Biełarus, aryštavany ŭ Armienii na zapyt łukašenkaŭskich siłavikoŭ, źviarnuŭsia pa palityčny prytułak
Hramadzianin Biełarusi Jarasłaŭ Novikaŭ, jakoha zatrymali ŭ Armienii pavodle zapytu siłavych struktur łukašenkaŭskaj Biełarusi, źviarnuŭsia da armianskich uładaŭ pa atrymańnie palityčnaha prytułku, paviedamlaje «Radyjo Svaboda».
«Ja ŭčora ŭviečary sustreŭsia ź Jarasłavam. U jaho ŭsio narmalna, nijakich prablem niama. My parailisia, i jon užo padaŭ zajavu ab nadańni prytułku, tamu što jość surjoznyja aściarohi ab jahonym pieraśledzie ŭ vypadku pieradačy Biełarusi i novych abvinavačańniach», — paviedamiŭ «Radyjo Svaboda» juryst Chielsinkskaj asacyjacyi ŭ Armienii Araik Papikian, jaki pradstaŭlaje intaresy Jarasłava Novikava.
Advakat dadaŭ, što Jarasłaŭ Novikaŭ vykanaŭ usie pracedurnyja patrabavańni zakanadaŭstva Armienii ab zvarocie pa palityčny prytułak.
«Zajavu ŭžo padali i vykanali ŭsie nieabchodnyja pracedury i rehłamienty — Jarasłaŭ źviarnuŭsia z takoj zajavaj ciaham 15 dzion paśla jahonaha zatrymańnia», — patłumačyŭ jon.
Araik Papikian paviedamiŭ, što 8 lutaha nakiruje skarhu ŭ apielacyjny sud u Jerevanie na rašeńnie suda pieršaj instancyi ab aryšcie Jarasłava Novikava na 40 dzion.
«My budziem chadajničać ab razhladzie apielacyi ŭ vusnym paradku, ale pa hetym pytańni musić być asobnaje rašeńnie sudździ, jaki budzie razhladać skarhu. Sudździa maje prava adchilić takoje chadajnictva i pravodzić pasiadžeńnie ŭ piśmovym paradku pry adsutnaści bakoŭ. Dla spraviadlivaści, viadoma ž, razhlad u vusnym paradku budzie bolš spraviadlivym i abjektyŭnym», — udakładniŭ advakat Jarasłava Novikava.
Raniej sud Armienii 4 lutaha ŭziaŭ Jarasłava Novikava pad vartu na 40 dzion dla dalejšaj pieradačy ŭładam Biełarusi paśla atrymańnia adpaviednych dakumientaŭ ź Minska.
Hramadzianina Biełarusi Jarasłava Novikava zatrymali 2 lutaha ŭ Armienii pry pierasiačeńni miažy z Hruzijaj, kali vyśvietliłasia, što jaho ŭłady Biełarusi abviaścili ŭ miždziaržaŭny vyšuk SND pavodle faktu ŭchileńnia ad słužby ŭ vojsku. Raniej jamu praciahnuli termin utrymańnia pad vartaj.
Raniej Novikaŭ płanavaŭ pierajechać z Hruzii ŭ Bałharyju, ale nie atrymaŭ vizy. Jamu paraili atrymać nieabchodnuju vizu na radzimie, ale Novikaŭ tudy nie pajechaŭ praz ryzyku być aryštavanym. Zamiest hetaha jon adpraviŭsia ŭ susiedniuju Armieniju, kab padacca na vizu tam.
Advakat biełarusa Jarasłava Novikava paviedamiŭ, što biełaruskija dakumienty, na padstavie jakich sud uchvaliŭ rašeńnie ab aryšcie, nie adpaviadali zakanadaŭstvu Armienii i Jeŭrapiejskaj kanviencyi.
Błohier Siaroha z Rasii pryjechaŭ na Zybickuju z kachanaj błohierkaj Aniečkaj. Vynik: źbity im biełarus u komie, a Siaroha na 5,5 hoda za kratami10
Kamientary