Dziaŭčyna pierabrała narkotykaŭ i zasnuła ŭ vańnie, zatapiŭšy susiedziaŭ. I heta byŭ tolki pačatak prablem
Maładaja žančyna ŭ Minsku, užyŭšy narkotyki, pajšła pryniać vannu i tam straciła prytomnaść. Kali vada zatapiła susiedziaŭ, da jaje pryjšli, i ŭ pracesie vyśvietliłasia, što fihurantka nie tolki ŭžyvała, ale i raspaŭsiudžvała psichatropnyja rečyvy, piša ahienctva «Minsk-Naviny».
Uviečary 12 lutaha žychary kvatery doma na vuł. Kiryły Turaŭskaha zaŭvažyli, što ścieny i stol u vannym pakoi i kalidory namokli — zatapili susiedzi źvierchu. Pakolki sproby dastukacca da haspadaroŭ nie mieli pośpiechaŭ, vyklikali ratavalnikaŭ.
Supracoŭniki MNS znajšli ŭ vannym pakoi nieprytomnuju maładuju žančynu, jakuju da takoha stanu pryviała vostraja narkatyčnaja intaksikacyja. Śledča-apieratyŭnaja hrupa zrabiła ahlad asabistych rečaŭ paciarpiełaj, a jaje zaplečnik i mabilny telefon kanfiskavała dla zachavańnia majomaści.
Praz tydzień paśla vypiski z balnicy žančyna pryjšła ŭ milicyju pa svaje rečy i kab dać tłumačeńni adnosna taho, što adbyłosia. Fakt užyvańnia narkotykaŭ jana nie admaŭlała. Ale ŭ jaje telefonie znajšli niezvyčajnuju pierapisku, ź jakoj vynikaje, što jana nie tolki sama ŭžyvała narkotyki, ale i raspaŭsiudžvała ich.
U vyniku vyśvietliłasia, što dziaŭčyna ŭładkavałasia ŭ internet-kramu pa prodažy narkotykaŭ na pasadu «miniora», jaje dziejańni kuryravaŭ apieratar narkašopa. U toj dzień, atrymaŭšy zadańnie, jana pavinna była zabrać «skarb», ale pierad hetym užyła alfa-PVP i zasnuła ŭ vannaj z uklučanaj vadoj.
Paśla atrymańnia kaardynataŭ raźmiaščeńnia tajnika milicyjaniery adpravilisia ŭ lasny masiŭ pablizu Kopišča pad Minskam, dzie vyjavili i kanfiskavali skrutak ź psichatropnym rečyvam.
Ciapier Minskim rajonnym adździełam Śledčaha kamiteta ŭ dačynieńni da 33-hadovaj fihurantki ŭzbudžanaja kryminalnaja sprava pa č. 3 art. 328 KK («niezakonnyja z metaj zbytu vyrab, pierapracoŭka, nabyćcio, zachoŭvańnie, pieravozka abo pierasyłka albo niezakonny zbyt narkatyčnych srodkaŭ, psichatropnych rečyvaŭ albo ich prekursaraŭ abo anałahaŭ u bujnym pamiery»).
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja88
Kamientary
paśla hetaha milicyjantaŭ nichto nie bačyŭ?