U Šviejcaryi vynieśli apraŭdalny prysud byłomu bajcu «eskadrona śmierci» Juryju Haraŭskamu
Siońnia ŭ šviejcarskim Sankt-Halenie ahučyli prysud eks-bajcu SACHRa Juryju Haraŭskamu. Haraŭskaha niečakana apraŭdali pa spravie ab źniknieńni apazicyjnych palitykaŭ u 1999 hodzie, choć prakuror prasiŭ dla jaho 3 hady pazbaŭleńnia voli.
Haraŭskaha sudzili ŭ miežach univiersalnaj jurysdykcyi ŭ Šviejcaryi.
Byłoha śpiecnazaŭca abvinavačvali ŭ vykradańni eks-ministra MUS Biełarusi Juryja Zacharanki, eks-staršyni CVK Viktara Hančara i biznesoŭca Anatola Krasoŭskaha.
Šviejcarskaje zakanadaŭstva nie dazvalała pryciahnuć Haraŭskaha da adkaznaści pa bolš surjoznym kryminalnym artykule — za zabojstvy ci saŭdzieł u ich, bo imaviernyja raspravy nad apanientami režymu adbyvalisia na terytoryi Biełarusi. Tamu sudzili eks-siłavika za datyčnaść da «šmatlikich vypadkaŭ źniknieńnia».
Jak paviedamlaje Deutsche Welle, Akruhovy sud Roršacha apraŭdaŭ Juryja Haraŭskaha pa abodvuch pradjaŭlenych jamu abvinavačvańniach — hvałtoŭnym źniknieńni ludziej i ŭviadzieńni pravasudździa ŭ zman.
Hramadzianski pazoŭ Aleny Zacharanki i Valeryja Krasoŭskaha na 200 tysiač šviejcarskich frankaŭ budzie pieranakiravany ŭ hramadzianski sud. Sudovyja vydatki na sumu ŭ amal 45 tysiač frankaŭ pakryje dziaržava.
Tłumačačy prysud, sudździa zajaviŭ, što heta asablivy vypadak, u jakim «zamiašanaja ŭłada, i jana adkaznaja za hvałtoŭnyja źniknieńni».
«Hetyja fakty nie pavinny vyklikać sumnieńniaŭ. Ale na dopycie abvinavačany zabłytaŭsia ŭ supiarečnaściach i ŭchilaŭsia ad adkazu», — rastłumačyŭ svajo rašeńnie sudździa.
Jon paličyŭ, što niekatoryja z pakazańniaŭ Haraŭski prydumaŭ. Tamu sud pryjšoŭ da vysnovy, što Juryj Haraŭski, mahčyma, słužyŭ u SACHRy, ale jahonaja rola ŭ vykradańniach zastajecca niezrazumiełaj. «Mahčyma, jon čuŭ pra heta ad kaleh», — pieradaje słovy sudździ karespandentka DW.
Karespandentka vydańnia «Novy čas» pasprabavała paśla prysudu parazmaŭlać z samim Juryjem Haraŭskim.
«Ci škadujecie vy ab tym, što brali ŭdzieł u vykradańniach apazicyjnych palitykaŭ? Ci razumieli vy, bieručy ŭdzieł u hetych śpiecapieracyjach, što heta palityčnyja spravy? Jak Paŭličenka tłumačyŭ vam nieabchodnaść zatrymańnia Zacharanki, Hančara i Krasoŭskaha?» — zapytałasia jana.
Adnak Haraŭski nie adkazaŭ ni na adno pytańnie, nasunuŭšy kapiušon na hałavu. Vyhladaŭ jon, jak adznačyła žurnalistka, vielmi padaŭlenym.
Advakatka Haraŭskaha ŭ razmovie z žurnalistami paviedamiła, što jaje bok zadavoleny takim rašeńniem suda.
Čytajcie taksama pa temie:
BiełTA padmanvaje, što Haraŭskaha ŭ Šviejcaryi sudziać za samaabhavor
U Šviejcaryi skončyŭsia sud nad byłym bajcom «eskadrona śmierci» Haraŭskim
Prakuror zaprasiŭ dla eks-śpiecnazaŭca pa spravie źnikłych apanientaŭ Łukašenki 3 hady źniavoleńnia
Ciapier čytajuć
Stała viadomaja asoba rabočaha «Biełaruśkalija», jaki zahinuŭ pry abrušeńni hornaj parody1
Kamientary
Mocy svajakam i biełaruskamu narodu pieražyć niespraviadlivy prysud