Padziemnyja vučeńni ŭ Łondanie. Na zakinutaj płatformie mietro repietavali adbićcio napadu Rasii na krainy Bałtyi
U vučeńniach, jakija vojska nazyvaje «adnymi z samych maštabnych za čas žyćcia našaha pakaleńnia», pryniali ŭdzieł sotni brytanskich vajskoŭcaŭ.
Brytanskaja armija na minułym tydni niehałosna praviała vučeńni pa adbićci mahčymaha napadu z boku Rasii na krainy Bałtyi. U jakaści kamandnaha centra, dzie płanavaŭsia adkaz Vialikabrytanii i inšych krain NATA na ahresiju, była vykarystana vyviedzienaja z ekspłuatacyi płatforma stancyi mietro ŭ samym centry Łondana, piša Bi-bi-si.
U vučeńniach, jakija armija nazyvaje «adnymi z samych maštabnych za čas žyćcia našaha pakaleńnia», pryniali ŭdzieł sotni brytanskich vajskoŭcaŭ. Jany pravodzilisia na adnoj z płatform stancyi mietro Charing Cross, raźmieščanaj pobač z Trafalharskaj płoščaj i ŭradavaj vulicaj Uajt-choł, vakoł jakoj znachodziacca asnoŭnyja ministerstvy i rezidencyja premjer-ministra.
Brytanskija vajskoŭcy apisvajuć apieracyju pad nazvaj «Arrcade Strike» jak «maštabnyja kamandnyja vučeńni, jakija pravodziŭ Abjadnany korpus chutkaha reahavańnia (ARRC) — hatovaja da razhortvańnia štab-kvatera NATA, jakuju ŭznačalvaje armija Vialikabrytanii».
Napad na krainy Bałtyi: jakim byŭ scenaryj?
Jak pišuć brytanskija ŚMI, pa scenaryi vučeńniaŭ, u 2030 hodzie Rasija vyrašaje raspačać napad na Łatviju, Litvu i Estoniju, u vyniku čaho NATA zadziejničaje Piaty artykuł svajho statuta ab kalektyŭnaj abaronie.
Sky News paviedamlaje, što padčas vučeńniaŭ žurnalistam pakazali ŭmoŭny televizijny repartaž, jaki pa sutnaści apisvaje pačatak Treciaj suśvietnaj vajny. U im viadučy raskazvaje pra toje, što rasijskija vojski tolki što atakavali try dziaržavy Bałtyi.
Paśla hetaha brytanskija vajennasłužačyja ŭ składzie ARRC adpravilisia ŭ Estoniju, dzie byŭ razhornuty štab z prykładna 500 supracoŭnikaŭ z bolš čym 20 dziaržaŭ. Im treba było kaardynavać dziejańni prykładna 100 tys. vajennych NATA, jakija adbivajuć rasijskuju ahresiju, skazana ŭ publikacyi.
Daily Mirror ŭdakładniaje, što da brytanskich vajennych dałučylisia amierykanskija siły i ŭ chodzie vučeńniaŭ adpracoŭvaŭsia scenaryj, pa jakim płatforma łondanskaha mietro pieratvaryłasia ŭ «bunkier, raźmieščany dzieści ŭ stalicy Estonii Talinie».
«Scenaryj, jaki vy zaraz ubačycie, naŭmysna pryznačany na 2030 hod, tamu što mienavita tady my ličym pahrozu napadu Rasii najbolš vostraj», — skazaŭ u paviedamleńni dla ŭdzielnikaŭ vučeńniaŭ kamandujučy ARRC hienierał-lejtenant Majk Ełvis.
Jak adznačaje Sky News, padčas inšych padobnych vučeńniaŭ NATA Rasiju zvyčajna farmalna nie abaznačajuć jak patencyjnaha praciŭnika. Zamiest hetaha adpracoŭvajucca dziejańni suprać niejkaj umoŭnaj dziaržavy, pad jakoj usie ŭdzielniki nieaficyjna ŭsio roŭna majuć na ŭvazie Rasiju.
Jak prachodzili vučeńni
Brytanskija vajennyja tłumačać, što stancyja mietro była vybrana dla praviadzieńnia vučeńniaŭ jak prykład pieratvareńnia hramadzianskaha abjekta ŭ vajenny.
«Raniej my razhortvalisia ŭ pałatkach i na adkrytych prastorach, ale zatym pieramiaścilisia ŭ kamiercyjnyja budynki, anhary dla samalotaŭ, a ciapier — i ŭ padziemnyja łakacyi», — skazaŭ adzin z kamandziraŭ padčas vučeńniaŭ.
«Pry pracy pad ziamloj my pakidajem značna mienš śladoŭ, nas tady składaniej vyjavić, a značyć, heta pavialičvaje našy šancy pieražyć napad», — dadaŭ jon.
«Heta ŭrok, jaki ŭžo vyvučyła Ukraina, a taksama našy partniory pa NATA na ŭschodnim fłanhu Jeŭropy, — skazaŭ aficyjny pradstaŭnik brytanskaj armii. — Pieramiaščeńnie pad ziamlu — heta nie novaŭviadzieńnie, heta stratehija vyžyvańnia».
Jon rastłumačyŭ, što «tuneli stancyi Charing Cross stali miescam praviadzieńnia vučeńniaŭ, pakolki jany nie vykarystoŭvajucca, u ich dastatkova miesca dla razhortvańnia paŭnavartasnaha kamandnaha punkta, i, što samaje važnaje, jany raźmieščany ŭ samym centry vialikaha horada».
«Heta dakazvaje, što takaja schiema moža pracavać navat u samych składanych haradskich umovach z usich, što možna ŭjavić».
«Vajna va Ukrainie nahadała śvietu pra niazručny, ale praŭdzivy fakt: pahrozy miru ŭ Jeŭropie — nie tearetyčnyja i nie addalenyja. Rasija mabilizavała dla vajny ŭsiu svaju ekanomiku, industryju i armiju. Na konie staić biaśpieka ŭsich biez vyklučeńnia krain NATA», — zajaŭlaje armija.
Z padziemnaha kamandnaha centra ažyćciaŭlałasia kiraŭnictva dziejańniami vajennych na ziamli, u pavietry, na mory i ŭ kibierprastory.
Tajemnaja apieracyja
Arhanizatary vučeńniaŭ zrabili ŭsie mahčymyja namahańni, kab ich praviadzieńnie zastavałasia niezaŭvažanym.
28‑hadovy brytanski vajenny śpiecyjalist Ismaiła Kisej raskazaŭ, što jon pavinien byŭ prybyć na stancyju mietro ŭ hramadzianskaj vopratcy i tolki paśla pravierki dakumientaŭ pieraapranucca ŭ vajennuju formu.
«Ja ŭspomniŭ pra svaje łondanskija karani i apranuŭsia jak usie ŭ Łondanie, kab ničym nie adroźnivacca ad miascovych žycharoŭ, kab nichto ničoha nie zapadozryŭ. Ja vyhladaŭ, jak zvyčajny čałaviek, jaki jedzie na pracu», — kaža jon.
Siamja vajskoŭca ličyła, što jon znachodzicca ŭ adpačynku.
Ciapier čytajuć
«Ja jedu natchnicca ŭkraincami». Śviatłana Cichanoŭskaja pačała aficyjny vizit va Ukrainu4
Kamientary
Atrymałasia, što vajna heta vielmi doraha, navat dla bienzakałonki. Jany navat adzin front nie ŭ stanie ŭtrymać zaraz, jaki druhi?
A tak, navat kali łukašysty dałučany - heta, jak kazaŭ Statkievič, tolki pavialičyć kolkaść biezymiennych mohiłak u Biełarusi.