U prajekt 13-ha pakieta sankcyj Jeŭrasajuza trapiła biełaruskaje abaronnaje pradpryjemstva
Jak stała viadoma «Radyjo Svaboda» ad krynicy ŭ Brusieli, u čarnavy varyjant 13-ha sankcyjnaha śpisu suprać Rasii, jaki Jeŭrasajuz maje pryniać da druhoj hadaviny rasijskaha ŭvarvańnia va Ukrainu 24 lutaha, trapiła biełaruskaja kampanija «Pielenh», jakaja raspracoŭvaje i vyrablaje optyka-elektronnuju pradukcyju.
«Pielenh» — viadučaje pradpryjemstva pa raspracoŭcy i vytvorčaści optyka-elektronnaj pradukcyi vajskovaha i cyvilnaha pryznačeńnia. AAT «Pielenh» vyrablaje i pastaŭlaje kamplektujučyja dla vytvorčaści rasijskaj artyleryi i vajskovaj techniki (naprykład, bronietransparcioraŭ BTR-82A), jakuju Uzbrojenyja siły Rasii vykarystoŭvajuć u vajnie suprać Ukrainy.
«Takim čynam, AAT «Pielenh» materyjalna padtrymlivaje dziejańni, jakija padryvajuć i pahražajuć terytaryjalnaj cełasnaści, suverenitetu i niezaležnaści Ukrainy», — havorycca ŭ abhruntavańni sankcyj.
Raniej AAT «Pielenh» užo trapiŭ pad sankcyi ZŠA, Vialikabrytanii i Ukrainy.
U ramkach prahramy vajskova-techničnaha supracoŭnictva Biełarusi i Rasii da 2025 hodu AAT «Pielenh» i rasiejski NDI «Sihnał» planujuć stvaryć małahabarytny aŭtamatyzavany kompleks srodkaŭ artyleryjskaha padraździaleńnia dla rasijskaj armii, prydatny dla našeńnia abo pieravozki.
Taksama ŭ prajekcie sankcyjnaha śpisu apynuŭsia ŭradženiec Biełarusi — Vasil Mikałajevič Šurpanaŭ, uradženiec vioski Miežanin Klimavickaha rajona Mahiloŭskaj vobłaści, 1957 hoda naradžeńnia. Jon hienieralny dyrektar AAT «Nižaharodski mašynabudaŭničy zavod». Heta rasijskaje vajskova-pramysłovaje dziaržaŭnaje pradpryjemstva, jakoje zajmajecca siarod inšaha raspracoŭkaj artyleryjskich i rakietnych sistem, u tym liku zienitnych rakietnych kompleksaŭ S-300, jakija znachodziacca na ŭzbrajeńni rasijskaha vojska.
Ahułam u novy sankcyjny śpis užo trapili 63 asoby i 55 arhanizacyj. ES ličyć ich «adkaznymi za dziejańni dla padryvu abo pahrozy terytaryjalnaj cełasnaści, suvierenitetu i niezaležnaści Ukrainy».
Śpis źbirajucca dapoŭnić na nastupnym tydni, a ŭvohule 13-y pakiet sankcyj ES płanujuć pryniać da 24 lutaha.
Anžalika Mielnikava tydzień praviała na Šry-Łancy i vylecieła ź dziećmi ŭ Dubaj37
Anžalika Mielnikava tydzień praviała na Šry-Łancy i vylecieła ź dziećmi ŭ Dubaj
Doktarku Alenu Mikałajevu padčas vajny adpravili na Vaładarku za dapamohu habrejam — u XXI stahodździ tam ža apyniecca jaje praŭnučka Maryna Zołatava33
Kamientary