Praklon biełaruskich siłavikoŭ. Jak pamirajuć ludzi ŭ pahonach paśla 2020 hoda — danyja «Kibierpartyzanaŭ»
Paśla 2020-ha pačałasia chvala śmierciaŭ ludziej u pahonach. Časta ich žyćci zakančvajucca dziŭna, i heta zusim nie pomsta biełarusaŭ, piša «Biełsat».
U Voršy na pracoŭnym miescy 4 lutaha raptoŭna pamior načalnik rajonnaha ŭpraŭleńnia ŭnutranych spravaŭ Siarhiej Barviankoŭ. Pa nieaficyjnych danych, pryčynaj śmierci stali prablemy z sercam.
U listapadzie minułaha hoda hetak ža raptoŭna i taksama na pracoŭnym miescy pamior namieśnik načalnika Ščučynskaha RAUS Siarhiej Asavik.
U červieni 2022 hoda pamior načalnik adździeła achovy pravaparadku i prafiłaktyki (AAPP) Baranavickaha HAUS Alaksiej Hiećman — napiaredadni pry kupańni jon skoknuŭ u vadu i złamaŭ šyju.
Niabožčyki-siłaviki byli datyčnyja da represij 2020 hoda: pad kiraŭnictvam Siarhieja Barviankova adbyvalisia palityčnyja represii; Siarhiej Asavik zdymaŭ apazicyjnyja mitynhi na kamieru i vyklikaŭ AMAP suprać pratestoŭcaŭ; Alaksiej Hiećman iłžeśviedčyŭ u sudach, fabrykavaŭ administracyjnyja i kryminalnyja spravy suprać haradžan.
Aljans rasśledavalnikaŭ Biełarusi vyvučyŭ unutranyja dakumienty MUS i vyjaviŭ, što z 2020 hoda pa roznych pryčynach syšli z žyćcia jak minimum niekalki dziasiatkaŭ siłavikoŭ roznych čynoŭ i ranhaŭ.
Siarod pamierłych daminujuć supracoŭniki Departamienta achovy MUS (DA MUS). Jany pamirali doma, na pracoŭnych miescach, u miedyčnych ustanovach.
Časta ŭ słužbovych spravazdačach 2020—2021 hadoŭ apisvajucca pieradśmiarotnyja simptomy — padvyšanaja tempieratura cieła i padazreńnie na pnieŭmaniju, heta značyć prykmiety COVID-19, jaki chadziŭ u tyja hady, ale hetaje zachvorvańnie praktyčna nikoli nie pakazvajecca ŭ paśviedčańniach ab śmierci supracoŭnikaŭ.
Takim čynam, baraćba čynoŭnikaŭ Ministerstva achovy zdaroŭja za pryhožuju statystyku nie abyšła i siłavikoŭ. Jak havorycca, «miortvym nie baluča», a «papiera nie čyrvanieje».
Supracoŭnika Kastryčnickaha (Hrodna) adździeła DA MUS z dyjahnazam «pnieŭmanija» špitalizavali ŭ haradskuju bolnicu. Praź niekalki dzion chvory pamior, u paśviedčańni ab śmierci zapisali «išemičnaja chvaroba serca».
U viciebskuju bolnicu z dyjahnazam «dvuchbakovaja pnieŭmanija lohkich» špitalizavali supracoŭnika Čyhunačnaha (Viciebsk) adździeła DA MUS.
Jamu pastavili dyjahnaz COVID-19, padklučyli da aparata štučnaj vientylacyi lohkich, ale vyratavać nie zmahli, chvory pamior. U raparcie MUS aformlena, što «pryčyna śmierci vyśviatlajecca».
Pamirali siłaviki nie tolki ad COVID-19, ale i ad inšych zachvorvańniaŭ.
24 maja 2020 hoda ŭ reanimacyi Jelskaj rajbalnicy ad šyrokaha infarktu pamior milicyjant hrupy zatrymańnia strajavoha padraździaleńnia milicyi adździaleńnia pa achovie abjektaŭ u haradach Jelsku i Naroŭli Mazyrskaha adździełu DA MUS.
Praz čatyry dni ŭ kardyjałahičnym adździaleńni Navapołackaj haradskoj bolnicy pamior supracoŭnik Navapołackaha adździeła DA MUS, pryčyna śmierci — anieŭryzma aorty, choć za try miesiacy da hetaha jon prajšoŭ MREK, jakaja pryznała jaho prydatnym.
U červieni 2020 hoda ad ankazachvorvańnia pamior 38-hadovy inśpiektar DAI Staŭbcoŭskaha RAUS.
U dakumientach, jakija majucca, źmiaščajecca infarmacyja ab tym, što siłaviki rasstavalisia z žyćciom šlacham samahubstva abo hinuli ŭ vyniku niaščasnych vypadkaŭ, zafiksavanyja śmierci navat pry niavyśvietlenych abstavinach.
U žniŭni 2020 hoda ŭ padvale žyłoha doma paviesiŭsia milicyjant hrupy zatrymańnia Uździenskaha adździełu DA MUS.
6 studzienia 2021 hoda na bryli padjezda šmatpaviarchovaha doma pa vulicy Respublikanskaj, 21 u Lidzie znajšli trup namieśnika načalnika mižrajonnaha adździeła KDK Biełarusi. Miarkujecca, što jon vykinuŭsia z 10 paviercha.
Praz dva dni ŭ vioscy Stukacičy Mienskaha rajona znojdzieny milicyjant hrupy zatrymańnia bataljona milicyi Kastryčnickaha (Miensk) adździeła DA MUS.
22 lutaha staršyna viciebskaha AMAPa sprabavaŭ skončyć žyćcio samahubstvam, pierarezaŭšy vieny na rukach i šyi.
Praź piać dzion u Pinskim rajonie na leciščy znojdzieny paviešanym piensijanier MUS, praz čatyry miesiacy piensijaniera-šybienika znajšli ŭ lesapałasie pry darozie ŭ Bieraściejskim rajonie.
Apoŭdni 21 krasavika 2021 hoda ŭ słužbovym kabiniecie Aršanskaha RUUS (jakim kamandavaŭ niabožčyk Siarhiej Barviankoŭ) z tabielnaha pistaleta zastreliŭsia na toj momant niadaŭna pryznačany načalnik narkakantrolu ŭ zvańni padpałkoŭnika milicyi.
U Maładziečanskim špitali pamior praparščyk milicyi, pavodle aficyjnaj viersii jaho śmierć stała śledstvam niaščasnaha vypadku: sarvaŭsia i zvaliŭsia z budaŭničych lasoŭ.
Zafiksavany vypadak hrupavoj śmierci pry niavyśvietlenych abstavinach niekalkich vysokapastaŭlenych supracoŭnikaŭ.
Uletku na dnie voziera kala vioski Spornaje Babrujskaha rajona znajšli aŭtamašynu Nissan X-Trail. Kali aŭto vyciahnuli z vady, u sałonie znajšli čatyry trupy, siarod zahinułych apaznali miascovaha biźniesoŭca, achoŭnika i dvuch padpałkoŭnikaŭ milicyi.
Naŭmysna ci nie, ale ŭ dakumientach MUS nie ŭkazanaja pryčyna trahiedyi.
Jość i inšyja nie mienš dziŭnyja vypadki.
U Puchavickim rajonie ŭ domie baćkoŭ žonki pry niavyśvietlenych abstavinach raptoŭna pamior major Mienskaj abłasnoj DAI.
U Dziatłavie ŭ svajoj kvatery znojdzieny miortvym supracoŭnik miascovaha adździeła achovy.
Materyjał padrychtavany Aljansam rasśledavalnikaŭ Biełarusi z dapamohaju «Kibierpartyzanaŭ».
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ2
Kamientary