Hałoŭnakamandujučy USU raskazaŭ pra pieravahu Rasii ŭ technicy i akreśliŭ, što rabić ukraincam

U intervju The Guardian Alaksandr Syrski adznačyŭ, što linija frontu składaje 3700 km. Aktyŭnyja bajavyja dziejańni viaducca na 977 km, što «ŭdvaja bolš, čym praciahłaść miažy pamiž Hiermanijaj i Francyjaj».

Pavodle słoŭ Syrskaha, kali razmova idzie ab technicy, suadnosiny 1:2 abo 1:3 na karyść Rasii. «Z 2022 hoda kolkaść rasijskich tankaŭ padvoiłasia — z 1700 da 3500. Artyleryjskich sistem stała ŭtraja bolš, a kolkaść bronietransparcioraŭ vyrasła z 4500 da 8900.

U praciŭnika značnaja pieravaha ŭ siłach i srodkach. Tamu dla nas na pieršy płan vychodzić pytańnie zabieśpiačeńnia, pytańnie jakaści», — adznačaje hałoŭnakamandujučy USU.

Syrski pryznaŭ, što ŭ apošnija miesiacy situacyja na froncie była «vielmi składanaj», ale jon upeŭnieny, što prasoŭvańnie Rasii možna spynić.

U jakaści prykładu Syrski pryvioŭ apošniuju sprobu Rasii zachapić Charkaŭ i susiedniuju Sumskuju vobłaść. «Jana pravaliłasia», — skazaŭ hałoŭnakamandujučy USU. Bai praciahvajucca, ale, pavodle jaho, sproba Rasii stvaryć tak zvany kalidor biaśpieki pobač z rasijskaj miažoj i Biełharadskaj vobłaściu była sarvanaja.

Syrski nazvaŭ paŭzučyja pieramohi Rasii «taktyčnymi» — łakalnymi dasiahnieńniami, a nie apieratyŭnym praryvam, takim, jak uziaćcie bujnoha horada.

«U pryncypie, praciŭnik nie damohsia nijakaha značnaha prahresu». Pry hetym, pavodle słoŭ hałoŭnakamandujučaha, straty Kramla ŭ try razy vyšejšyja, čym va Ukrainy, a na niekatorych napramkach «navat bolš».

U toj ža čas Syrski admoviŭsia nazyvać kankretnyja ličby strat ukrainskaha boku, a taksama datu doŭhačakanaj pastaŭki źniščalnikaŭ F-16, jakija pavinny ŭmacavać supraćpavietranuju abaronu Ukrainy.

Jon zaŭvažyŭ, što isnujuć miežy mahčymaściej F-16: jany pavinny znachodzicca na adlehłaści 40 km i bolš ad linii frontu z-za ryzyki, što Maskva ich sabje.

U intervju Syrski adznačyŭ paśpiachovaje vykarystańnie bieśpiłotnikaŭ-kamikadze dalokaha radyusu dziejańnia dla naniasieńnia ŭdaraŭ u hłybini terytoryi Rasii i padkreśliŭ, što klučavaja meta Ukrainy — źniščyć Kierčanski most.

Adna z samych nadzionnych zadač — znajści navabrancaŭ, kab zamianić zabitych i paranienych ukrainskich sałdat. Biez mabilizacyi nielha stvaryć novyja reziervy i bryhady, jakija nieabchodny, pakolki Rasija naroščvaje suchaputnyja vojski.

Pa acency Syrskaha, pieršapačatkovaja kolkaść rasijskaj hrupoŭki ŭ 100 tysiač čałaviek vyrasła da 520 tysiač, a da kanca 2024 hoda płanujecca davieści jaje da 690 tysiač čałaviek.

«Dla nas vielmi važna, kab usie hramadzianie Ukrainy vykanali svoj kanstytucyjny abaviazak», — zajaviŭ u intervju hałoŭnakamandujučy i zaklikaŭ ukraincaŭ, jakija žyvuć za miažoj, taksama pryniać udzieł.

«Spadziajusia, što paśla pieramohi jany zmohuć raskazać svaim dzieciam, dzie jany byli. Dzie vy byli, kali ŭsie hramadzianie Ukrainy vajavali ŭ takich žorstkich bajach? Voś u čym pytańnie», — cytuje vydańnie słovy Syrskaha.

Zaŭvažym, pra pavieličeńnie čałaviečych resursaŭ jak vychad atrymać pieravahu ŭ vajnie zajaŭlaŭ i były hałoŭnakamandujučy USU, a ciapier pasoł u Vialikabrytanii Valeryj Załužny.

• 7
• 1
• 4
• 0
• 0
• 0
• 0
• 0