CVK: Pucin pieramahaje na vybarach z rekordnymi 87,33%. A ŭ Čačni ŭ jaho naohuł 99%
Padličana 99,59% hałasoŭ. Vybary ŭ Rasii prachodzili praź miesiac paśla zabojstva ŭ kałonii hałoŭnaha rasijskaha apazicyjaniera Alaksieja Navalnaha.
Pa aficyjnych danych, paśla padliku 99,52 pracenta pratakołaŭ Pucin nabraŭ 87,33% hałasoŭ.
Na druhim miescy — kandydat ad KPRF Mikałaj Charytonaŭ z 4,3% hałasoŭ. Uładzisłavu Davankovu ad partyi «Novyja ludzi» dastałasia 3,81% hałasoŭ. Leanidu Słuckamu ad ŁDPR aficyjna naličyli 3,2% hałasoŭ.
Bolš za ŭsio hałasoŭ vybarščykaŭ u pracentnych suadnosinach Pucin nabraŭ u Čačenskaj Respublicy — tam za jaho prahałasavała 98,99%.
U Kiemieraŭskaj vobłaści jon atrymaŭ 95,73% hałasoŭ, u Tyvie — 95,37%, u Habrejskaj aŭtanomnaj vobłaści— 92,35%, u Sarataŭskaj vobłaści — 91,66%.
U Maskvie Pucin nabraŭ 85,57%, u Maskoŭskaj vobłaści — 86,19%.
Va ŭsich hetych rehijonach apracavana 100% pratakołaŭ.
Samaja vysokaja jaŭka (bolš za 90%) zafiksavana ŭ Čačni, Kiemieraŭskaj vobłaści, Tyvie, Kabardzina-Bałkaryi i Paŭnočnaj Asiecii. Rekordnaja jaŭka taksama zafiksavana na Dalokim Uschodzie.
Vybary pravodzili i na anieksavanych u 2022-m ukrainskich terytoryjach. U «ŁNR» Pucinu aficyjna dali 94,12% hałasoŭ, u «DNR» — 95,23%. Na častcy terytoryi Chiersonščyny, anieksavanaj Rasijaj, za Pucina 88,12% hałasoŭ, na častcy terytoryi Zaparožža — 92,95%.
Papiarednija vyniki vybaraŭ CVK maje namier padvieści ŭ paniadziełak.
Jašče da abviaščeńnia vynikovych ličbaŭ Pucin daŭ pres-kanfierencyju. Vysokuju jaŭku na vybarach jon źviazaŭ z «dramatyzmam situacyi» i tym, što «Rasija sa zbrojaj u rukach abaraniaje svajo raźvićcio».
Jon vykazaŭsia taksama pra akcyju prychilnikaŭ Navalnaha.
«Ja zaklikaŭ pryjści na vybary. Kali apazicyja tak ličyła, dobra, małajcy. Nakolki ja viedaju, heta nie mieła efiektu. Ale niekatoryja psavali biuleteni — heta drenna, jany vyrašyli nahadzić tym ludziam, jakija pryjšli vykanać svoj hramadzianski abaviazak. Heta niedemakratyčna».
Apazicyjnyja kandydaty ci tyja, chto nie padtrymlivaje vajnu, — sproby rabili Kaciaryna Duncova i Barys Nadzieždzin — na hetyja vybary dapuščany nie byli.
Za miesiac da vybaraŭ u kałonii za palarnym kruham pamior apazicyjanier Alaksiej Navalny, jaki viarnuŭsia ŭ Rasiju paśla taho, jak Pucin sprabavaŭ jaho atrucić «Navičkom», i adrazu ŭ aeraporcie byŭ zatrymany.
Spravu Navalnaha praciahnuła jaho žonka Julija.
Paplečniki Navalnaha na hetych vybarach zaklikali rasijan dałučycca da akcyi «Apoŭdni suprać Pucina» — pryjści na vybarčyja ŭčastki ŭ adzin čas, kab pakazać, jak šmat niazhodnych ź ciapierašniaj uładaj.
Mnohija rasijanie psavali biuleteni, byli vypadki, kali zalivali urny zialonkaj. A ŭ Piermi piensijanierka navat uzarvała pietardu ŭ tualecie na vybarčym učastku.
Pa danych «OVD-Info» 17 sakavika na vybarach u rasijskich haradach zatrymali 85 čałaviek.
Łosik: Ja musiŭ vyjści ŭ červieni razam ź Bialackim, ale ŭ apošniuju chvilinu nas zamianili na inšych1
Kamientary