Jeŭropa zapatrabavała ad «Hazprama» bolš za $20 miljardaŭ za niepastaŭleny haz

Nie mienš za 19 kampanij z 11 jeŭrapiejskich krain padali pazovy da rasijskaj hazavaj manapolii praz parušeńni hazavych kantraktaŭ, a ich ahulnaja suma dasiahnuła 18,6 młrd jeŭra, abo $20,6 młrd, padličyŭ Reuters.

Najbujniejšy ź ich — na 13 młrd jeŭra — byŭ padadzieny niamieckim kancernam Uniper, u minułym hałoŭnym klijentam «Hazprama» ŭ Hiermanii i suinviestaram prajekta «Paŭnočny patok — 2». Kampanija, jakaja zakuplała ŭ Rasii 20 młrd kubamietraŭ hazu ŭ hod, zapatrabavała kampiensacyi šmatmiljardnych strataŭ ad spynieńnia rasijskich pastavak. U červieni 2024 hoda Stakholmski arbitraž zadavoliŭ jaje pazoŭ u poŭnym abjomie.

Jašče kala $1 młrd ad «Hazprama» patrabuje RWE — inšy niamiecki imparcior hazu, jaki atrymlivaŭ 1 młrd kubamietraŭ u hod.

Francuzskaja Engie padała pazoŭ u arbitraž, patrabujučy ad «Hazprama» bolš za 300 młn jeŭra.

U Aŭstryi, jakaja praciahvaje zakuplać rasijski haz, zabiaśpiečvajučy im kala 90% svajho spažyvańnia, pazoŭ suprać «Hazprama» padaŭ najbujniejšy enierhakancern OMV: jahonaja suma składaje 575,3 młn jeŭra, piša Reuters.

U Finlandyi, dzie da vajny rasijski haz zajmaŭ 90% rynku, pazoŭ suprać «Hazprama» padaŭ kancern Gasum, u Italii — enierhahihant Eni, jaki admoviŭsia vykonvać ukaz Uładzimira Pucina ab apłacie pastavak «u rublach».

U Polščy pazoŭ suprać «Hazprama» na 1,5 młrd jeŭra padała Europol Gaz — kampanija, jakaja kiravała polskim učastkam trubapravoda «Jamał-Jeŭropa», jaki pampavaŭ haz z Zachodniaj Sibiry spažyŭcam u Hiermanii.

U Čechii pretenzii «Hazpramu» za niedapastaŭleny haz vystavili Net4gas i Innogy Energie: pieršaja patrabuje 113 młn jeŭra, druhaja — 78 młn.

U Šviejcaryi pazovy padali hazavyja trejdary DXT Commodities i Axpo Solutions: ich ahulnaja suma dasiahaje amal 1 młrd jeŭra.

U Niderłandach 275 młn jeŭra ad «Hazprama» patrabuje hazatranspartny apieratar Gasunie Transport Services. Jašče adzin pazoŭ za nievykarystańnie zareziervavanych hazavych mahutnaściaŭ padała BBL Company V. O. F.

U Słavakii z «Hazpramam» navažylisia sudzicca ZSE Energia i Vychodoslovenska energetika, a ŭ Bałharyi — Nacyjanalny hazavy apieratar Bulgargaz. Apošni patrabuje 400 młn jeŭra za skasavańnie kantraktu.

Ahulnaja suma pretenzij da «Hazpramu» pieravysiła jahonuju čystuju vyručku ad prodažaŭ hazu na ŭsie źniešnija rynki razam uziatyja: $10 młrd u hod ad pastavak u Jeŭropu i Turcyju, $7 młrd ad pastavak u Kitaj i $2 młrd ad ekspartu ŭ krainy SND i Centralnuju Aziju, pavodle acenak inviestycyjnaj kampanii BKS.

Šmatmiljardnyja pazovy stvarajuć ryzyki aryštu płaciažoŭ na adras «Hazprama» ŭ Jeŭropie, papiaredžvaje analityk Alfa-banka Mikita Błachin: kampanii, jakija patrabujuć kampiensacyj, mohuć pasprabavać pierachapić hrošy, jakija pakupniki rasijskaha hazu, jakija jašče ŭ Jeŭropie zastalisia, pieraličvajuć kampanii. Heta, u pryvatnaści, moža adbycca ŭ Aŭstryi, dzie nacyjanalny hazavy apieratar OMV u kancy maja paviedamiŭ pra sproby «pierachopu» płaciažoŭ na adras «Hazprama». Rasijskaj kampanii situacyja, jakaja skłałasia, praročyć dalejšaje zhortvańnie dziejnaści ŭ Jeŭropie, papiaredžvaje Błachin.

Letaś «Hazpram» prapampavaŭ na jeŭrapiejski rynak tolki 28 młrd kubamietraŭ hazu — minimalny abjom z kanca 1970-ch hadoŭ. Jaho sukupny ekspart skłaŭ tolki 69 młrd kuboŭ i staŭ samym nizkim z 1985 hoda. Upieršyniu z kanca 1990-ch «Hazpram» zaviaršyŭ hod z čystymi stratami pa mižnarodnych standartach finansavaj spravazdačnaści (MSFS), a ich pamiery — 629 młrd rubloŭ (kala 7 młrd dalaraŭ) — stali rekordnymi za ŭsiu historyju kampanii.

• 21
• 1
• 3
• 0
• 0
• 0
• 0
• 0