Biełaruska raspačała čelendž «40 spatkańniaŭ», ale ŭžo na siaredzinie nie chavaje rasčaravańnia ŭ mužčynach
Tancorka i kantent-kreatarka Kaciaryna Loŭkina rodam z Mahiloŭščyny, ale ciapier žyvie ŭ Hruzii. Niadaŭna jana vyrašyła pasprabavać razabracca z pytańniem samotnaści i prydumała čelendž: schadzić z mužčynami na 40 spatkańniaŭ.
«Mnie 36 hadoŭ i ja vyrašyła schadzić na 40 pieršych spatkańniaŭ. Bieź intymu i biez čakańniaŭ. Natchniŭ mianie na heta film «40 spatkańniaŭ, 40 načej». Mnie stała cikava, ci zmahu ja ŭvohule paznajomicca z saraka nieznajomymi ludźmi i što adbyvajecca nie ŭ ramantyčnaj kamiedyi, a ŭ realnym žyćci?»
Praŭda, užo na paŭdarozie Kaciaryna adznačyła, što sama ideja, vidać, była niaŭdałaj. Što ž tak zasmuciła dziaŭčynu?
Pra svoj dośvied jana ščyra raskazvaje ŭ instahram-błohu.
Pieršyja niekalki dzion listavańnia z mužčynami ŭ dadatkach dla znajomstvaŭ, instahramie i tredsach uvohule nie pryviali Kaciarynu da realnaha spatkańnia.
«Zatoje byli prapanovy prysieści mnie na tvar i pabačyć mianie «ŭ jaho doma ŭ čyrvonaj sukiency». Bolšaść mužčyn adrazu imknulisia ŭdakładnić, ci budzie ŭ nas ź imi seks. Alo, ja kliču paviačerać razam, parazmaŭlać — heta što, tak składana? Ja pavinna adrazu rassunuć nohi? Mužčyny bajacca stracić hrošy, u ich strach, što ja raźviadu ich na sałatu?»
Kali ŭ Kaci ŭsio ž udałosia damovicca na sustreču, mužčyna źliŭsia ź jaje za paru hadzin da pryznačanaha času, paprasiŭšy pieranieści ŭsio na nastupny dzień.
«A ja paśpieła daremna pamyć hałavu, parušyŭšy hrafik myćcia», — skardzicca Kaciaryna. Jana dała hetamu metču druhi šaniec, ale jon nie pryjšoŭ na spatkańnie i tady.
«Heta było ŭ razy składaniej, čym ja dumała».
Jašče dva patencyjnyja kavalery adrazu pakazali siabie «red ściahami», bo admaŭlalisia kazać, čym jany zajmajucca.
«Jany kazali mnie, što heta nie važnaja infarmacyja dla pieršaha spatkańnia. A što my tady na im robim, kali nie znajomimsia? Ja ŭžo nie ŭ tych hadach, kab razhadvać zahadki. I sama nie imknusia być zahadkaj».
Jašče adno spatkańnie Kaciaryna admianiła sama, bo pierad im chłopiec niečakana pačaŭ zadavać joj dziŭnyja pytańni i dyktavać instrukcyi.
«Na pytańnie, jaki ŭ mianie rost, ja napisała, što 172 i jon skazaŭ: «Tady davaj biez abcasaŭ». Jon užo zahadzia pačaŭ mianie pad siabie padładžvać».
«Kali nastupnym razam zachočacie zapytać u mianie, čamu ja samotnaja, pierahladzicie maje videa z čelendžu «40 spatkańniaŭ», — nie chavaje złości i rasčaravańnia biełaruska. Ale pakul nie stračvaje nadziei, što moža chacia b davieści ekśpierymient da kanca.
Ciapier čytajuć
U rasijskaj armii biełaruskaha najomnika paviesili na drevie ŭniz hałavoj i bili pałkaj pa hienitalijach23
Kamientary