Stryžak tłumačyć, čamu suprać pieramovaŭ z łukašenkaŭcami i jakaja jaho prapanova
«Kali ty vychodziš na pieramovy, a ŭ ciabie niama nijakich kozyraŭ, to pra što ty budzieš tam pieramaŭlacca».
U novym vypusku TOKu kiraŭnik fondu salidarnaści BySol Andrej Stryžak patłumačyŭ, čamu jon suprać pieramoŭ z łukašenkaŭcami, jakoj stratehii treba prytrymlivacca demsiłam i ci ličyć mahčymym «kruhły stoł».
Jak adznačaje Stražyk, «pieramovy viaducca tady, kali ŭ ciabie jość, z čym na ich iści». Na dadzieny momant, na jaho dumku, adzinaje, z čym demakratyčnyja siły Biełarusi mohuć iści na pieramovy, heta z papieraj, dzie Cichanoŭskaja, Łatuška, Stryžak i ŭsie astatnija napišuć pra kapitulacyju. «Heta adzinaje, što my možam ciapier prapanavać z taho, što my, ułasna, majem».
Pravaabaronca ličyć, što temaj pieramoŭ nie mohuć vystupać sankcyi, bo jany nie byli ŭviedzieny demakratyčnymi siłami.
«Davajcie budziem ščyrymi, našy ŭnutranyja prablemy — heta pytańnie nie pieršaha ŭzroŭniu dla jeŭrapiejcaŭ i amierykancaŭ, jany ŭ pieršuju čarhu dumajuć pra svaju biaśpieku. I kali ty vychodziš na pieramovy, a ŭ ciabie niama nijakich kozyraŭ, to pra što ty budzieš tam pieramaŭlacca», —
zaŭvažaje Stryžak i dadaje, što jon hatovy vyjści na pieramovy, ale ŭ toj momant, kali jany buduć mahčymyja.
«Ja hatovy sadzicca za stoł ź lubym ź fihurantaŭ, jakija tam ciapier u Minsku, i razmaŭlać, jakim čynam vychodzić z hetaj usioj situacyi. Ale jany sami nie chočuć ź jaje vychodzić. A nam niama čaho im prapanavać. My možam tolki prasić», — kaža pravaabaronca.
Jakaja stratehija pravilnaja?
Na pytańnie, jakaja moža być stratehija demakratyčnych siłaŭ u takoj situacyi, Stryžak adkazaŭ:
«Pravilnaja stratehija — hladzieć na tyja abstaviny, što adbyvajucca, i vykarystoŭvać kožnuju, navat niaznačnuju mahčymaść, kab uździejničać na situacyju. Ja nie biaru vialikija stratehičnyja źmieny, tamu što my ciapier u stanie paŭpadpolnaha partyzanskaha štaba, jaki niešta moža, a niešta nie. Treba absalutna realna aceńvać svaje ŭłasnyja mahčymaści, šancy na pieramohu».
U jakaści prykładu jon pryvioŭ vypadak z vypłatami vieteranam u 2021 hodzie. Tady ŭłady pa niejkich pryčynach admovilisia ad ich:
«My adrazu skarystalisia hetaj mahčymaściu. Abviaścili zbor. Sabrali niejkija 16 tysiač jeŭra. Sabrali paru sotniaŭ zajavak. Ale pałamali ŭsiu łohiku sistemy. Łukašenka byŭ vymušany vyjści, apraŭdvacca i zrabić samy vialiki danat na BySol-ByHelp. Jany vypłacili kala 25 miljonaŭ vieteranam (Łukašenka ahučvaŭ ličbu ŭ 65 miljonaŭ rubloŭ. — NN). Ja liču, što heta danat mienavita ŭ našu sistemu. Takija štuki treba vykarystoŭvać. Treba bolš kreatyvu».
Ci mahčymy «kruhły stoł»?
Na pytańnie, ci mahčyma damahčysia hramadskaha prymireńnia z dapamohaj «kruhłaha stała», Stryžak zaŭvažyŭ, što lubyja histaryčnyja paraleli «ad pačatku chibnyja». Kali havaryć pra Polšču, dzie «kruhły stoł» pryvioŭ da demakratyčnych pieramien u hramadstvie, to treba pamiatać, što heta adbyłosia va ŭmovach pieramien u Rasii.
«Polšča. Bolš za 40 miljonaŭ čałaviek. Adzin z samych mocnych ruchaŭ supracivu kamunistyčnaj sistemie — miljonny prafsajuz. Usio heta razhromlena. Uviedzieny vajenny stan. Hramadstva pahruziłasia ŭ hibiernacyju (zimovuju śpiačku. — NN). Prosta śpić.
Usio skončyłasia tady, kali ŭsie palaki zrazumieli, što heta dalej ciahnucca nie moža, i što źnikaje samy hałoŭny źniešni faktar. Prychod da ŭłady Harbačova vielmi mocna razradziŭ situacyju. Mienavita dziakujučy tamu, što Maskva na niejki čas sasłabła, adrazu ž pačynajucca niejkija pracesy, jakija pryvodziać da abjadnańnia Hiermanii i źmieny ŭłady ŭ Polščy», —
tłumačyć Stryžak i adznačaje, što ŭ Biełarusi adbudziecca toje ž samaje, jak tolki budzie novaje pasłableńnie ŭłady ŭ Maskvie.
«Ja vielmi spadziajusia, što heta adbudziecca, pakul u biełarusaŭ zachoŭvajecca instytucyjnaja pamiać pra 2020 hod i pra toje žadańnie pieramienaŭ, jakoje było».
Ale Stryžak dapuskaje, što čakać hetaha daviadziecca 30-50 hadoŭ. Za hety čas vyraście novaja hienieracyja, jakaja nie budzie mieć hetaha dośviedu. Tady daviadziecca ŭsio rabić znoŭku.
«Tamu naša praca pavinna być nakiravana na toje, kab hetyja pieramieny adbylisia jak maha chutčej.
Zrazumieła, što my ŭ Kramli ničoha sami nie možam zrabić. Ale my pamiatajem, što ŭ svoj čas zabiła savieckuju impieryju. Heta doŭhaja vajna ŭ Afhanistanie plus technałahičnyja katastrofy, jakija adbyvalisia adna za adnoj. I poŭnaja stomlenaść sistemy. I ludzi ad sistemy stamilisia, i sistema nie mahła sama siabie pradukavać.
Ci heta jość ciapier u Rasii? Ja nie śpiecyjalist pa ŭnutryrasijskich raskładach, ale dakładna viedaju, što ŭsio budzie zaležyć voś ad hetaha momantu.
Tamu, kali my adkazvajem na pytańnie, ci mahčymy «kruhły stoł», to čamu nie. Pahladzim, jaki budzie naš ułasny farmat vychadu z hetaha kryzisu. Ale toje, što jon pavinien być, dla mianie heta absalutna biassprečna», — adznačaje Stryžak.
Kamientary
vsie kluči ležat v moskvie. kak tolko im staniet nie do nas, naš kotieł riezko zaburlit... nikak nie rańšie. UVY...