«Tureckaj» Southwind Airlines zabaranili lotać nad ES. Siońniašni rejs ź Minska admienieny
Usie rejsy na krasavik źnikli.
U kancy minułaha hoda turecka-rasijskaja avijakampanija Southwind Airlines, źviazanaja z rasijskim Pegas Touristic, pačała vykonvać paloty pa maršrucie Minsk — Stambuł nie praz Rasiju, a nad terytoryjaj ES.
Heta było mahčyma, bo avijakampanija była stvorana tolki ŭ 2022 hodzie i na papierach zajaŭlała, što jany mienavita «tureckaja avijakampanija». Chacia faktyčna adrazu stała zrazumieła, što heta nie tak. Bo za joj staić uładalnik rasijskaha turapieratara Pegas Touristik — Ramazan Akpynar, a sam fłot avijakampanii pieršapačatkova składaŭsia z samalotaŭ rasijskaj avijakampanii Nordwind Airlines.
Ciapier ža situacyja ź ich palotami nad ES rezka źmianiłasia, piša Motolkohelp.
Niderłandskaje avijacyjnaje tavarystva paviedamlaje, što 28 sakavika 2024 h. ES zabaraniŭ Southwind Airlines paloty z Turcyi ŭ ES i praź Jeŭrasajuz.
Heta adbyłosia paśla taho, jak Southwind Airlines padała zajaŭku ŭ Finskaje ahienctva transpartu i kamunikacyj (Traficom) na pačatak palotaŭ u Finlandyju, ale tam im admovili, bo ŭbačyli, što avijakampanija nasamreč nie tureckaja, a rasijskaja.
«My pryjšli da vysnovy, što avijakampanija i jaje kantrol źviazanyja z rasijskimi zacikaŭlenymi bakami», — skazaŭ hiendyrektar Traficom.
Jeŭrapiejskija avijaŭłady ŭ Brusieli pahadzilisia z rašeńniem Traficom i raspaŭsiudzili jaho na ŭvieś ES.
Hetaje rašeńnie ES adrazu ž adbiłasia na Southwind Airlines
Apošni rejs pa maršrucie Stambuł — Minsk nad terytoryjaj ES avijakampanija vykanała 28 sakavika. Nastupny pa tym ža maršrucie (STW625) z 29 na 30 sakavika prachodziŭ užo nad terytoryjaj RF.
A dalej usio zusim niezrazumieła. Samalot, jaki prylacieŭ u Minsk siońnia nočču, pavinien byŭ vylecieć nazad u Stambuł u 01:35, ale hetaha nie adbyłosia — samalot usio jašče ŭ Minsku, a jaho vylet paznačany jak admienieny.
Bolš za toje, z sajta avijakampanii źnikli z prodažu ŭvohule ŭsie bilety na dalejšyja rejsy ŭ/ź Minska.
Ciapier čytajuć
Paśla pajezdki za miežy ES tajamniča źnik Anatol Kotaŭ, byłaja pravaja ruka Paŭła Łatuški42
Kamientary