Ranicaj 21 studzienia ŭłady samaabvieščanaj «DNR» paviedamili pra abstreł rynku «Mierkuryj» u Kiraŭskim rajonie Daniecka. Paśla źjaviłasia infarmacyja ad kiraŭnika «DNR» Dzianisa Pušylina, što padčas hetaha abstrełu zahinuli 27 čałaviek mirnych žycharoŭ, a 25, uklučajučy dvuch padletkaŭ — paranienyja. Ukrainskija vajskoŭcy svaju datyčnaść da hetaha abstrełu abvierhli, i analiz dastupnych faktaŭ prymušaje stavicca da ich słoŭ surjozna, piša ŭ svaim telehram-kanale vajskovy ekśpiert Jan Maćviejeŭ.
Praanalizavaŭšy dastupnyja, vielmi abmiežavanyja materyjały, ja zrabiŭ vysnovu, što pryjarytetnaja viersija — ataka z boku rasijskich vajskoŭcaŭ. Vierahodniej za ŭsio, z metaj pravakacyi i zapałochvańnia nasielnictva na akupavanaj terytoryi.
Čamu ja zrabiŭ takuju vysnovu? Dla pačatku pahladzicie na fota ź miesca traplańniaŭ. Budźcie aściarožnyja, na fotazdymkach cieły zahinułych. Adzin z bojeprypasaŭ trapiŭ u dreva, što daje mahčymaść vyznačyć prykładny siektar abstrełu. Heta zachad — paŭnočny zachad. Mienavita tam znachodzicca front.
My nie bačym vialikich varonak, jakija byli b pry atacy 155-mm, 152-mm i 122-mm fuhasnymi bojeprypasami. Adnak paškodžańni davoli mahutnyja dla asobnych kasiet kasietnych bojeprypasaŭ.
Pa maštabach razbureńnia padobnyja na ŭździejańnie 122-mm rakiet «Hradu» abo inšych małakalibiernych RSZA.
Ale ŭ takim vypadku amal zaŭsiody majucca bujnyja abłomki, časta jany navat tyrčać z varonak. Kali jany byli, to čamu nie patrapili na videa ci fota?
Naohuł, nijakich istotnych abłomkaŭ, u tym liku 155-mm snaradaŭ (a heta aficyjnaja viersija rasijskich uładaŭ), nie pakazali.
Akramia taho, traplańnie 155-mm snarada surjozna b razburyła i abpaliła mašyny vakoł varonki. 122-mm RSZA zrabiła b toje ž samaje. Tut ža ahniavoje paražeńnie akazałasia minimalnym, fuhasnaje — taksama słabym, ludzi zahinuli ad askiepkaŭ.
Učora źjaviłasia infarmacyja, što abstreł moh być zrobleny z 120-mm minamiota. Ja pravieryŭ karcinu traplańniaŭ i askiepkavych paškodžańniaŭ ad 120-mm min z dapamohaj voś hetaha videa. Akazałasia, što i varonka (ź nievialikaj papraŭkaj na asfalt), i paškodžańni vielmi padobnyja. Vy možacie acanić sami. Navat dym paśla traplańnia padobny — na 9:00 u roliku.
Zastałosia zrazumieć, chto abstrelvaŭ. 120-mm minamioty ŭ roznych varyjantach majuć davoli abmiežavanuju dalokaść u rajonie 7-8 kiłamietraŭ. Pry vykarystańni aktyŭna-reaktyŭnych snaradaŭ jana ŭzrastaje da 13 km.
Ale voś u čym sprava — ad rynku ŭ Tekstylščyku da linii frontu — 11 ź lišnim kiłamietraŭ. Zvyčajnym bojeprypasam naohuł nie dastać, aktyŭna-reaktyŭnym — na miažy, dy jašče i ŭ niepasrednaj blizkaści ad pieradavoj. Kali ŭžo USU i chacieli b abstralać Danieck voś takim čynam, to mahli b prosta vykarystoŭvać «Hrad», navošta ryzyka ź minamiotam?
Tamu ja dumaju, što abstrelvali z padkantrolnaj Rasiei terytoryi z boku frontu.
Jak spraviadliva zaŭvažyŭ Rusłan Levijeŭ u zvodcy, dokazaŭ niedastatkova, kab zrabić kančatkovyja vysnovy. Adnak na asnovie taho, što ŭžo majecca, ja liču asnoŭnaj viersijaj mienavita abstreł rasijskimi vojskami z vykarystańniem minamiotnych min kalibra 120-mm.
Viersiju z vykarystańniem RSZA małoha kalibru, u tym liku z boku USU — liču značna mienš vierahodnaj. Ale całkam admaŭlać jaje nielha.
Aficyjnaja viersija rasijskich uładaŭ pra 155-mm snarady niedarečnaja i chutčej słužyć dokazam suprać rasijskich vajskoŭcaŭ.
Čytajcie taksama:
Ukrainskija vajskoŭcy abvierhli abstreł Daniecka, u časie jakoha zahinuli 27 čałaviek
Ciapier čytajuć
«Kali ŭžo siudy prylacić ukrainskaja rakieta!» Vyzvaleny žurnalist Jaŭhien Mierkis raskazaŭ pra škłoŭskuju kałoniju10
Kamientary