukrainy ŭ NATA i za toje, kab Ukraina zastałasia ŭ śfiery ŭpłyvu Rasii. U 2015 hodzie, paśla rasijskaj ahresii, jon krytykavaŭ sankcyi suprać Rasii i apraŭdvaŭ akupacyju Kryma.
U mai 2022 hoda, vystupajučy na Suśvietnym ekanamičnym forumie ŭ Davosie, Kisindžer zajaviŭ, što Ukraina pavinna sastupić častku svajoj terytoryi Rasii, kab skončyć vajnu. Hetaje vykazvańnie było žorstka raskrytykavana.
Užo ŭ lipieni 2022 hoda Kisindžer pierajšoŭ da bolš strymanaj pazicyi adnosna Ukrainy, a ŭ studzieni 2023 hoda ŭvohule padtrymaŭ ideju ŭstupleńnia Ukrainy ŭ NATA.
Špakoŭski pra saŭładalnika «Varhiejminha» Kacałapava: Prafinansavaŭ pratesty na 296 tysiač dalaraŭ2
Kamientary