Uciok ad milicyi, skraŭ bramu i pajšoŭ vajavać: sieryjny złodziej z Babrujska pakinuŭ nahu na «SVA»
Uradženiec Babrujska Leanid Łohvin, jakoha biełaruskija siłaviki amal dva dziesiacihodździ tamu abviaščali ŭ vyšuk za kradziež, pajšoŭ vajavać suprać Ukrainy ŭ składzie rasijskaha vojska. Paśla ciažkaha ranieńnia i amputacyi nahi najmit pryjechaŭ na reabilitacyju ŭ biełaruski dziaržaŭny pansijanat.
55‑hadovy babrujec ciapier prachodzić azdaraŭleńnie ŭ sanatoryi «Viažuci» ŭ Maładziečanskim rajonie, jaki padparadkoŭvajecca Ministerstvu pracy Biełarusi. Hetaja ŭstanova śpiecyjalizujecca na reabilitacyi ludziej z parušeńniami aporna-ruchalnaha aparatu, a akupacyjny fond «Abaroncy Ajčyny» adpraŭlaje tudy paranienych rasijskich vajskoŭcaŭ.
Pra svajo znachodžańnie ŭ biełaruskim sanatoryi Łohvin sam achvotna raspavioŭ rasijskim prapahandystam, pazirujučy na fonie korpusaŭ kompleksu.
Kryminalnaja bijahrafija žychara Babrujska pačałasia zadoŭha da poŭnamaštabnaha ŭvarvańnia. U žniŭni 2007 hoda ŭ Babrujsku suprać jaho raspačali kryminalnuju spravu za kradziež (č. 2 art. 205 KK RB), adnak mužčyna parušyŭ padpisku ab niavyjeździe i źbieh, paśla čaho jaho abviaścili ŭ miždziaržaŭny vyšuk. Łohvin asieŭ va Ukrainie, dzie hadami žyŭ biez rehistracyi na Danbasie i poŭdni krainy. Tam jon taksama paśpieŭ adznačycca ŭ milicyi: u 2013 hodzie zajavu na jaho načny deboš pisała žonka na Charkaŭščynie.
Ale najbolš kurjozny vypadak zdaryŭsia ŭ 2019 hodzie ŭ Kramatorskim rajonie. Leanid skraŭ mietaličnuju haražnuju bramu ŭ znajomaha, u jakoha kvataravaŭ, a zatym sprabavaŭ pradać skradzienaje hetamu ž samamu haspadaru, za što atrymaŭ 100 hadzin hramadskich pracaŭ.
Biełarus byŭ u šlubie ź viadomaj kałabarantkaj Vieraj Łohvin, jakaja paśla akupacyi ŭ 2022 hodzie ŭznačaliła zachoplenaje siało Fiodaraŭka na Chiersonščynie i adznačyłasia pakazalnym razryvańniem ukrainskaha pašparta na kamieru.
Leanid vosieńniu 2024 hoda dobraachvotna padpisaŭ kantrakt z Uzbrojenymi siłami RF.
Na froncie jon pratrymaŭsia niadoŭha: užo da leta 2025 hoda jamu amputavali nahu.
Rasijskaja prapahanda zrabiła z Łohvina «vieterana SVA», akupacyjnyja ŭłady ŭ jakaści sacyjalnaj dapamohi rasčyścili jamu dvor ad suchich halin, paśla čaho pakalečanaha najmita adpravili adnaŭlać zdaroŭje na radzimu, dzie jaho niekali šukali pravaachoŭniki.
«Naša Niva» — bastyjon biełaruščyny
PADTRYMAĆ23‑hadovy Katana z Kareličaŭ źnik pad Kupianskam. Maci zapisvaje adčajnyja, ale marnyja videazvaroty
«Ja jab**n, tamu i pajšoŭ». Małady biełarus kinuŭ ciažarnuju žonku i pajechaŭ na vajnu, paśla zdradziŭ joj dyj zahinuŭ
«Mierkavana, zahinuŭ. Evakujavać niemahčyma». Minski adździełačnik Alaksiej nie vierniecca z vajny suprać Ukrainy
Hieroj Biełarusi Maryna Vasileŭskaja naradziła dačku ad kasmanaŭta Aleha Navickaha16
Kamientary
Kali ŭ hetaha ekzemplara nie vyraście- značyć jen paviesiŭ partret pucina nie ŭ tym miescy, bo treba kab visieŭ nad łožkam.