U Breście milicyjanta asudzili za padpisku na staronku ŭ fejsbuku i navat praviali pieratrus
Niezrazumieła, čamu siłaviki zacikavilisia svaim kaleham, ale pieratrus u jahonaj kvatery praviali z sankcyi namieśnika prakurora Bresta.
Zvyčajnych biełarusaŭ kožny dzień sudziać za «raspaŭsiud ekstremisckich materyjałaŭ», pryznačajučy im sutki administracyjnaha aryštu abo vialikija štrafy z kanfiskacyjaj telefonaŭ u «dachod dziaržavy». Ale voś sud nad supracoŭnikam MUS za «ekstremizm» — redki vypadak. Žurnalisty BGmedia znajšli taki ŭ banku sudovych rašeńniaŭ, dzie apublikavali pastanovu suda Leninskaha rajona Bresta ad 11 sakavika.
Sud Leninskaha rajona 11 sakavika ŭ adkrytym pasiadžeńni razhledzieŭ administracyjnuju spravu pavodle papularnaha paśla 2020 hoda artykuła — č.2 art.19. 11 KaAP (raspaŭsiud ekstremisckich materyjałaŭ). Sudzili ŭradženca Rasii, u jakoha jość biełaruskaje hramadzianstva. Z pastanovy suda taksama viadoma, što ŭ jaho jość vyšejšaja adukacyja, a pracuje jon u MUS Biełarusi. Žyvie ŭ Breście, vychoŭvaje niepaŭnaletniaje dzicia i dahladaje maci ź invalidnaściu.
Jaho abvinavacili ŭ tym, što jon u nieŭstanoŭleny čas na svajoj staroncy ŭ fejsbuku padpisaŭsia na staronku na litaru T, jakaja ŭklučana ŭ «respublikanski śpis ekstremisckich materyjałaŭ» rašeńniem suda Čyhunačnaha rajona Viciebska. Padpisku na «zabaronieny « resurs znajšli ŭ jaho supracoŭniki AUS Leninskaha rajona Bresta.
Padčas suda jon rastłumačyŭ, što padpisaŭsia ŭ fejsbuku na «staronku T», kali jana jašče nie była pryznanaja «ekstremisckaj». Paźniej jon daviedaŭsia pra isnavańnie «Respublikanskaha śpisu ekstremisckich materyjałaŭ», tamu adpisaŭsia ad bolšaści «zabaronienych» internet-resursaŭ u sacsietkach. Pa niaŭvažlivaści zastałasia tolki padpiska na «staronku». Da jaje jaho kalehi i pryčapilisia. Na dumku suda, čałaviek pryznaŭ vinu častkova.
Z pastanovy suda stała zrazumieła, kali ŭ jaho znajšli «ekstremisckuju» padpisku i pry jakich abstavinach. Viadoma, što 6 sakavika ahledzieli «miesca ździajśnieńnia administracyjnaha pravaparušeńnia»: pieratrus u kvatery, u jakoj pražyvaje mužčyna, sankcyjanavaŭ namieśnik prakurora Bresta. Padčas jaho ahledzieli ŭsie techničnyja pryłady.
A ŭžo ŭ subotu, 9 sakavika, siłaviki vyvučyli płanšet mužčyny i znajšli na jaho staroncy ŭ Facebook tuju samuju «ekstremisckuju» padpisku. Aleha zatrymali ŭ toj ža dzień u 12.46. Raz sud praviali ŭ paniadziełak, 11 sakavika, to vychodnyja mužčyna pravioŭ u IČU Leninskaha RAUS Bieraścia.
Darečy, u «Respublikanskim śpisie ekstremisckich materyjałaŭ» žurnalisty BGmedia nie znajšli staronku ŭ Facebook na litaru «T», jakuju pryznaŭ «ekstremisckaj» sud Čyhunačnaha rajona Viciebska. Takoj staronki ŭ rašeńniach hetaha suda niama. Sam sud pryznaŭ «ekstremisckimi «tolki dźvie staronki ŭ fejsbuku: «Supolnaść biełaruskich anarchistaŭ «Pramień» i staronku «Chartyi97». Mahčyma, u pastanovie suda jość pamyłka druku.
Kamientary
Adzinaje, što padychodzić, – telehram-čat «Tarny/Łučosa (Viciebsk), ale, chutčej za ŭsio, nie, bo nie razumieju, navošta heta bresckamu miantu