Zialenski: Sproby nastupu rasijskich vojskaŭ pad Vuhladaram paśpiachova adbityja
Vuhladar — bastyjon, raźmieščany ŭ stratehična važnym punkcie na skryžavańni paŭdniovaj i ŭschodniaj linij ukrainskaha frontu.
Ukrainskija vojski adbili sproby nastupu rasijanaŭ pad Vuhladaram u Danieckaj vobłaści i praciahvajuć trymać abaronu Aŭdziejeŭki, a taksama pravodzić nastupalnyja dziejańni na poŭdni Ukrainy, zajaviŭ u čaćvier Uładzimir Zialenski, piša Bi-bi-si.
Vuhladar — bastyjon, raźmieščany ŭ stratehična važnym punkcie na skryžavańni paŭdniovaj i ŭschodniaj linij ukrainskaha frontu. Ciaham doŭhich miesiacaŭ za kantrol nad horadam nieadnarazova razhortvalisia žorstkija bitvy.
«Była sproba praciŭnika nastupać na Vuhladarskim kirunku, ale našy voiny spynili jaje, naniosšy vorahu ciažkija straty: dziasiatki adzinak techniki, šmat zabitych i paranienych», — paviedamiŭ Zialenski pa vynikach sielektarnaj narady z kiraŭnikami Uzbrojenych sił i Ministerstva abarony.
Pradstaŭnik rasijskaha Minabarony zajaviŭ u čaćvier, što padraździaleńniami hrupoŭki vojskaŭ «Uschod» va ŭzajemadziejańni z armiejskaj avijacyjaj i artyleryjaj na paŭdniova-danieckim napramku «było naniesiena ahniavoje paražeńnie žyvoj sile i technicy VSU ŭ rajonach nasielenych punktaŭ Vuhladar, Uradžajnaje i Staramajorskaje».
Ukrainskija vajskoŭcy paviedamlajuć, što ŭ apošnija tydni adbyłasia prykmietnaja eskałacyja bajavych dziejańniaŭ uzdoŭž linii sudakranańnia na ŭschodzie krainy. Pavodle źviestak USU, Rasija sprabuje pierahrupavacca i adnavić siły paśla bujnych strat, paniesienych u rajonie Aŭdziejeŭki, pierš čym adnavić ataki.
«Vorah pry padtrymcy avijacyi nie pakidaje sprobaŭ akružyć Aŭdziejeŭku, ale našy voiny stojka trymajuć abaronu, nanosiačy akupantam značnyja straty», — havaryłasia ŭ siońniašniaj ranišniaj zvodcy Hienštaba USU. Ukrainskaje kamandavańnie zapeŭnivaje, što prynamsi na paŭdniovym fłanhu paŭkoła vakoł Aŭdziejeŭki — u rajonie viosak Pieršamajskaje i Paŭnočnaje — usie ataki rasijanaŭ u apošnija sutki byli adbityja.
Uładzimir Zialenski nie staŭ paviedamlać padrabiaznaści apieracyj na hetym kirunku, łakanična paviedamiŭšy, što «praciahvajucca abarončyja dziejańni ŭ Aŭdziejeŭcy i našy nastupalnyja apieracyi na poŭdni».
Ciapier čytajuć
Vylecieła ŭ nieviadomym kirunku śpikierka KR Anžalika Mielnikava25
Kamientary