Jak na piensii žyć najlepšaje žyćcio? U instahramie pakazvaje były sienatar Viktar Liskovič
Vice-hubiernatar Hrodzienščyny i člen Savieta Respubliki Viktar Liskovič pakinuŭ vysokija pasady — i zažyŭ u kajf. Jon łović vudaj u taziku płastykavych rybak, zajmajecca na trenažorach i zabivaje ćviki ŭ kałodu. Što adbyvajecca?
Usio prosta: Liskovič atrymaŭ pieradpiensijnuju pasadu — jak havorać, nie bi lažačaha. Ciapier jon staršynia prałukašenkaŭskaha Hrodzienskaha abłasnoha abjadnańnia prafsajuzaŭ.
Zdajecca, były sienatar narešcie pačaŭ atrymlivać asałodu ad pracoŭnych budniaŭ. Heta dobra bačna pa jahonaj staroncy ŭ instahramie. U 2022 hodzie bajnet śmiajaŭsia z taho, što Liskovič prydumaŭ alternatyvu sełfi. Fiškaj sienatara byli dziŭnyja kałažy, na jakich jon nakładaŭ svoj partret na ilustracyi roznych biełaruskich miaścin.
Ciapier Liskovič admoviŭsia ad toj kreatyŭnaj idei, zatoje staŭ čaściej publikavać ryłsy.
Naprykład, na Fiestyvali nacyjanalnych kultur na Aŭhustoŭskim kanale były sienatar łaviŭ u taziku cacačnaj vudaj płastykavych rybak. «Zaraz pačniecca spabornictva pa rybnaj łoŭli!» — nie biez azartu havoryć mužčyna. A ŭ podpisu da videa ŭdakładniŭ: «Tak, heta dziciačaja rybałka, ale akazałasia ŭsio nie tak prosta».
U dziciačym azdaraŭlenčym łahiery «Zoŕka» prafsajuzny staršynia z entuzijazmam pazajmaŭsia na vuličnym trenažory i ahučyŭ vierdykt: «Nu, nidzie ničoha [nie skrypić]… Usio zmazana».
U inšym roliku Liskovič hulaje ŭ šachmaty i prytancoŭvaje ad zadavalnieńnia.
Jašče ŭ adnym ryłs mužčyna sprabuje zabić ćvik u kałodu. Ale ŭ jaho nie vielmi atrymałasia — ćvik tolki pahnuŭsia. «Niešta z prycełam u ciabie», — kamientuje žanočy hołas za kadram.
A na majstar-kłasie pa placieńni z sałomki majstrycha jaho pachvaliła. Viktar radasna ŭśmichajecca pryjemnym słovam i tłumačyć svoj talent: «Chirurh, chirurh». A ŭ podpisie da videa ŭdakładniŭ: «Mnie spadabałasia, cikava!!!».
Vidavočna, karystalniki instahrama acanili novy kantent. Za dva hady kolkaść padpisčykaŭ istotna pavialičyłasia — z 10 tysiač da 16 tysiač čałaviek.
Kamientary