Kolki ludziej pavinna prahałasavać na vybarach u KR, kab jany adbylisia?
Užo na hetym tydni, 25 maja, startujuć vybary ŭ Kaardynacyjnuju radu. «Naša Niva» spytała ŭ jaje dziejnaha śpikiera Andreja Jahorava, jakoj ličby ŭdzielnikaŭ hałasavańnia budzie dastatkova dla taho, kab ličyć, što vybary adbylisia.
— Luby ŭzrovień dadatkovaj lehitymnaści, jaki budzie zabiaśpiečany praz hetyja vybary, budzie dobrym. Navat kali prahałasuje tysiača, — kaža Jahoraŭ. —
Kaniečnie, chaciełasia b, kab heta byli dziasiatki i sotni tysiač. Ale my dziejničajem u takich umovach, kali dakładna skazać vielmi ciažka, tamu što my nikoli takoha nie rabili. Apošniaje masavaje hałasavańnie takoha kštałtu praz płatformu «Hołas» prajšło niekalki hod tamu. Tamu skazać, što my budziem mieć ciapier, vielmi składana.
Abaznačanaha parohu jaŭki, jaki dazvolić ličyć, što vybary adbylisia, niama».
Padobny aryjentyr ahučvajuć i ŭ vybarčaj kamisii.
Častku achvotnych prahałasavać adsiače nieabchodnaść mieć na rukach mienavita biełaruski pašpart, chaj i praterminavany. Ni kopija, ni skan dla vybaraŭ nie padyjduć, a heta značyć, što niekatoryja biełarusy sa statusam uciakactva ci ŭ pracesie čakańnia peŭnaj častki dakumientaŭ, a taksama sa zhublenym pašpartam udzielničać u pracesie nie zmohuć.
«Rašeńnie vybarčaj kamisii abmiažoŭvaje mahčymaści takoha hałasavańnia, bo technična źjaŭlajecca šmat prablemaŭ ź vieryfikacyjaj, z mahčymaściu dvajnoha hałasavańnia, z tym, što hetyja dakumienty majuć roznyja standarty. I heta vielmi ciažkaje rašeńnie, škada, što ludzi nie zmohuć prahałasavać. U peŭnym sensie ja adčuvaju piersanalny bol, što tak adbyvajecca. Ale ŭzvažvajučy, razumieju, čamu kamisija pryniała takoje rašeńnie», — udakładniaje Andrej Jahoraŭ.
Raniej my raskazvali, jak budzie prachodzić praces hałasavańnia i nakolki jon budzie biaśpiečnym. Užo siońnia stvorany dla hetaha dadatak Belarus ID pavinien źjavicca ŭ Apple Store i Google Play.
Kamientary