Dźmitryj Siemčanka budzie vieści aŭtarskuju prahramu na «Biełsacie»

Telekanał «Biełsat» pradstaviŭ svaje płany na novy televizijny siezon, u jakim budzie dastatkova šmat navinak.

U budni ŭ 14:00 pavodle biełaruskaha času vychodzić novaja infarmacyjnaja prahrama «Naš dzień». Jana budzie raskazvać nie tolki pra vialikuju palityku, ale i pra padziei, jakija niepasredna ŭpłyvajuć na paŭsiadzionnaje žyćcio biełarusaŭ. Viadoŭcami stanuć Valer Rusielik i Anton Bialajeŭ.

U «Studyi Biełsat» źjavicca Kaciaryna Andrejeva — žurnalistka «Biełsatu» i byłaja palitźniavolenaja. Jana budzie vieści viečarovy efir razam ź inšymi viadoŭcami. Da jaho taksama dałučycca Dźmitryj Siemčanka, jaki pa subotach budzie vieści aŭtarskuju prahramu «Dekodar ź Siemčankam» pra prapahandu, manipulacyi i sensy, schavanyja za infarmacyjnym šumam.

Vital Cyhankoŭ praciahnie analityčnuju prahramu «Vysnovy», u jakoj budzie raźbirać hałoŭnyja padziei i tłumačyć ich sapraŭdnaje značeńnie.

U prahramie «Nacyjanalny intares» Siarhiej Pielasa i Źmicier Mickievič buduć abmiarkoŭvać biaśpieku Biełarusi, hieapalityku, adnosiny z susiednimi krainami i miesca Biełarusi ŭ Jeŭropie.

Jašče adna premjera — «A chto tam idzie?» z Alesiem Kirkievičam. Heta buduć intelektualnyja debaty pra biełaruskuju identyčnaść, nacyjanalnyja kaštoŭnaści, historyju i budučyniu krainy. Razam z pradstaŭnikami biełaruskaj kultury, palityki i hramadskaj dumki viadoŭca budzie šukać adkazy na składanyja pytańni i pieraasensoŭvać zvykłyja mify.

Važnym viartańniem stanie novy aŭtarski prajekt Paŭła Mažejki «Biełaruski śled». Žurnalist, jaki stajaŭ la vytokaŭ «Biełsata», budzie raspaviadać pra małaviadomyja i niedaacenienyja padziei XX stahodździa, jakija dapamahajuć lepš zrazumieć sučasnuju Biełaruś. Taksama jon budzie pracavać nad admysłovymi prajektami i raźvivać supracoŭnictva «Biełsata» z partniorami.

U «Tałace» hledačam prapanujuć dakumientalny sieryjał-nazirańnie pra biełaruskuju paru, jakaja sprabuje stvaryć ułasny chutar na Padlaššy, znajści svajo miesca i nablizicca da svaich karanioŭ.

Dzianis Dudzinski ŭ prahramie «Kałychanka dla darosłych» budzie razmaŭlać ź viadomymi haściami i pakazvać ich ź niečakanaha boku. «Nie da zakonaŭ» ź Jaŭhienam Salankovym budzie pryśviečana złačynstvam, nadzvyčajnym zdareńniam, represijam i machlarstvu ŭ Biełarusi.

Hłafira Žuk u prahramie «Mnie tolki spytać» budzie vieści ščyryja razmovy ź viadomymi biełarusami pra aktualnyja, viečnyja i asabistyja temy.

Razam z novym siezonam «Biełsat» zapuskaje kampaniju «Tranślujem pa-biełarusku». Jaje simvałam staŭ busieł, u vyjavie jakoha spałučajucca hukavaja chvala i sihnał tranślacyi. Jon simvalizuje pašyreńnie biełaruskaha słova ŭ Biełarusi i za jaje miežami.

U «Biełsacie» padkreślivajuć, što biełaruskaja mova źjaŭlajecca asnovaj pracy telekanała. U novym siezonie biełaruskaja mova budzie hučać jašče bolš aktyŭna.

• 8
• 0
• 0
• 1
• 0
• 0
• 0
• 1