«Heta biazmozhła, heta haniebna». Bajden rezka abrynuŭsia na Trampa za jaho pramovy pra niežadańnie abaraniać sajuźnikaŭ pa NATO
«Nivodzin inšy prezident u našaj historyi nikoli nie schilaŭsia pierad rasijskimi dyktatarami. Dazvolcie mnie całkam vyrazna zajavić: ja nikoli nie schilusia», — skazaŭ prezident ZŠA.
Prezident ZŠA Džo Bajden nazvaŭ biazmozhłaj i haniebnaj zajavu jaho patencyjnaha supiernika na prezidenckich vybarach Donalda Trampa ab niežadańni abaraniać sajuźnikaŭ pa NATO, piša Bi-bi-si.
Džo Bajden pryśviaciŭ vykazvańniam Trampa častku svajoj zajavy dla presy, hałoŭnaj temaj jakoj byŭ zakon ab šmatmiljardnaj vajskovaj dapamozie Ukrainie i inšym sajuźnikam i jaho prachodžańnie praz Kanhres.
Zaklikaŭšy śpikiera Pałaty pradstaŭnikoŭ, adnadumca Trampa Majka Džonsana pastavić zakonaprajekt na hałasavańnie i vykazaŭšy ŭpeŭnienaść, što jon heta hałasavańnie projdzie, Bajden dadaŭ, što apošnija vykazvańni Trampa dadajuć terminovaści i važnaści spravie padtrymki Złučanymi Štatami sajuźnikaŭ.
«Nivodzin inšy prezident u našaj historyi nikoli nie schilaŭsia pierad ruskimi dyktatarami. Dazvolcie mnie całkam vyrazna zajavić: ja nikoli nie schilusia. Dy Boža moj, heta ž biazmozhła, heta haniebna, heta niebiaśpiečna. Heta nie pa-amierykansku», — tak prezident acaniŭ vykazvańni eks-prezidenta.
Donald Tramp na minułym tydni na mitynhu ŭ Paŭdniovaj Karalinie raspavioŭ pra razmovu, jakaja byccam by była ŭ jaho ź lidaram adnoj z krain NATO na samicie aljansu.
Jak raspavioŭ Tramp, hety lidar pacikaviŭsia, ci pryjduć ZŠA na dapamohu jahonaj krainie ŭ vypadku napadu Rasiei, navat prytym, što jahonaja kraina nie vykonvaje pryniaty ŭ NATO narmatyŭ vajskovych vydatkaŭ 2% ad VUP.
«Ja skazaŭ: vy nie zapłacili, vy praterminavali? — nibyta adkazaŭ Tramp kiraŭniku nienazvanaj krainy. — Nie, u takim vypadku ja nie budu vas abaraniać, bolš za toje, ja budu zaachvočvać ich rabić usio, što im zachočacca. Vy pavinny płacić pa svaich rachunkach»»
Bajden u aŭtorak zajaviŭ, što Tramp stavicca da NATO jak da instrumienta vymahalnictva.
«Pakul ja — prezident, kali Pucin napadzie na sajuźnika pa NATO, Złučanyja Štaty buduć abaraniać kožnuju calu terytoryi NATO», — zapeŭniŭ Bajden.
Pierad hetymi frazami, kažučy pra zakonaprajekt ab dapamozie Ukrainie i inšym sajuźnikam, Bajden źviarnuŭsia da čalcoŭ Pałaty pradstaŭnikoŭ ad Respublikanskaj partyi: «Vy źbirajeciesia padtrymlivać Ukrainu ci vy źbirajeciesia padtrymać Pucina? Vy za Amieryku ci za Trampa?»
Džo Bajden — pradstaŭnik Demakratyčnaj partyi, jaki da taho ž usio žyćcio zajmaŭsia źniešniaj palitykaj, i jon ličyć, što ZŠA, jak viadučaja demakratyčnaja dziaržava, abaviazany aktyŭna ŭdzielničać u suśvietnych spravach i ŭ tym liku ŭ baraćbie z aŭtarytarnymi režymami.
Tramp ža ź jaho łozunham »Amieryka pierš za ŭsio« na słovach zaŭsiody byŭ schilny da izalacyjanizmu i, u pryvatnaści, nieadnarazova zajaŭlaŭ, što ZŠA nie pavinny dapamahać tym sajuźnikam pa NATO, što nie chočuć vykonvać narmatyŭ vajennych vydatkaŭ u 2% VUP.
Abaviazańnie davieści vajskovyja vydatki da hetych dvuch adsotkaŭ VUP krainy NATO ŭziali na siabie jašče ŭ 2014 hodzie, paśla zachopu Rasiejaj Kryma i raźviazvańnia vajny ŭ Danbasie. Pry hetym dasiahnuć hetaha aryjentyru sajuźniki paabiacali adzin adnamu vielmi niachutka — da 2030 hoda.
Poŭnamaštabnaje ŭvarvańnie Rasii va Ukrainu padšturchnuła krainy NATO, i ciapier, pavodle papiarednich padlikaŭ aljansu, hetuju normu vykonvajuć 18 z 31 krainy błoka. ZŠA vydatkoŭvajuć na ŭzbrojenyja siły 3,5% svajho VUP, i ŭ absalutnych ličbach ich vajskovyja vydatki našmat bolšyja, čym vydatki ŭsich astatnich čalcoŭ NATO razam uziatych.
«Ja nie budu vas abaraniać, budu zaachvočvać Rasiju rabić usio, što im zachočacca». Tramp zhadaŭ staruju razmovu z sajuźnikami pa NATA
Zachodnija palityki adreahavali na słovy Trampa pra admovu abaraniać ad Rasii
Jeŭropie treba dziesiać hadoŭ, kab całkam padrychtavacca da abarony — kiraŭnik Rheinmetal
Jakija krainy ryzykujuć zastacca biez abarony, kali prezidentam ZŠA stanie Donald Tramp
Kamientary