Biełaruski historyk atrymaŭ prestyžnuju navukovuju ŭznaharodu ŭ Polščy
Siońnia ŭ Instutucie historyi Polskaj akademii navuk u Varšavie ŭručyli premiju vydańnia Rocznik Lituanistyczny, jakoj ušanoŭvajucca navukoŭcy, što dasiahnuli vialikich viaršyń u daśledavańni historyi Vialikaha Kniastva Litoŭskaha. Łaŭreatam premii za 2022 hod staŭ biełaruski historyk Andrej Macuk.
U 2018 hodzie redakcyja prestyžnaha polskaha navukovaha časopisa Rocznik Lituanistyczny vyrašyła prysudžać štohadovuju premiju za vydatnyja dasiahnieńni ŭ daśledavańnia Vialikaha Kniastva Litoŭskaha i jaho spadčyny.
Uznaharodu, pavodle pravił jaje prysudžeńnia, majuć atrymlivać aŭtary i aŭtarki najlepšych prac, vydadzienych pamiž štohadovymi vosieńskimi kanfierencyjami Lituanistyčnych kamisij Kamiteta histaryčnych navuk PAN abo daśledčyki, jakija adznačajucca surjoznymi navukovymi zasłuhami — za sukupnaść svajoj tvorčaści.
Sioletniamu łaŭreatu Andreju Macuku 44 hady. Raniej jon pracavaŭ u Instytucie historyi Nacyjanalnaj akademii navuk Biełarusi, ale paśla 2020 hoda musiŭ razam ź inšymi navukoŭcami adtul zvolnicca i pierajechać u Polšču, dzie ciapier i praciahvaje svaju plonnuju navukovuju dziejnaść.
Na siońniašni dzień Andrej Macuk — aŭtar čatyroch navukovych manahrafij:
- «Baraćba mahnackich hrupovak u VKŁ (1717—1763 hh.)» (2010);
- «Połackaje vajavodstva ŭ XVIII st.: vajavoda, šlachieckaja elita, sojmiki» (2014);
- «Hramadska-palityčnaje žyćcio Vialikaha Kniastva Litoŭskaha ŭ časy bieskaraleŭja 1733—1735 hh.» (2020);
- «Paviatovyja sojmiki ŭ sacyjalna-palityčnym žyćci Vialikaha Kniastva Litoŭskaha (1697—1764 hh.)» (2023).
Pieršyja try hetyja daśledavańni vyjšli ŭ Biełarusi pad hryfam Instytuta historyi NANB, apošniaje ž vydadziena ŭžo za miažoj, ale taksama na biełaruskaj movie.
Raniej ź biełaruskich historykaŭ hetaja premija prysudžałasia tolki patryjarchu biełaruskaj histaryčnaj navuki Hieorhiju Halenčanku. Andrej Macuk staŭ pieršym ušanavanym historykam z novaha pakaleńnia daśledčykaŭ.
Vyjšła kniha pra toje, jak našy prodki ŭ časy Rečy Paspalitaj viali palityku na rehijanalnym uzroŭni
Kava z historykam: Baraćba mahnackich hrupovak u VKŁ — videalekcyja
Historyka Andreja Macuka asudzili na 15 sutak za śviatkavańnie narodzinaŭ u dvary z torcikam z «Pahoniaj»
Učora ŭ Minsku zatrymali historyka Andreja Macuka — adnaho z najlepšych znaŭcaŭ historyi VKŁ
Kamientary