Čamu Pucin tak apantany kileram Krasikavym i byŭ hatovy jaho mianiać navat na Navalnaha?

Jak paviedamlaje niamieckaje vydańnie Bild sa spasyłkaj na krynicy ŭ zachodnich vyviedkach, rasijski kiler i ahient FSB Vadzim Krasikaŭ moh syhrać istotnuju rolu ŭ prychodzie Uładzimira Pucina da ŭłady ŭ Rasii.

Adnoj z prajavaŭ takoj roli Krasikava moh stać jaho ŭdzieł u zabojstvie Anatola Sabčaka, palityčnaha nastaŭnika Pucina, padazrajuć zachodnija vyviedki.

Kali ŭ 1991 hodzie Anatol Sabčak staŭ pieršym meram Sankt-Pieciarburha, jon pryznačyŭ Uładzimira Pucina staršynioj Kamiteta pa źniešnich suviaziach meryi. U 1995 hodzie Pucin kiravaŭ vybarčaj kampanijaj Sabčaka dziela zachavańnia jahonaj pasady mera, ale pieraabrańnia nie adbyłosia, i tady Pucin admoviŭsia pracavać z novym meram i pakinuŭ usie pasady.

U 2000-m Pucin pryznačyŭ Sabčaka svajoj davieranaj asobaj na pieršych prezidenckich vybarach. U toj hod padčas adnoj ź pieradvybarnych pracoŭnych pajezdak Sabčak raptoŭna pamior (aficyjnaja pryčyna — sardečny prystup), adnak svajaki palityka mierkavali, što jon byŭ zabity.

Pavialičyć

Bild śćviardžaje, što zachodnija vyviedki razhladajuć viersiju ab dačynieńni Pucina i Krasikava da zabojstva Sabčaka jak całkam imaviernuju i miarkujuć, što Pucin vielmi aścierahaŭsia mahčymaj pomsty z boku Krasikava za niedastatkovyja namahańni Kramla pa jahonym vyzvaleńni ź niamieckaj turmy.

Pucin nie chacieŭ, kab ź ciaham času Krasikaŭ pajšoŭ na ŭhodu z uładami Hiermanii i raskryŭ im važnuju i niebiaśpiečnuju dla Kramla infarmacyju, tamu byŭ hatovy mianiać Krasikava navat na Alaksieja Navalnaha, čaho nie adbyłosia z-za jahonaj śmierci ŭ rasijskaj kałonii.

Pa danych The Wall Street Journal, u 1990-ja Krasikaŭ byŭ asabistym ciełaachoŭnikam Pucina. Vydańnie śćviardžaje, što jany razam naviedvali strelbišča.

Na apantanaść Pucina Krasikavym taksama źviartajuć uvahu vysokapastaŭlenyja surazmoŭcy vydańniaŭ The New York Times i The Washington Post, jakija ŭdzielničali ŭ arhanizacyi maštabnaha abmienu viaźniami pamiž Rasijaj i Zachadam.

Tak, śpiecpradstaŭnik Dziarždepartamienta ZŠA Džejms Rubin zajaviŭ The New York Times, što Pucin ličyć Krasikava svaim siabram i tolki za adnaho jaho Rasija ŭ chodzie abmienu vyzvaliła 12 rasijskich apazicyjanieraŭ. A krynica The Washington Post dadała, što «ŭ Pucina ŭ hałavie byŭ tolki Krasikaŭ».

U videa, jakoje raspaŭsiudziła rasijskaja prapahanda paśla abmienu viaźniami, było bačna, što Pucin asabista i ź vialikaj pyšnaściu sustrakaŭ svaich vyzvalenych ahientaŭ u maskoŭskim aeraporcie «Unukava», vyścieliŭšy im čyrvonuju darožku i vystraiŭšy dziela ich hanarovuju vartu.

Vadzim Krasikaŭ staŭ adzinym mužčynam siarod vyzvalenych ahientaŭ, jakomu Pucin nie prosta pacisnuŭ ruku, ale i pryludna abniaŭ.

• 1
• 1
• 4
• 0
• 1
• 1
• 18
• 0