Ukraina śpiašajecca stvaryć vajennyja bieśpiłotniki sa štučnym intelektam
Takija bieśpiłotniki zmohuć pieraadoleć hłušeńnie sihnału i pracavać u vialikich hrupach.
Jak piša Reuters, ciapier va Ukrainie niekalki startapaŭ raspracoŭvajuć sistemy štučnaha intelektu, jakija dapamohuć kiravać vializnym parkam bieśpiłotnikaŭ i paźbiehnuć uździejańnia srodkaŭ radyjoelektronnaj baraćby.
Raspracoŭki viaducca pa niekalkich napramkach. Heta stvareńnie vizualnych sistem, jakija dapamahajuć identyfikavać celi i nakiroŭvać na ich bieśpiłotniki, kartahrafavańnie miascovaści dla navihacyi, a taksama raspracoŭka bolš składanych prahram, jakija dazvalajuć dronam dziejničać uzajemaźviazanymi «rojami».
Abjadnać bieśpiłotniki ŭ hrupy
Adnoj z kampanij, jakaja pracuje pa apošnim napramku, źjaŭlajecca Swarmer. Raspracoŭščyki zapeŭnivajuć, što ich rašeńni zrobiać mahčymym imhniennaje pryniaćcie adnaho rašeńnia ŭsioj hrupaj bieśpiłotnikaŭ, abjadnanych u hrupu. Pry hetym čałaviek budzie tolki davać dazvoł na aŭtamatyčnyja ŭdary.
«Kali vy sprabujecie pavialičyć maštaby (z dapamohaj apierataraŭ-ludziej), heta prosta nie pracuje… Ludziam praktyčna niemahčyma kiravać rojem z 10 abo 20 dronaŭ», — cytuje vydańnie hienieralnaha dyrektara Swarmer Siarhieja Kupryjenku.
Pavodle jaho słoŭ, u toj čas jak ludzi-apieratary ź ciažkaściu spraŭlajucca z apieracyjami, u jakich udzielničajuć bolš za piać bieśpiłotnikaŭ, štučny intelekt zmoža apracoŭvać sotni.
Sistema, jakaja atrymała nazvu Styx, kiruje sietkaj raźviedvalnych i ŭdarnych bieśpiłotnikaŭ, jak vialikich, tak i małych, u pavietry i na ziamli. Pa słovach Kupryjenki, kožny dron zmoža płanavać svaje dziejańni i pradkazvać pavodziny inšych u hrupie.
Akramia taho, jak zapeŭnivajuć raspracoŭščyki, aŭtamatyzacyja nie tolki pašyryć maštaby apieracyj, ale i dapamoža abaranić apierataraŭ bieśpiłotnikaŭ, jakija dziejničajuć pablizu linii frontu i źjaŭlajucca pryjarytetnaj cellu dla varožaha ahniu.
Pakul technałohija znachodzicca ŭ stadyi raspracoŭki i aprabavana na pole boju tolki ekśpierymientalna.
Pošuk abychodu pieraškod sihnału
Patreba ŭ dronach z štučnym intelektam stanovicca ŭsio bolš nadzionnaj pa miery taho, jak abodva baki ŭkaraniajuć sistemy radyjoelektronnaj baraćby, jakija parušajuć sihnały pamiž apieratarami i bieśpiłotnikami.
Pa słovach kiraŭnika napramku štučnaha intelektu va ŭkrainskim abaronnym kłastary Brave1 Maksa Makarčuka, zaraz viaducca raspracoŭki bieśpiłotnikaŭ z štučnym intelektam, jakija zmohuć pracavać, navat kali ŭ budučyni na linii frontu nie budzie suviazi.
Pa prahnozach, FPV-bieśpiłotniki, jakija kirujucca štučnym intelektam, zmohuć paražać celi ź vierahodnaściu kala 80%. Ciapier siaredni pracent ich papadańnia składaje 30-50%.
Klučavoj zadačaj dla ŭkrainskich vytvorcaŭ źjaŭlajecca stvareńnie dla dronaŭ tannaj sistemy naviadzieńnia na asnovie štučnaha intelektu. Heta dazvolić razharnuć jaje ŭzdoŭž usioj linii frontu.
Vytvorcy, u tym liku Swarmer, pačali raspracoŭku funkcyj, jakija dazvalajuć bieśpiłotniku fiksavacca na celi praz ułasnuju kamieru.
Pavodle acenak Makarčuka, košt ustanoŭki prostaj sistemy naviadzieńnia na cel, jakaja budzie fiksavacca na abjekcie, bačnym kamieraj drona, składzie ŭsiaho kala $150 na adzin aparat.
Vydańnie adznačaje, što štučny intelekt užo vykarystoŭvajecca ŭ niekatorych dalokich udarach ukrainskich bieśpiłotnikaŭ, nakiravanych na vajennyja abjekty i naftapierapracoŭčyja zavody za sotni kiłamietraŭ uhłyb terytoryi Rasii.
Adzin z ukrainskich čynoŭnikaŭ na ŭmovach ananimnaści raspavioŭ Reuters, što ŭ atakach časam udzielničaje roj prykładna z 20 bieśpiłotnikaŭ. Asnoŭnyja laciać da celi, zadača astatnich — źniščyć abo adciahnuć srodki supraćpavietranaj abarony. Dla hetaha jany vykarystoŭvajuć štučny intelekt pad kantrolem čałavieka, jaki dapamahaje vyjavić celi ci pahrozy i spłanavać mahčymyja maršruty.
Kamientary