Žurnalistu Alaksandru Ihnaciuku prysudzili vialiki termin źniavoleńnia
U sudzie Stolinskaha rajona 5 krasavika asudzili 53-hadovaha žurnalista i videabłohiera Alaksandra Ihnaciuka. Palitźniavolenaha pryznali vinavatym u arhanizacyi pratestaŭ u Stolinie i Minsku, paklopie na Łukašenku i vymahalnictvie. Žurnalistu prysudzili 6 hadoŭ kałonii i vialiki štraf, daviedałasia «Viasna». Sud ciahnuŭsia z 15 sakavika i adbyvaŭsia ŭ zakrytym režymie.
Alaksandr Ihnaciuk
Žurnalista pryznali vinavatym pavodle troch artykułaŭ Kryminalnaha kodeksa: č. 1 art. 342 (arhanizacyja dziejańniaŭ, jakija hruba parušajuć hramadski paradak), č. 2 art. 367 (paklop na Łukašenku), č. 1 i č. 2 art. 208 (vymahalnictva).
Zhodna ź viersijaj abvinavačvańnia, Alaksandr Ihnaciuk u žniŭni 2020 hoda, znachodziačysia na terytoryi Stolinskaha i Pinskaha rajonaŭ Bresckaj vobłaści,
«arhanizoŭvajučy hrupavyja dziejańni, jakija hruba parušajuć hramadski paradak i spałučanyja ź vidavočnym niepadparadkavańniem zakonnym patrabavańniam pradstaŭnikoŭ ułady ŭ h. Stolinie i h. Minsku, z metaj publičnaha viadzieńnia destruktyŭnaj dziejnaści, raźmiaściŭ u sacyjalnych sietkach publikacyi, jakija zaklikajuć da hrupavych dziejańniaŭ, jakija hruba parušajuć hramadski paradak i spałučanyja ź vidavočnym niepadparadkavańniem patrabavańniam pradstaŭnikoŭ ułady».
Jon ža nibyta ŭ žniŭni 2020 hoda
«naŭmysna raźmiaściŭ u sietcy internet infarmacyju abraźlivaha i paklopnickaha charaktaru ŭ dačynieńni da Alaksandra Łukašenki, jakaja źmiaščaje zahadzia iłžyvyja, jakija nie adpaviadajuć rečaisnaści, haniebnyja i źnievažajuć honar, hodnaść i aŭtarytet kiraŭnika dziaržavy źviestki, złučanyja z abvinavačvańniem u ździajśnieńni ciažkaha i asabliva ciažkaha złačynstvaŭ».
Akramia hetaha, žurnalista abvinavacili ŭ vymahalnictvie. Tak, zhodna ź viersijaj abvinavačvańnia, Ihanciuk na praciahu 2021 i 2022 hadoŭ
«u karyślivych metach, žadajučy ŭzbahacicca za košt inšych hramadzian, pad pahrozami raspaŭsiudžvańnia paklopnickich źviestak i abviaščeńnia inšych źviestak, jakija paciarpiełyja žadali zachavać u tajamnicy, a taksama haniebnyja i haniać honar, hodnaść i dziełavuju reputacyju, nieadnarazova vymahaŭ hrašovyja srodki i inšuju majomaść u pradprymalnikaŭ Stolinskaha rajona».
Na sudzie Alaksandr vinu pavodle č. 1 art. 342 i č. 2 art. 367 KK pryznaŭ častkova, a pavodle č. 1 i č. 2 art. 208 KK — nie pryznaŭ. Pry hetym jon pryznaŭ zajaŭlenyja pazoŭnyja patrabavańni paciarpiełaha ab spahnańni majomasnaj škody ŭ pamiery 1800 rubloŭ.
U vyniku sud Stolinskaha rajona pryznačyŭ jamu na padstavie č. 1 art. 342 KK pazbaŭleńnie voli na termin dva hady; pavodle č. 2 art. 367 — try hady kałonii; pavodle č. 1 art. 208 KK — adzin hod kałonii, na padstavie č. 2 art. 208 KK — čatyry hady sa štrafam u pamiery 200 bazavych vieličyń na sumu 8000 rubloŭ.
Šlacham častkovaha składańnia asnoŭnych pakarańniaŭ z dałučeńniem dadatkovaha pakarańnia kančatkova žurnalistu pryznačyli pakarańnie ŭ vyhladzie pazbaŭleńnia voli na termin šeść hadoŭ z adbyvańniem pakarańnia ŭ papraŭčaj kałonii va ŭmovach uzmocnienaha režymu sa štrafam u pamiery 200 bazavych vieličyń na sumu 8000 rubloŭ. Taksama pastanoŭlena spahnać ź Ihnaciuka na karyść «paciarpiełaha» majomasny ŭron u pamiery 200 bazavych vieličyniaŭ (1800 rubloŭ).
U žurnalista taksama kanfiskavali noŭtbuk jak «srodak ździajśnieńnia złačynstva».
Alaksandra Ihnaciuka zatrymali 18 lipienia 2023 hoda. Pra heta stała viadoma vypadkova: jon daŭno žyŭ adzin u addalenaj vioscy Pinskaha rajona, a siabry zaniepakoilisia adnosna jahonaha losu paśla taho, jak jon ciaham niekalkich tydniaŭ nie vychodziŭ na suviaź.
MUS apublikavaŭ videa žorstkaha zatrymańnia žurnalista tolki ŭ sakaviku 2024 hoda.
Ciapier čytajuć
Dziaržaŭnyja kanały niečakana pakazali, jak vyhladajuć rezidencyi Łukašenki znutry. Raniej kamiery tudy nie traplali4
Kamientary