Na minskich Kalvaryjskich mohiłkach źbirajucca adnavić pachavalni i rekanstrujavać kaścioł
Pra maštabnyja płany pa rabotach na Kalvaryjskich mohiłkach paviedamlaje «Minskaja spadčyna». Śpiecyjalisty arhanizacyi majuć namier surjozna ŭziacca za pabudovy, jakija adnosiacca da historyka-kulturnych kaštoŭnaściaŭ krainy, ale paśpieli stracić prezientabielny vyhlad, piša «Anłajnier».
Havorka idzie pra šeść kaplic-pachavalniaŭ, uvachodnuju bramu i kaścioł Uzvyšeńnia Śviatoha Kryža. Usie abjekty płanujuć adrestaŭravać, a pierad tym vynieści na hramadskaje abmierkavańnie.
Miarkujučy pa padadzienaj aficyjnaj infarmacyi, zapłanavana vykanać ramont dachu nad asnoŭnaj častkaj budynka kaścioła z zamienaj krokviennaj sistemy, rekanstrujavać i restaŭravać vonkavyja ścieny budynka, a taksama pravieści kapitalny ramont sklapieńniaŭ, uznaviŭšy zapaŭnieńni akonnych i dźviarnych prajomaŭ, dekaratyŭnych elemientaŭ fasadaŭ pa zachavanych aŭtentyčnych uzorach.
Paśla taho śpiecyjalisty płanujuć uziacca za ramont i adnaŭleńnie ŭnutranych interjeraŭ budynka kaścioła, prystasavańni sistem aciapleńnia (budzie vykarystana elektraabstalavańnie), videanazirańnia, apaviaščeńni pra pažary. Budzie zamieniena taksama ŭsia pravodka, praviedzienyja ramont padmurka i admostak.
Uvachodnuju bramu taksama buduć adnaŭlać: dekaratyŭnyja elemienty i bareljef užo paśpieli častkova razburycca. Dy i ŭ cełym joj patrebny kapitalny ramont.
Kaplicy-pachavalni, častka ź jakich napałovu razburanaja, buduć adnaŭlać na padstavie dakumientalnych historyka-archiŭnych materyjałaŭ abo anałahaŭ.
Usich ludziej, jakim jość što skazać z hetaj nahody, zaprašajuć pryniać udzieł u hramadskim abmierkavańni. Jano adbudziecca ŭ pieryjad z 5 pa 19 lutaha 2024 hoda ŭklučna. Ekspazicyja (vystava) abjekta budzie raźmieščana ŭ faje pieršaha paviercha budynka administracyi Frunzienskaha rajona. Prezientacyja materyjałaŭ prajekta budzie raźmieščana na aficyjnym sajcie administracyi rajona.
Vykazać svaje zaŭvahi i prapanovy možna ŭ knizie ŭliku naviedvalnikaŭ ekspazicyi abjekta z 5 pa 19 lutaha 2024 hoda ŭklučna, a taksama ich možna nakiravać arhanizataru hramadskaha abmierkavańnia z paznakaj «hramadskaje abmierkavańnie» pa 19 lutaha 2024 hoda ŭklučna (paštovy adras: 220073, h. Minsk, vuł. Kalvaryjskaja, 39, elektronny adras: [email protected]).
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza19
Kamientary