«Mohuć staranna prašmanać, a mohuć adnym vokam hlanuć». Jak ciapier adbyvajecca kantrol na miažy ź Litvoj
Pačynajučy ad 3 červienia Litva ŭviała zabaronu na ŭvoz lubych praduktaŭ i napojaŭ ź Biełarusi, ale paźniej nibyta zrabili pasłableńni. «Naša Niva» pacikaviłasia, što ciapier adbyvajecca z pravozam biełaruskaj pradukcyi ŭ Litvu.
Kali pieršyja sutki praź miažu nielha było pravozić litaralna ničoha, to ciapier ludziam dazvalajuć pravozić cyharety ŭ adkrytych pačkach, a taksama patrebnyja ŭ darozie pradukty vahoj da 2 kh, jakija musiać być raspakavanyja.
Jak pašancuje
Padarožniki, jakija siońnia pierasiakali biełaruska-litoŭskuju miažu praz «Kamienny Łoh», kažuć, što mytniki staranna ahladali ŭsie rečy. Nielha pravozić navat adzin adkryty pačak.
«Dazvalajuć pakinuć tolki 1-2 cyharety, astatniaje treba vykidać. Vadkaści dla vejpaŭ taksama nie prapuskajuć. Usie rečy ŭ nas dahladali staranna, vyviernuli ŭsio. Da ježy stavilisia vybaračna i pa nastroi», — piša adzin z karystalnikaŭ śpiecyjalnaha čata.
Inšyja raspaviadajuć, što mytniki prosiać adkryć čamadany, potym hladziać i pramacvajuć rečy.
«Ale jak pašancuje. Mohuć staranna prašmanać, a mohuć tolki adnym vokam hlanuć ci nie adčyniać sumku naohuł», — pišuć inšyja.
Ludzi, jakija čaściakom jeździać praź miažu, adznačajuć, što paśla 3 červienia čas prachodžańnia miažy pavialičyŭsia.
«Biełarusaŭ chutka prachodziać, a dalej čarha na niejtrałcy, tamu što litoŭcy kožny aŭtobus dahladajuć paŭtary hadziny z-za bolš dbajnaj pravierki».
Aŭtobus, jaki a 6-j ranicy vyjechaŭ ź Minska, u Vilni byŭ a 15-j hadzinie.
Pasažyry adznačyli, što mytniki praviarali bahaž biez asablivaha intaresu.
«Paprasili adkryć valizki, sumki, pahladzieli paviarchoŭna, krychu pamacali i ŭsie».
Pry hetym biełarusy adznačajuć, što ŭ mnohich ludziej z saboj z charčavańnia nie było ničoha, aproč vady — pakolki ŭsio źjeli, pakul stajali ŭ čarzie. Cyharety ŭ adkrytym pačku dazvolili pravieźci, ałkahol pad poŭnaj zabaronaj.
Ludzi, jakija jechali aŭtobusam 9 červienia, kažuć nastupnaje:
«U našym aŭtobusie pałovu valizak pahladzieli, a potym syšli. My byli ŭ samym kancy, nichto nas nie dahladaŭ».
«Tolki ŭ majtki zastałosia zaleźci»
«Abšmanała mytnica ŭsie rečy, tolki ŭ majtki zastałosia zaleźci. Ałkahol, cyharety nielha vieści, praduktaŭ u mianie nie było», — dzielicca ŭražańniami kiroŭca, jaki dniom 11 červienia prajechaŭ miažu na mašynie.
«Prapuskajuć tolki ź ježaj dla asabistaha karystańnia, kali ŭpakoŭka adkrytaja. Ałkahol pad poŭnaj zabaronaj, navat zamiežnaj vytvorčaści z Duty Free», — dzielicca dośviedam pasažyrka aŭtobusa, jaki jechaŭ praz «Bieniakoni».
Niezrazumiełaj zastajecca situacyja z tranzitam. Karystalniki čata kažuć, što litoŭskija mytniki nibyta patrabujuć dekłaravać usie zakrytyja pradukty charčavańnia i napoi, kali čałaviek jedzie tranzitam.
Praz heta achvotnych niešta vieźci niašmat.
Što tyčycca tranzitnych pasažyraŭ, to staŭleńnie da ich roźnicca ŭ zaležnaści ad źmieny i nastroju kankretnaha mytnika.
«Mohuć prapuścić z praduktami i napojami biez asablivych pytańniaŭ, a mohuć pryčapicca. Kali, naprykład, cukierak budzie šmat, to chutčej za ŭsio prymusiać vykinuć», — pišuć u čatach.
Ciapier čytajuć
Stała viadoma, chto lotaŭ na Šry-Łanku razam z Anžalikaj Mielnikavaj i jaje ahientam13
Kamientary