Budsłaŭ 2024. Što treba viedać, źbirajučysia na fest, jaki adkryvajecca siońnia
Sioleta ŭračystaści Maci Božaj Budsłaŭskaj u Nacyjanalnym sanktuaryi projduć 5 i 6 lipienia. Pačatak siońnia a 14-j hadzinie. Pra asablivaści sioletniaha festu raspavioŭ Catholic.by jaho hałoŭny arhanizatar, probašč parafii ksiondz Dźmitryj Dubovik.
Pieradusim śviatar raić usim, chto źbirajecca ŭ hetyja dni ŭ Budsłaŭ, dobra paznajomicca z prahramaj sioletniaha festu, a taksama źviarnuć uvahu na važnyja arhanizacyjnyja momanty.
- Piešyja pilihrymy buduć raźmiaščacca ŭ namiotavym haradku na poli kala vioski Paleśsie, jak zvyčajna.
- Tym, chto źbirajecca na śviata na ŭłasnym aŭtatransparcie, treba viedać, što mašynu daviadziecca pakinuć na parkoŭcy i da Budsłava iści pieški. Z boku Kryvičoŭ parkinh arhanizujecca ŭ vioscy Paleśsie, z boku Daŭhinava — na ŭjeździe ŭ miastečka, kala znaku Budsłaŭ.
- Prachod da kaścioła adbyvajecca tolki praz punkty propusku, dzie ŭsie biez vyklučeńnia prachodziać asabisty dahlad supracoŭnikami słužb biaśpieki. Zabaraniajecca pranosić z saboj kolučyja i režučyja pradmiety, piratechniku, lohkaŭzharalnyja i inšyja niebiaśpiečnyja rečyvy, pradukcyju ŭ šklanoj i mietaličnaj tary, ałkahołnyja napoi.
- Da cudadziejnaha abraza Maci Božaj Budsłaŭskaj u hałoŭnym ałtary bazyliki možna budzie padyści praz centralny ŭvachod u kaścioł, vychad — praz bočnyja navy. Mahčymaść pamalicca pierad abrazom u kaściole budzie na praciahu ŭsiaho festu, u tym liku i ŭnačy.
Adnak kateharyčna zabaraniajecca raźmiaščać na padłozie ŭ śviatyni rečy, raskładać dyvanki i zajmać prachody.
- Dostup za balaski i ŭ stary kaścioł całkam zakryty.
- Malitoŭnyja intencyi buduć zapisvacca ŭ kaściole. Lepš zahadzia padrychtavać zapisanyja na listku intencyi i pieradać ich razam z achviaravańniem adkaznym asobam u kaściole
- Aśviačonuju vadu padčas festu ŭ Budsłavie možna budzie nabrać u svoj posud za studniaj i bramaj ź levaha boku ad kaścioła (na fota vyšej).
- Spoviedź padčas festu budzie adbyvacca jak zvyčajna, u zakrytych ad kamaroŭ namiotach za plabanijaj.
Achviaravańni na patreby ramontu možna budzie pakinuć u kaściole.
Pierad festam ksiondz Dźmitryj Dubovik źviarnuŭsia da ŭsich nieabyjakavych ludziej z prośbaj ab malitoŭnaj i finansavaj padtrymcy dalejšych etapaŭ adnaŭleńnia Budsłaŭskaj śviatyni paśla pažaru, jaki zdaryŭsia tut try hady tamu.
- Padčas festu ŭ Budsłavie z vysokaj dolaj vierahodnaści buduć surjoznyja pieraboi z mabilnaj suviaźziu i dostupam u sieciva, što nieabchodna ŭličvać, płanujučy svajo prabyvańnie.
Ciapier čytajuć
Śpiecsłužby źbirajuć infarmacyju pa čatach dyjaspary. Najpierš šukajuć studentaŭ6
Kamientary