U Polščy zatrymany były dobraachvotnik Pałka «Pahonia» Jaŭhien «Karyč» Karankievič

21-hadovy Jaŭhien Karankievič z 2020-ha vučyŭsia ŭ Polščy pa prahramie Kalinoŭskaha na prahramista.

U lutym 2022-ha jon nienadoŭha viarnuŭsia ŭ Biełaruś, dzie byŭ zatrymany. U jaho prajšoŭ pieratrus i ahlad techniki, jaki pravodzili supracoŭniki KDB. Kab paźbiehnuć kryminalnaj adkaznaści, jakoj jamu pahražali, Jaŭhien vusna pahadziŭsia supracoŭničać z KDB, ale pa pryjeździe ŭ Polšču raskazaŭ pra heta śpiecsłužbam krainy.

Karankievič vyrašyŭ pajechać vajavać va Ukrainu ŭ składzie Pałka «Pahonia». Paśla taho, jak jon prajšoŭ padrychtoŭku i vyjechaŭ va Ukrainu, jamu daviałosia pajści dabravolcam u Połk Kalinoŭskaha, bo ŭ «Pahoni» nie było mahčymaści padpisać kantrakt z USU.

Paźniej kandydaturu chłopca i jahonaha siabra, byłoha palitviaźnia Cichana Klukača, zabrakavała SBU, nie tłumačačy pryčynaŭ. Im abodvum uručyli pozvy ab departacyi. Adbyŭsia skandał. Karankieviču daviałosia pierasiakać miažu z Polščaj i šukać tam prytułku. A ŭviesnu 2023-ha Jaŭhien prajhraŭ sud SBU, jakaja aficyjna patłumačyła heta tak:

«Padčas dopytu z vykarystańniem palihrafa SBU byli atrymanyja źviestki ab mahčymym znachodžańni biełarusa ŭ ahienturnym aparacie śpiecsłužbaŭ abo pravaachoŭnych orhanaŭ Biełarusi i vykanańni zadač na škodu nacyjanalnaj biaśpiecy Ukrainy. Taksama byli vyjaŭlenyja prykmiety devijantnych pavodzin i dezadaptacyjnyja schilnaści, jakija mohuć uskładnić znachodžańnie hetaj asoby ŭ šerahach Uzbrojenych sił Ukrainy i pryvieści da ciažkich nastupstvaŭ. 

Uličvajučy varožaje staŭleńnie Respubliki Biełaruś da Ukrainy, było prapanavana orhanu vajskovaha ŭpraŭleńnia Uzbrojenych sił Ukrainy admović hramadzianinu Biełarusi ŭ prachodžańni vajskovaj słužby ŭ nacyjanalnych vajskovych farmavańniach Ukrainy, tak jak znachodžańnie hramadzian Biełarusi, jakija skampramietavanyja supracaj z nacyjanalnymi śpiecsłužbami, na terytoryi Ukrainy stvaraje pahrozu dziaržaŭnaj biaśpiecy».

Paśla hetaha Karankievič žyŭ u Polščy. Klukač praz čas zmoh viarnucca na front.

Zatrymali Karankieviča jašče 8 vieraśnia.

Dobraachvotnik Cichan Klukač pryvioŭ u svaim telehram-kanale takoje tłumačeńnie: 

«U horadzie, dzie jon žyŭ, jamu daviałosia tłumačyć niekatorym pradstaŭnikam krain Blizkaha Uschodu, jakija faktyčna adkryta raspaŭsiudžvali siarod miascovaj moładzi narkatyčnaje rečyva, što takoj dziejnaściu im lepš zajmacca na svajoj radzimie, a nie ŭ Jeŭropie.

U vyniku razmovy z adnym z baryh-mihrantaŭ Jaŭhien atrymaŭ traŭmy čerapa j taza, bo toj sprabavaŭ źbić jaho na aŭtamabili, paźniej razam ź niekalkimi paplečnikami byŭ zatrymany polskaj palicyjaj, była zaviedziena kryminalnaja sprava. Ciapier Jaŭhien znachodzicca ŭ turemnaj lakarni».

Cichan udakładniŭ «Našaj Nivie», što Karankievič u lakarni z samaha pačatku terminu. Pad śledstvam nie tolki Jaŭhien, ale i niekalki jaho siabroŭ.

Pa jakim artykule zaviedziena sprava, što za «tłumačeńni» mihrantam pravodziŭ Karankievič, Klukač havaryć nie staŭ. «Bolš ničoha skazać nie mahu», — koratka patłumačyŭ jon.

• 7
• 0
• 8
• 32
• 22
• 32
• 20
• 0